କନକ ବ୍ୟୁରୋ :  ଶନିବାର ଠାରୁ ଆରମ୍ଭ ହେବ ଆଇପିଏଲ ମହାମୁକାବିଲା । ତେବେ ଏହାପୂର୍ବରୁ  ଚେନ୍ନାଇ ସୁପର କିଙ୍ଗସ ପାଇଁ ଆସିଛି ଖୁସି ଖବର । ଆଇପିଏଲ ଉଦଘାଟନୀ ମ୍ୟାଚ୍ ପୂର୍ବରୁ ଚେନ୍ନାଇ ସୁପର କିଙ୍ଗସ କ୍ୟାମ୍ପରେ ଯୋଗ ଦେଇଛନ୍ତି ଦଳର ଷ୍ଟାର ଅଲରାଉଣ୍ଡର ମୋଇନ ଅଲ୍ଲୀ । ଭିସା ସମସ୍ୟାକୁ ନେଇ ମୋଇନ ଅଲ୍ଲୀଙ୍କ ଭାରତରେ ପହଞ୍ଚିବା ବିଳମ୍ବ ହେଉଥିଲା । କିନ୍ତୁ ଭିସା ସମସ୍ୟା ଦୂର ହେବା ପରେ ଏବେ ଭାରତରେ ପହଞ୍ଚିଛନ୍ତି ମୋଇନ । ତେବେ ମୋଇନ ଅଲ୍ଲୀ ଭାରତରେ ପହଞ୍ଚିବା ସତ୍ତେ୍ୱ  ମଧ୍ୟ ଉଦଘାଟନୀ ମ୍ୟାଚ୍ ଖେଳିପାରିବେ ନାହିଁ । ଶନିବାର କୋଲକାତା ନାଇଟ ରାଇଡର୍ସ ବିପକ୍ଷରେ ଉଦଘାଟନୀ ମ୍ୟାଚ୍ ଖେଳିବ ଚେନ୍ନାଇ ସୁପର କିଙ୍ଗସ ।

Advertisment

ଚେନ୍ନାଇ ସୁପର କିଙ୍ଗସର ଷ୍ଟାର ଅଲରାଉଣ୍ଡର ମୋଇନ ଅଲ୍ଲୀ ୨୮ ଫେବ୍ରୁଆରୀରେ ଭିସା ପାଇଁ ଆବେଦନ କରିଥିଲେ । କିନ୍ତୁ ଏହାସତ୍ତେ୍ୱ ମଧ୍ୟ ତାଙ୍କୁ ଭିସା ମିଳିପାରିନଥିଲା । ତେବେ ଭିସା ସମସ୍ୟା ଦୂର ହେବା ପରେ ଆଇପିଏଲର ୨ ଦିନ ପୂର୍ବରୁ ଭାରତରେ ପହଞ୍ଚିଛନ୍ତି ମୋଇନ । ଭାରତରେ ପହଞ୍ଚିବା ପରେ ତାଙ୍କୁ ୩ ଦିନ କ୍ୱାରେଣ୍ଟିନରେ ରହିବାକୁ ପଡିବ । ତେଣୁ ଉଦଘାଟନୀ ମ୍ୟାଚରେ ମୋଇନଙ୍କୁ ଦେଖିବାକୁ ମିଳିବ ନାହିଁ । ଚଳିତଥର ମୋଇନ ଅଲ୍ଲୀଙ୍କୁ ରିଟେନ କରିଥିଲା ଚେନ୍ନାଇ ସୁପର କିଙ୍ଗସ ।

ଗତଥର ଚେନ୍ନାଇକୁ ଚାମ୍ପିୟନ କରିବା ପଛରେ ମୋଇନଙ୍କର ବଡ ଅବଦାନ ରହିଥିଲା । ୧୫ଟି ମ୍ୟାଚରୁ ମୋଇନ ୩୫୭ ରନ କରିଥିବା ବେଳେ ୬ଟି ୱିକେଟ ହାସଲ କରିଥିଲେ । ଏହାଛଡା ଚଳିତଥର ସୁରେଶ ରୈନା ମଧ୍ୟ ଦଳରେ ନାହାନ୍ତି । ଏହାଛଡା ଚେନ୍ନାଇ ସୁପର କିଙ୍ଗସର ଅଧିନାୟକ ଭାର ଚଳିତ ସିଜିନରେ ରବୀନ୍ଦ୍ର ଜାଡେଜା ସମ୍ଭାଳିବେ । ତେଣୁ ଚଳିତଥର ଏକ ନୂଆ ରୂପରେ ମୈଦାନକୁ ଓହ୍ଲାଇବ ଚେନ୍ନାଇ ସୁପର କିଙ୍ଗସ ।