କନକ ବ୍ୟୁରୋ : ନିଜ ନିର୍ବାଚନମଣ୍ଡଳୀ ବାରଣାସୀ ଅନ୍ତର୍ଗତ କାଶୀ ବିଶ୍ୱନାଥ ଧାମର ସେବାୟତଙ୍କ ନିମନ୍ତେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୧୦୦ ହଳ ଝୋଟରେ ତିଆରି ହୋଇଥିବା ଚପଲ ପଠାଇଛନ୍ତି। ମିଳିଥିବା ସୂଚନା ଅନୁସାରେ, କାଶୀ ବିଶ୍ୱନାଥ ଧାମ କରିଡର୍ ଉଦ୍ଘାଟନ ନିମନ୍ତେ ବାରାଣସୀ ଗସ୍ତ ସମୟରେ ମନ୍ଦିର ପରିସରରେ କର୍ତ୍ତବ୍ୟ ସମ୍ପାଦନ କରୁଥିବା ଅଧିକାଂଶ ସେବାୟତ ଖାଲି ପାଦରେ କାର୍ଯ୍ୟ କରୁଥିବା ଦେଖିଥିଲେ ପ୍ରଧାନମନ୍ତ୍ରୀ ମୋଦୀ ।
କାଶୀ ବିଶ୍ୱନାଥ ମନ୍ଦିର ସହ ଲୋକଙ୍କର ବିଶ୍ୱାସ ଓ ଆସ୍ଥା ଯୋଡି ହୋଇ ରହିଛି । ଏଠାକୁ ବିଶ୍ୱର କୋଣ ଅନୁକୋଣରୁ ହଜାର ହଜାର ଶ୍ରଦ୍ଧାଳୁ ଭଗବାନ ଭୋଳାନାଥଙ୍କୁ ଦର୍ଶନ କରିବାକୁ ଆସିଥାନ୍ତି । ତେବେ ଏହି ମନ୍ଦିର ମଧ୍ୟକୁ ଚମଡ଼ା ଅଥବା ରବର ନିର୍ମିତ ଜୋତାଚପଲ ପିନ୍ଧି ପ୍ରବେଶ ନିଷେଧ। ପୁରରୋହିତ ମାନଙ୍କ ଠାରୁ ଆରମ୍ଭ କରି ସେବାୟତ, ସୁରକ୍ଷାକର୍ମୀ, ପରିମଳ କର୍ମୀ ଏବଂ ଅନ୍ୟମାନଙ୍କୁ ମଧ୍ୟ ଏହି ନିୟମରୁ ବାଦ ଦିଆଯାଏ ନାହିଁ। ପ୍ରଧାନମନ୍ତ୍ରୀ ମୋଦୀ ଯେତେବେଳେ ଏଠାକୁ ଆସିଥିଲେ ସେତେବେଳେ ମଧ୍ୟ କର୍ମଚାରୀମାନେ ବିନା ଚପଲରେ କାର୍ଯ୍ୟ କରୁୂଥିବାର ଦେଖିବାକୁ ପାଇଥିଲେ । ତେଣୁ ସେବାୟତମାନେ ଥଣ୍ଡା ପାଗରେ ଖାଲି ପାଦରେ ନ ରହିବା ଲାଗି ପ୍ରଧାନମନ୍ତ୍ରୀ ତୁରନ୍ତ ୧୦୦ ହଳ ଝୋଟ-ନିର୍ମିତ ଚପଲ ଆଣି କାଶୀ ବିଶ୍ୱନାଥ ଧାମକୁ ପଠାଇ ଦେଇଛନ୍ତି।
Varanasi, UP | PM Narendra Modi sends 100 pairs of jute footwear for the workers at 'Kashi Vishwanath Dham' after finding out that most of them worked bare-footed because it is forbidden to wear leather or rubber footwear in the temple premises: GoI sources pic.twitter.com/BawTJQHYUP
— ANI UP/Uttarakhand (@ANINewsUP) January 10, 2022
ପ୍ରଧାନମନ୍ତ୍ରୀ ମୋଦୀଙ୍କ ଠାରୁ ଉପହାରସ୍ୱରୂପ ଏହି ଝୋଟ ତିଆରି ଚପଲ ପାଇ କାଶୀ ବିଶ୍ୱନାଥ ଧାମରେ କାର୍ଯ୍ୟରତ ଲୋକ ମଧ୍ୟ ବେଶ ଖୁସି ଓ ଆନନ୍ଦିତ । ଆଉ ଏହା ମାଧ୍ୟମରେ ସାଧାରଣ ଲୋକଙ୍କ ସମସ୍ୟାକୁ ନିଆରା ଢଙ୍ଗରେ କିଭଳି ସମାଧାନ କରାଯାଇପାରେ ତାହାର ଉଦାହରଣ ସାଜିଛନ୍ତି ପ୍ରଧାନମନ୍ତ୍ରୀ ମୋଦୀ । ଗତ ମାସରେ ଦୁଇଦିନିଆ ବାରାଣସୀ ଗସ୍ତ ସମୟରେ ପ୍ରଧାନମନ୍ତ୍ରୀ ମୋଦୀ କାଶୀ ବିଶ୍ୱନାଥ କରିଡର୍ ନିର୍ମାଣ କରିଥିବା ଶ୍ରମଜୀବୀଙ୍କ ଉପରେ ପୁଷ୍ପ ପାଖୁଡ଼ା ବୃଷ୍ଟି କରିବା ସହ ପରେ ସେମାନଙ୍କ ସହ ମିଶି ଭୋଜନ କରିଥିଲେ। ଆଉ ପ୍ରଧାନମନ୍ତ୍ରୀଙ୍କ ଏଭଳି କାର୍ଯ୍ୟକୁ ସେତେବେଳେ ଚାରିଆଡୁ ପ୍ରଂଶସା କରାଯାଇଥିଲା ।