କରୋନା ସଂକ୍ରମଣର ସ୍ଥଙ୍ଗୀନ ସ୍ଥିତିରେ ମୋଦୀଙ୍କ ଗୁରୁତ୍ୱପୂର୍ଣ୍ଣ ବୈଠକ । ୧୦ ରାଜ୍ୟର ମୁଖ୍ୟମନ୍ତ୍ରୀଙ୍କ ସହ କଲେ ଆଲୋଚନା ।
କନକ ବ୍ୟୁରୋ: କରୋନା ସଂକ୍ରମଣର ଦ୍ୱିତୀୟ ଲହରରେ ପ୍ରତିଦିନ ଅଲୋଡା ରେକର୍ଡ ସୃଷ୍ଟି ହେଉଛି । କ୍ରମାଗତ ଦ୍ୱିତୀୟ ଦିନ ପାଇଁ ଦେଶରେ ୩ ଲକ୍ଷରୁ ଅଧିକ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ୨୪ ଘଂଟା ଭିତରେ ସାରାଦେଶରୁ ୩ ଲକ୍ଷ ୩୨ ହଜାର ୭୩୦ ନୂଆ ଆକ୍ରାନ୍ତ ଚିହ୍ନଟ ହୋଇଛନ୍ତି । ଏହି ସମୟ ମଧ୍ୟରେ ୨ ହଜାର ୨୬୩ ଜଣଙ୍କ ମୃତ୍ୟୁ ହୋଇଛି । ଗତକାଲି ଗୋଟିଏ ଦିନରେ ୩ ଲକ୍ଷ ୧୪ ହଜାର ୮୩୫ ଆକ୍ରାନ୍ତ ଚିହ୍ନଟ ହୋଇଥିବାବେଳେ ୨ହଜାର ୧୦୪ ଜଣଙ୍କ ମୃତ୍ୟୁ ହୋଇଥିଲା ।
Kanak News is now on WhatsApp
Join and get latest news updates delivered to you via WhatsApp
ଦ୍ୱିତୀୟ ଲହରରେ ଚିହ୍ନଟ ହେଉଥିବା ଦୈନିକ ସଂକ୍ରମଣ ଗତବର୍ଷ ସେପ୍ଟେମ୍ବରରେ ଦେଶ ଦେଖିଥିବା କରୋନାର ସର୍ବୋଚ୍ଚ ସଂକ୍ରମଣଠାରୁ ଢେର ଅଧିକ । ଏହାରି ଭିତରେ ଦେଶରେ କରୋନା ସଂକ୍ରମଣର ସଙ୍ଗୀନ ସ୍ଥିତିକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତିନୋଟି ଗୁରୁତ୍ୱପୂର୍ଣ୍ଣ ବୈଠକ କରିଛନ୍ତି ।
ପ୍ରଥମେ ଦେଶର ବରିଷ୍ଠ ଅଧିକାରୀଙ୍କ ସହ ବୈଠକ, ପରେ ୧୦ଟି ସର୍ବାଧିକ ସଂକ୍ରମିତ ରାଜ୍ୟର ମୁଖ୍ୟମନ୍ତ୍ରୀଙ୍କ ସହ ଆଲୋଚନା ଏବଂ ଶେଷରେ ଦେଶର ପ୍ରମୁଖ ଅକ୍ସିଜେନ୍ ଉତ୍ପାଦକଙ୍କ ସହ ମୋଦିଙ୍କ ବୈଠକ କରିଛନ୍ତି । ବିଭିନ୍ନ ଭାଗରେ ଆକ୍ରାନ୍ତଙ୍କୁ ଅକ୍ସିଜେନ୍ ଯୋଗାଇଦେବାରେ ସଂକଟ ସୃଷ୍ଟି ହୋଇଥିବା ନେଇ ଏହି ବୈଠକରେ ବିସ୍ତୃତ ଭାବେ ଆଲୋଚନା ହୋଇଛି । ଏବେ ନଜର ପକାନ୍ତୁ ମୋଦୀଙ୍କ ଅଧ୍ୟକ୍ଷତାରେ ବସିଥିବା ବୈଠକରେ କେତେକ ଗୁରୁତ୍ୱପୂର୍ଣ୍ଣ ଦିଗ ଉପରେ…
- ଅମ୍ଲଜାନ ଯୋଗାଣ ପାଇଁ ସବୁ ପ୍ରକାର ପ୍ରକାର ବନ୍ଦୋବସ୍ତ କରାଯାଉଛି
- ଶୀଘ୍ର ଯୋଗାଣ ପାଇଁ ଅକ୍ସିଜେନ ଏକ୍ସପ୍ରେସ ଆରମ୍ଭ ହୋଇଥିବା ବେଳେ ବାୟୁସେନା ଅମ୍ଲଜାନ ଯୋଗାଣରେ ନିୟୋଜିତ ହୋଇଛି
- ଏ ସଂକ୍ରାନ୍ତୀୟ ବିଭାଗ ଓ ମନ୍ତ୍ରଣାଳୟ ଏଦିଗରେ କାମ କରୁଛନ୍ତି
- ଶିଳ୍ପ ସଂସ୍ଥାର ଅକ୍ସିଜେନ ଗୁଡିକୁ ମଧ୍ୟ ସ୍ୱାସ୍ଥ୍ୟ କ୍ଷେତ୍ରରେ ଲଗାଯାଇଛି
- ସ୍ୱାସ୍ଥ୍ୟ ଓ ଅକ୍ସିଜେନ ଯୋଗାଣ କ୍ଷେତ୍ରରେ ସବୁ ରାଜ୍ୟ ମିଳିମିଶି କାମ କରିବାକୁ ପ୍ରଧାନମନ୍ତ୍ରୀଙ୍କ ଆହ୍ୱାନ
- ଔଷଧ ଓ ଅମ୍ଲଜାନ କଳାବଜାରୀକୁ ରୋକିବାକୁ ଗୁରୁତ୍ୱ
- କୌଣସି ରାଜ୍ୟରେ ଅକ୍ସିଜେନ ନେଇ ଯାଉଥିବା ଗାଡିକୁ ଅଟକାନଯାଉ
- ରାଜ୍ୟର ବିଭିନ୍ନ ଜିଲ୍ଲାରେ ଅମ୍ଲଜାନ ଯୋଗାଣ ପାଇଁ କମିଟି ଗଠନ କରାଯାଉ
- ସ୍ୱାସ୍ଥ୍ୟ ମନ୍ତ୍ରାଳୟ ରାଜ୍ୟର ସ୍ଥିତି ନେଇ ଯୋଗାଯୋଗରେ ଅଛି ଏବଂ ସମୟ ସମୟରେ ଆବଶ୍ୟକତା ଅନୁଯାୟୀ ନିର୍ଦ୍ଦେଶ ଜାରି କରାଯାଉଛି
ବିଶେଷଜ୍ଞଙ୍କ ମତରେ ମେ’ ୧୧ରୁ ୧୫ ମଧ୍ୟରେ କରୋନାର ଦ୍ୱିତୀୟ ଲହର ଏହାର ପିକ୍ ଅର୍ଥାତ ସର୍ବୋଚ୍ଚ ସଂକ୍ରମଣରେ ପହଂଚିବ । ସେତେବେଳେକୁ ଦୈନିକ ସଂକ୍ରମଣ ସାଢେ ୩ ଲକ୍ଷରୁ ୫ ଲକ୍ଷ ପର୍ଯ୍ୟନ୍ତ ରହିବ ।