ମୋଦୀ ଚାଉଳ ପଠାଉଛନ୍ତି, ନବୀନ ବାବୁ ବ୍ୟାଗରେ ଷ୍ଟିକର ମାରି ନିଜେ ଚାଉଳ ଦେଉଛନ୍ତି ବୋଲି କହୁଛନ୍ତି । ଗରିବଙ୍କୁ ଚାଉଳ ପ୍ରସଙ୍ଗରେ ଏମିତି କହିଲେ ଅମିତ ଶାହା…
କନକ ବ୍ୟୁରୋ : ଗରିବଙ୍କୁ ଚାଉଳ ଦେବା ପ୍ରସଙ୍ଗରୁ ରାଜ୍ୟ ସରକାରଙ୍କୁ ଘେରିଲେ ଶାହା । ଆସ୍କା ଜନସଭାକୁ ନବୀନଙ୍କୁ କଲେ ସିଧା ନିଶାନା । ବୁଧବାର ଶାହା କହିଛନ୍ତି, ଦେଶର ଗରିବ ଲୋକଙ୍କ ପାଇଁ ମୋଦୀ ଚାଉଳ ପଠାଉଛନ୍ତି । ହେଲେ ମୋଦୀ ପଠାଉଥିବା ଚାଉଳକୁ କିନ୍ତୁ ଗୋଟିଏ ବ୍ୟାଗରେ ପୂରାଇ ଷ୍ଟିକର ମାରି ନିଜେ ଚାଉଳ ଦେଉଥିବା କଥା କହୁଛନ୍ତି ନବୀନ ବାବୁ । ତେବେ ଯଦି ବ୍ୟାଗ ଦେଉଛ, ସେଥିରେ ଆଉ ଅଢେଇ କେଜି ଚାଉଳ ଦିଅନ୍ତୁ । ଚାଉଳ ଦେଲେ ଗରିବ ଲୋକ ଉପକୃତ ହେଇପାରିବେ ବୋଲି କହିଛନ୍ତି ଶାହା ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ନବୀନଙ୍କୁ ଟାର୍ଗେଟ କରି ଶାହା ଆହୁରି ମଧ୍ୟ କହିଛନ୍ତି ଯେ, ଏଭଳି କରି ମିଛରେ ଶ୍ରେୟ ନେବାକୁ ଉଦ୍ୟମ କରୁଛନ୍ତି ନବୀନ ବାବୁ । ହେଲେ ଚିନ୍ତା କରିବା ଦରକାର ନାହିଁ । କାହିଁକି ନା, ନବୀନ ବାବୁ ଆଉ ସରକାରକୁ ଆସିବେନି । ଓଡ଼ିଶାର ଲୋକ ତାଙ୍କୁ ଟାଟା ବାଏ ବାଏ କରିଦେବେ । ଏବେ ଓଡ଼ିଶାରେ ବିଜେପିର ମୁଖ୍ୟମନ୍ତ୍ରୀ ହେବାକୁ ଯାଉଛନ୍ତି ।
ନରେନ୍ଦ୍ର ମୋଦୀ ସରକାର ୧୨ କୋଟି ପରିବାର ପାଇଁ ଶୌଚାଳୟ ଦେଇଛନ୍ତି, ଗରିବଙ୍କ ପାଇଁ କାମ କରୁଛନ୍ତି କିନ୍ତୁ ଓଡ଼ିଶାର ଗରିବ ଲୋକଙ୍କୁ ଏହା ମିଳୁନାହିଁ । ମୋଦୀ ସରକାର ଆଣିଥିବା ଆୟୁଷ୍ମାନ ଯୋଜନା ଓଡ଼ିଶାରେ ଲାଗୁ କରୁନାହାନ୍ତି । କିନ୍ତୁ ଜୁନ୍ ୧ ତାରିଖରେ ନବୀନ ସରକାର ଯିବ, ପଦ୍ମ ଫୁଲ ଫୁଟିବ । ୧ ଜୁନରୁ ଓଡ଼ିଶାରେ ଆୟୁଷ୍ମାନ ଯୋଜନା ଲାଗୁ ହେବ, ଗରିବ ଲୋକ ୫ ଲକ୍ଷ ଟଙ୍କାର ଚିକିତ୍ସା ସୁବିଧା ପାଇବେ । ୭୦ ବର୍ଷରୁ ଅଧିକ ବୟସ୍କ ଲୋକଙ୍କୁ ମାଗଣା ଚିକିତ୍ସା ମିଳିବ ବୋଲି ଶାହା କହିଛନ୍ତି ।
ଅନ୍ୟପଟେ ନବୀନ ପଟ୍ଟନାୟକ ଏକ ରାଷ୍ଟ୍ର ଏକ ରାସନ କାର୍ଡ ଲାଗୁ କରୁନାହାନ୍ତି । କିନ୍ତୁ ବିଜେପି ସରକାର ଆସିଲେ ୧ ତାରିଖରୁ ୱାନ୍ ନେସନ ୱାନ୍ ରାସନ ଲାଗୁ କରିବୁ । ନବୀନ ବାବୁଙ୍କୁ ୨୪ ବର୍ଷ ସୁଯୋଗ ଦେଇଛନ୍ତି, ବିଜେପିକୁ ମାତ୍ର ୫ ବର୍ଷ ସୁଯୋଗ ଦିଅନ୍ତୁ ଦେଖିବେ ଓଡ଼ିଶାର କୌଣସି ଲୋକଙ୍କୁ ବାହାରକୁ କାମ ପାଇଁ ଯିବାକୁ ପଡିବନି । ଗଞ୍ଜାମ ହେଉଛନ୍ତି ନବୀନଙ୍କ ନିର୍ବାଚନମଣ୍ଡଳୀ । କିନ୍ତୁ ଗଞ୍ଜାମକୁ କାହିଁକି ଗୋଟିଏ ବି ଫ୍ୟାକ୍ଟ୍ରି ଆସିନି ? ଶୀତଳଭଣ୍ଡାରଟିଏ ମଧ୍ୟ ଏଠାରେ ଖୋଲିପାରିଲେନି । ବିଜେପି ବିଧାୟକ ଓ ସାଂସଦ ପ୍ରାର୍ଥୀଙ୍କୁ ବିଜୟୀ କରାନ୍ତୁ ଗଞ୍ଜାମକୁ ଦେଶର ଏକ ନମ୍ବର ଜିଲ୍ଲା କରିବୁ ବୋଲି କହିଛନ୍ତି ଶାହା ।
ତା ସହ ଚିଟଫଣ୍ଡରେ ଗରିବଙ୍କ ଟଙ୍କା ଖାଇଥିବା ଲୋକଙ୍କୁ ୧୮ ମାସରେ ସାବାଡ କରିବୁ । ଚାଷୀଙ୍କ ଧାନକୁ ୩୧୦୦ ଟଙ୍କାରେ କିଣିବୁ ଏବଂ ୪୮ ଘଣ୍ଟାରେ ଆକାଉଣ୍ଟକୁ ଟଙ୍କା ପଠାଇବୁ ବୋଲି କହିଛନ୍ତି ଶାହା । ଓଡ଼ିଶାର ମହିଳାଙ୍କୁ ୫୦ ହଜାର ଟଙ୍କାର ଭାଉଚର ଦେବା ସହିତ ଆସ୍କାରେ ଟେକ୍ସଟାଇଲ ପାର୍କ ଏବଂ ଖାଲି ପଡିଥିବା ଦେଢ ଲକ୍ଷ ସରକାରୀ ପଦବୀ ପୂରା କରିବାକୁ କହିଛନ୍ତି ଶାହା ।