କନକ ବ୍ୟୁରୋ : ଯୁବକ-ଯୁବତୀଙ୍କ ପାଇଁ ଖୁସି ଖବର । ଆଉ ରହିବନି ଚାକିରି ଟେନସନ । କାରଣ ନିଯୁକ୍ତିକୁ ନେଇ ବଡ ନିଷ୍ପତ୍ତି ନେଇଛନ୍ତି ମୋଦୀ ସରକାର । ସବୁବେଳେ ରୋଜଗାର ଓ ନିଯୁକ୍ତି ପ୍ରସଙ୍ଗକୁ ନେଇ ମୋଦୀ ସରକାରଙ୍କୁ ଘେରି ଆସିଛନ୍ତି ବିରୋଧୀ । କିନ୍ତୁ ବିରୋଧୀଙ୍କୁ ଜବାବ ଦେବାକୁ ଯାଇ ମେଗା ନିଯୁକ୍ତିର ନିଷ୍ପତ୍ତି ନେଇଛନ୍ତି ସରକାର । ଶହେ କି ହଜାର ନୁହେଁ ଲକ୍ଷ ଲକ୍ଷ ଆଶାୟୀଙ୍କୁ ମିଳିବ ନିଯୁକ୍ତି । ଆଉ ତାହା ବି ପୁଣି ଆଗାମୀ ଦେଢ ବର୍ଷ ମଧ୍ୟରେ ।

Advertisment

କେନ୍ଦ୍ର ସରକାରଙ୍କ ବିଭିନ୍ନ ବିଭାଗରେ ଫାଙ୍କା ପଡିଥିବା ପଦବୀ ଗୁଡିକୁ ମିଶନ ମୋଡରେ ଭର୍ତ୍ତି କରିବାକୁ ନିର୍ଦ୍ଦେଶ ଦେଇଛନ୍ତି ପ୍ରଧାନମନ୍ତ୍ରୀ । ମିଶନ ମୋଡରେ ଏହି ଅଭିଯାନ ଜାରି ରହିବ । ଅଥାର୍ତ ଆଗାମୀ ଦେଢ ବର୍ଷ ମଧ୍ୟରେ କେନ୍ଦ୍ର ସରକାରଙ୍କ ବିଭିନ୍ନ ବିଭାଗରେ ପ୍ରାୟ ୧୦ ଲକ୍ଷ ଚାକିରି ଆଶାୟୀଙ୍କୁ ନିଯୁକ୍ତି ମିଳିବ । ଏନେଇ ପିଏମଓ ପକ୍ଷରୁ ଟ୍ୱିଟ୍ କରି ସ୍ପଷ୍ଟ କରାଯାଇଛି । ଯେଉଁଥିରେ କୁହାଯାଇଛି ଯେ, ପ୍ରଧାନମନ୍ତ୍ରୀ ମୋଦୀ ସବୁ ବିଭାଗ ଓ ମନ୍ତ୍ରାଳୟର ଫାଙ୍କା ପଡିଥିବା ପଦବୀର ସମୀକ୍ଷା କରିଛନ୍ତି । ଏହାପରେ ଆଗାମୀ ଦେଢ ବର୍ଷ ମଧ୍ୟରେ ମିଶନ ମୋଡରେ ୧୦ ଲକ୍ଷ ପଦବୀରେ ନିଯୁକ୍ତି ଦେବାକୁ ନିର୍ଦ୍ଦେଶ ଦେଇଛନ୍ତି । ଆଉ ଏଥିପାଇଁ ସବୁ ବିଭାଗ ଦ୍ରୁତ ବେଗରେ କାର୍ଯ କରିବେ । ୨୦୨୦ ମାର୍ଚ୍ଚ ୧ ପର୍ଯ୍ୟନ୍ତ କେନ୍ଦ୍ର ସରକାରଙ୍କର ବିଭିନ୍ନ ବିଭାଗରେ ୮.୭୨ ଲକ୍ଷ ପଦବୀ ଫାଙ୍କା ରହିଥିଲା । କିନ୍ତୁ ୨ ବର୍ଷ ଭିତରେ ଏହି ସଂଖ୍ୟା ବୃଦ୍ଧି ପାଇଛି । କରୋନା ମହାମାରୀ କାରଣରୁ କେନ୍ଦ୍ର ସରକାରଙ୍କ ବିଭିନ୍ନ ବିଭାଗରେ ଫାଙ୍କା ପଡିଥିବା ପଦବୀରେ ନିଯୁକ୍ତି ହୋଇନାହିଁ । ଆଉ ଏଭଳି ସ୍ଥଳେ ମୋଦୀଙ୍କ ଏଭଳି ଯୁବବର୍ଗଙ୍କ ମନରେ ଉତ୍ସାହ ଭରିଦେଇଛି । ଆଗକୁ ୨୦୨୪ ନିର୍ବାଚନ, ଏହାପୂର୍ବରୁ ପ୍ରଧାନମନ୍ତ୍ରୀ ମୋଦୀଙ୍କ ଏଭଳି ନିଷ୍ପତ୍ତି ଶାସକ ଦଳକୁ ବେଶ ସୁହାଇବ ବୋଲି କୁହାଯାଉଛି ।