ପଞ୍ଜାବରେ କଂଗ୍ରେସକୁ କଡ଼ା ଭାଷାରେ ଟାର୍ଗେଟ କଲେ ମୋଦୀ । ସେପଟେ ମୋଦୀ ସରକାରକୁ ଚୀନ୍ ପ୍ରସଙ୍ଗରେ ମନମୋହନଙ୍କ ଟାର୍ଗେଟ୍

କନକ ବ୍ୟୁରୋ: ପଞ୍ଜାବରେ ପୁଣି କଂଗ୍ରେସକୁ ମୋଦିଙ୍କ ଟାର୍ଗେଟ । ନିର୍ବାଚନ ସମୟରେ କଂଗ୍ରେସକୁ ଟାର୍ଗେଟ କରି ମୋଦି କହିଛନ୍ତି ଯେ, ଲୋକଙ୍କ ଉନ୍ନତିକୁ ଅଣଦେଖା କରି ସବୁବେଳେ ରାଜନୈତିକ ଫାଇଦା ପାଇଁ ପ୍ରୟାସ କରି ଆସିଛି କଂଗ୍ରେସ ଦଳ । ଏହାସହ ଚାଷୀ ପ୍ରସଙ୍ଗ ଉଠାଇ କଂଗ୍ରେସ ଆଡ଼କୁ ଅଙ୍ଗୁଳିି ଉଠାଇଛନ୍ତି ପ୍ରଧାନମନ୍ତ୍ରୀ  । ସ୍ୱାମୀନାଥନ କମିଟିର ସୁପାରିଶକୁ କାର୍ଯ୍ୟରେ ପରିଣତ କରିବାର ଦାୟିତ୍ୱ କଂଗ୍ରେସ ହାତରେ ଥିଲା । ହେଲେ ସେତେବେଳର ସରକାର ଏହାକୁ କାର୍ଯ୍ୟକାରୀ କରିବାକୁ ଚେଷ୍ଟା କରି ନଥିଲେ ବୋଲି ସେ ଅଭିଯୋଗ କରିଛନ୍ତି  । ସେହପରି ମୁଖ୍ୟମନ୍ତ୍ରୀ ଚନ୍ନିଙ୍କ ବୟାନର ମଧ୍ୟ ଜବାବ ଦେଇଛନ୍ତି ପ୍ରଧାନମନ୍ତ୍ରୀ  । ୟୁପି ଓ ବିହାରର ଲୋକଙ୍କୁ ବାହାରର ଲୋକ ବୋଲି ଚନ୍ନିଙ୍କ ବୟାନକୁ ସମାଲୋଚନା କରିଛନ୍ତି ମୋଦୀ  ।

ସେପଟେ ମୋଦୀ ସରକାରଙ୍କୁ ଆଇନା ଦେଖାଇଛନ୍ତି ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂ  । ସେ କହିଛନ୍ତି , ସବୁକଥାରେ ମୋଦୀ ସରକାର କଂଗ୍ରେସକୁ ଦୋଷ ଦେବା ଛାଡ଼ୁ, ବରଂ ନିଜ କାର୍ଯ୍ୟ ଶୈଳୀର ସମୀକ୍ଷା କରୁ  । ଚୀନ୍ ଓ ପାକିସ୍ତାନ ପ୍ରସଙ୍ଗରେ ମୋଦୀ ସରକାରଙ୍କୁ ଟାର୍ଗେଟ କରିଛନ୍ତି ମନମୋହନ  । ନେତାଙ୍କୁ ଆଲିଙ୍ଗନ କଲେ କିମ୍ବା ବିନା ନିମନ୍ତ୍ରଣରେ ଯାଇ ବିରିୟାନି ଖାଇବା ଦ୍ୱାରା ସମ୍ପର୍କ ସୁଧୁରି ଯାଏନି । ଚୀନ୍ ରାଷ୍ଟ୍ରପତି ସି ଜିନପିଙ୍ଗଙ୍କ ସହ ମୋଦିଙ୍କ ସାକ୍ଷାତ ଓ ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ନୱାଜ ସରିଫଙ୍କ ଘରକୁ ମୋଦୀ ଯିବା ପ୍ରସଙ୍ଗରେ ସେ ଇସାରା କରିଛନ୍ତି  । ସେ କହିଛନ୍ତି ଯେ, କେନ୍ଦ୍ର ସରକାର ବୈଦେଶିକ ନୀତିରେ ବିଫଳ ହୋଇଛନ୍ତି । କେନ୍ଦ୍ର ସରକାର ଅର୍ଥନୀତି ପରିଚାଳନାରେ ବିଫଳ ହୋଇଥିବା ମଧ୍ୟ କହିଛନ୍ତି ମନମୋହନ  ।