ମୋଦିଙ୍କୁ ଅଧଘଣ୍ଟା ଅପେକ୍ଷା କରାଇଲେ ମମତା । ଅନ୍ୟ ସ୍ଥାନରେ ମିଟିଂ ଥିବା କହି ବାତ୍ୟା ସମ୍ପର୍କିତ କାଗଜପତ୍ର ଦେଇ ଚାଲିଗଲେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ।
କନକ ବ୍ୟୁରୋ : ପ୍ରଧାନମନ୍ତ୍ରୀଙ୍କ ୟାସ ବାତ୍ୟା ସମ୍ପର୍କିତ ସମୀକ୍ଷା ବୈଠକରେ ଅଧ ଘଣ୍ଟା ବିଳମ୍ବରେ ପହଁଚିଲେ ଦିଦି । ବାତ୍ୟା କ୍ଷୟକ୍ଷତିର ଦସ୍ତାବିଜ ମୋଦୀଙ୍କୁ ଧରାଇ ଅନ୍ୟ ସ୍ଥାନରେ ମିଟିଂ ଥିବା କହି ପଳାଇଲେ । ଆଜି କୋଲକାତାରେ କିଛି ଏଭଳି ଘଟଣା ଘଟିଛି । ଆଉ ଏହାକୁ ନେଇ ଏବେ ଚର୍ଚ୍ଚା ଜୋର ଧରିଛି । କାରଣ ପ୍ରଧାନମନ୍ତ୍ରୀଙ୍କ ସମୀକ୍ଷା ବୈଠକରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଯୋଗ ଦେଇନାହାଁନ୍ତି । ଆଜିର ଘଟଣାକୁ ନେଇ ରାଜନୈତିକ ସମୀକ୍ଷକଙ୍କ କହିବା କଥା ଯେ ପଶ୍ଚିମବଙ୍ଗରେ ନିର୍ବାଚନ ସମାପ୍ତ ହେବାର ପ୍ରାୟ ଏକ ମାସ ବିତିଗଲାଣି, କିନ୍ତୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଉପରେ ମମତା ବାନାର୍ଜୀଙ୍କ ଅସନ୍ତୋଷ ଏପର୍ଯ୍ୟନ୍ତ ଦୂର ହୋଇପାରିନାହିଁ ।
Kanak News is now on WhatsApp
Join and get latest news updates delivered to you via WhatsApp
ଆଜି ମୋଦୀଙ୍କ ବାତ୍ୟା ସମ୍ପର୍କିତ ସମୀକ୍ଷା ବୈଠକରେ ଉଭୟ ମୁଖ୍ୟମନ୍ତ୍ରୀ ମମତା ବାନାର୍ଜୀ ଓ ରାଜ୍ୟ ମୁଖ୍ୟ ଶାସନ ସଚିବ ୩୦ ମିନିଟ ବିଳମ୍ବରେ ପହଞ୍ଚିଥିଲେ। କେବଳ ଏତିକି ନୁହେଁ, ବୈଠକରେ ପହଞ୍ଚିବା ପରେ ମମତା ବାନାର୍ଜୀ ବାତ୍ୟାରର କ୍ଷୟକ୍ଷତି ରିପୋର୍ଟ ଦେଇ ସେଠାରୁ ଚାଲିଯାଇଥିଲେ ।
ଏହାକୁ ନେଇ ମମତା ବାନାର୍ଜୀ କହିଛନ୍ତି, ଦିଘାରେ ମୋର ଆଉ ଏକ ମିଟିଂ ଥିଲା । ମୁଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ରିପୋର୍ଟ ଦାଖଲ କରି ୨୦,୦୦୦ କୋଟି ଟଙ୍କାର ସହାୟତା ଦାବି କରିଛି । ଦିଘାର ବିକାଶ ପାଇଁ ୧୦,୦୦୦ କୋଟି ଏବଂ ସୁନ୍ଦରବନ୍ ବିକାଶ ପାଇଁ ୧୦,୦୦୦ କୋଟି ଟଙ୍କା ଦାବି କରିଛି । ମୁଁ ମୋଦୀଙ୍କୁ କହିଥିଲି ଯେ ରାଜ୍ୟ ଅଧିକାରୀମାନେ ମୋତେ ଭେଟିବାକୁ ଚାହୁଁଛନ୍ତି। ଏହା ପରେ ମୁଁ ତାଙ୍କଠାରୁ ଅନୁମତି ନେଇ ଚାଲିଆସିଥିଲି । ‘ତେବେ କୁହାଯାଉଛି, ବିରୋଧୀ ଦଳ ନେତା ଶୁଭେନ୍ଦୁ ଅଧିକାରୀଙ୍କୁ ସମୀକ୍ଷା ବୈଠକରେ ସାମିଲ ହେଉଥିବା ଜାଣିବା ପରେ ନାରାଜ ହୋଇଯାଇଥିଲେ ମମତା । ଏପରିକି ବୈଠକକୁ ଆସିବେନି ବୋଲି ପୂର୍ବରୁ ଜଣାଇ ଦେଇଥିଲେ ।