ଉଡିବା ପାଇଁ ସୁଟ୍, ରୋବୋଟିକ ଖଚର: ଭାରତୀୟ ସେନାକୁ ମିଳିବ ଆଧୁନିକ ଉପକରଣ
କନକ ବ୍ୟୁରୋ: ହଲିଉଡ ମୁଭିର ଚର୍ଚ୍ଚିତ ସୁପରହିରୋ ଆଇରନ ମ୍ୟାନ ଭଳି ଆକାଶରେ ଉଡିବ ଭାରତୀୟ ସେନା । ହାଇଟେକ ହେବ ଆର୍ମିର ସାମରିକ କ୍ଷମତା । ଦୁର୍ଗମ ଅଂଚଳରେ ପଶି ଶତ୍ରୁକୁ ଦମନ କରିପାରିବ । ସୀମାବର୍ତି ଅଂଚଳରେ ସେନାର ସାମରିକ ଶକ୍ତି ମଜବୁତ କରିବା ସହ ଶତ୍ରୁପକ୍ଷ ଉପରେ ନୀରିକ୍ଷଣ ବ୍ୟବସ୍ଥାକୁ ସୁଦୃଢ କରିବା ପାଇଁ ବଡ ପଦକ୍ଷେପ ନେଇଛି ଭାରତୀୟ ସେନା । ସେଇଥି ପାଇଁ ପ୍ରାଥମିକ ଭାବେ ୪୮ଟି ଜେଟ ପ୍ୟାକ ସୁଟ୍, ୧୦୦ଟି ରୋବଟ ଏବଂ ୧୩୦ଟି ଫାଷ୍ଟ-ଟ୍ରାକ ‘ଟିଥର୍ଡ’ ଡ୍ରୋନ୍ ସିଷ୍ଟମ କିଣିବା ପ୍ରକ୍ରିୟା ଆରମ୍ଭ ହୋଇଛି । ଭାରତୀୟ କଂପାନୀଠାରୁ ଏସବୁ କିଣିବାକୁ ନିଷ୍ପତି ନେଇଛି ସେନା ।
Kanak News is now on WhatsApp
Join and get latest news updates delivered to you via WhatsApp
କ’ଣ ଏହି ଜେଟ ପ୍ୟାକ ସୁଟ୍?
ଏଥିରେ ୫ଟି ଗ୍ୟାସ ଟର୍ବାଇନ ଜେଟ ଇଂଜିନ ରହିଛି
ଯାହା ୧୦୦୦ ହର୍ସ ପାୱାର ଶକ୍ତି ସୃଷ୍ଟି କରିଥାଏ
ଏ ସୁଟ ପିନ୍ଧି ମଣିଷ ଆକାଶରେ ଉଡିପାରିବ
ଜେଟ ପ୍ୟାକ ସୁଟ୍ର ବେଗ ଘଂଟା ପ୍ରତି ୫୦ କିଲୋମିଟର
ଭାରତୀୟ ସେନା ପକ୍ଷରୁ କୁହାଯାଇଛି ଜେଟ ପ୍ୟାକ ସୁଟ ମାଇନସ ୧୦ ଡିଗ୍ରୀରୁ ୪୫ ଡିଗ୍ରୀ ସେଲସିୟସରେ କାମ କରିପାରୁଥିବା ଦରକାର । ଏଥିସହ ୮୦ କିଲୋରୁ ଅଧିକ ଓଜନ ଧରି ସୁଟ ଉଡିପାରୁଥିବା ଜରୁରୀ ବୋଲି ସର୍ତ ରଖିଛି । ଏହାଛଡା ସେନା ସୁରକ୍ଷିତ ଉଡାଣ ଓ ଅବତରଣ ବ୍ୟବସ୍ଥା ଥିବା ଉପରେ ଜୋର ଦେଇଛି ।
ନିକଟରେ ଆର୍ମେନିଆ-ଆଜରବାଇଜାନ ଠାରୁ ଆରମ୍ଭ କରି ରୁଷ-ୟୁକ୍ରେନ ଯୁଦ୍ଧରେ ଜେଟ ପ୍ୟାକ ସୁଟର କରାମତି ଦେଖିବା ପରେ କିଣିବାକୁ ନିଷ୍ପତି ନେଇଛି ଭାରତୀୟ ସେନା । ଏହି ସୁଟ ପାଇଲେ ଦୁର୍ଗମ ଅଂଚଳରେ ପହଂଚି ଶତ୍ରୁର ଉଦ୍ୟମକୁ ବିଫଳ କରିପାରିବ ଭାରତୀୟ ସେନା ।
କଠିଣ ଭୌଗଳିକ ସ୍ଥିତିରେ ଥିବା ସୀମାବର୍ତି ଅଂଚଳର ସେନା ଶିବିରକୁ ଖଚରରେ ସାମଗ୍ରୀ ବୁହା ହୋଇ ଯାଇଥାଏ । ଏବେ ରୋବଟ ଜରିଆରେ ସେହି କାମ କରିବାକୁ ନିଷ୍ପତି ନେଇଛି ସେନା । ସେଥିପାଇଁ ୧୦୦ଟି ରୋବଟିକ ମ୍ୟୁଲ ବରାଦ କରାଯାଇଛି । ସେହିପରି ସୀମା ରେଖା ଉପରେ ନଜର ରଖିବା ପାଇଁ ୧୩୦ଟି ଫାଷ୍ଟ-ଟ୍ରାକ ‘ଟିଥର୍ଡ’ ଡ୍ରୋନ୍ ସିଷ୍ଟମ କିଣିବା ପ୍ରକ୍ରିୟା ମଧ୍ୟ ଆରମ୍ଭ ହୋଇଛି । ୨୦୨୦ରେ ପୂର୍ବ ଲଦାଖରେ ଉତେଜନା ପରଠୁ ଭାରତୀୟ ସେନା ୩୫ଶହ କିଲୋମିଟର ବାସ୍ତବିକ ନିୟନ୍ତ୍ରଣ ରେଖା ବା ଏଲଏସି ଉପରେ ନୀରିକ୍ଷଣ ବ୍ୟବସ୍ଥାକୁ ମଜବୁତ କରୁଛି ।