କନକ ବ୍ୟୁରୋ : ୨୦୨୪ ନିର୍ବାଚନ ପାଇଁ ସରଗରମ ହେଲାଣି ରାଜ୍ୟ ରାଜନୀତି । ଆଉ ଏହି ମାହୋଲକୁ ଆହୁରି ଉଷ୍ମ କରିଛି ଉଭୟ ବିଜେପି ଓ ବିଜେଡି ଶିବିରର ସକ୍ରିୟତା । ଏସବୁ ଭିତରେ ଆସନ୍ତାକାଲି ଠାରୁ ୨ ଦିନିଆ ଓଡ଼ିଶା ଗସ୍ତରେ ଆସିବେ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା । ଯାହାକୁ ନେଇ ଦଳର ତୃଣମୂଳସ୍ତରରୁ ଶୀର୍ଷସ୍ତରର ଶିବିର ଚଳଚଞ୍ଚଳ । ନଡ୍ଡାଙ୍କ ଏହି ଗସ୍ତ ୨୦୨୪ ନିର୍ବାଚନ ପୂର୍ବରୁ ବେଶ ଗୁରୁତ୍ୱପୂର୍ଣ୍ଣ ବୋଲି ମନେ କରାଯାଉଛି । କାରଣ ୨୦୨୪ ନିର୍ବାଚନ ପାଇଁ ପୁଣିଥରେ ମିଶନ ୧୨୦ ଅଭିଯାନ ଆରମ୍ଭ କରିବ ବିଜେପି । ଯେଉଁଥିପାଇଁ ସଙ୍ଗଠନକୁ ସୁଦୃଢ କରିବାକୁ ମନ୍ତ୍ର ଦେବେ ବିଜେପି ମୁଖିଆ । ପଞ୍ଚାୟତସ୍ତରରୁ ଦଳକୁ କିଭଳି ଅଧିକ ସଙ୍ଗଠିତ ଓ ଶକ୍ତିଶାଳୀ କରିହେବ ସେନେଇ ପ୍ରସ୍ତୁତ ହେବ ରୋଡମ୍ୟାପ । ପ୍ରତି ପଞ୍ଚାୟତର ପ୍ରମୁଖ କର୍ମୀଙ୍କୁ ଗୁରୁମନ୍ତ୍ର ଦେବେ ନଡ୍ଡା । ଆଉ ଏହାପରେ ଦଳର ଛାମୁଆ ନେତାଙ୍କୁ ଭେଟି କବାଟକିଳା ବୈଠକ କରିବେ ନଡ୍ଡା ।
Kanak News is now on WhatsApp
Join and get latest news updates delivered to you via WhatsApp
ନଡ୍ଡାଙ୍କ ଗସ୍ତକୁ ନେଇ ବିଜେପି ଶିବିର ଉତ୍ସାହିତ ଥିବା ବେଳେ ପୁଣିଥରେ ମିଶନ ୧୨୦ ନାରା ଦେବା ଆରମ୍ଭ କରିଛନ୍ତି ଦଳୀୟ ନେତା । ପୂର୍ବତନ ବିଧାୟକ ପ୍ରଦୀପ ପୁରୋହିତ କହିଛନ୍ତି, ବିଜେପି ଏବେଠୁ ୨୦୨୪ ନିର୍ବାଚନ ପାଇଁ ପ୍ରସ୍ତୁତି ଆରମ୍ଭ କରିଛି । ଆଉ ୨୦୨୪ରେ ମଧ୍ୟ ସେହି ପୁରୁଣା ମିଶନକୁ ନେଇ ମୈଦାନକୁ ଓହ୍ଲାଇବ ବିଜେପି । ସେହିଭଳି ରାଜ୍ୟ ବିଜେପି ସଭାପତି ସମୀର ମହାନ୍ତି କହିଛନ୍ତି, ୨୦୨୪ ନିର୍ବାଚନ ପୂର୍ବରୁ ସଙ୍ଗଠନକୁ ସୁଦୃଢ କରିବାକୁ ମନ୍ତ୍ର ଦେବେ ରାଷ୍ଟ୍ରୀୟ ସଭାପତି । ୨୦୨୪ରେ ରାଜ୍ୟରେ ଦ୍ୱିମୁଖୀ ଲଢେଇ ହେବ ବୋଲି କହିଛନ୍ତି ସମୀର ମହାନ୍ତି । ଦଳର ବରିଷ୍ଠ ନେତା ପୃଥ୍ୱୀରାଜ ହରିଚନ୍ଦନ କହିଛନ୍ତି, ୨୦୨୪ ନିର୍ବାଚନ ପାଇଁ ବିଜେପି ପ୍ରସ୍ତୁତି ପୂର୍ବରୁ ହିଁ ଆରମ୍ଭ କରିଛି । ପଞ୍ଚାୟତସ୍ତରର ପ୍ରମୁଖ, ପଞ୍ଚାୟତ ସହ ପ୍ରମୁଖ ଓ ସହରୀ ପ୍ରମୁଖଙ୍କ ସହ ଆଲୋଚନା କରି ୨୦୨୪ ପାଇଁ ତ୍ରୀଦେବଙ୍କୁ ଅସ୍ତ୍ର ଦେବେ ନଡ୍ଡା ।
କିନ୍ତୁ ସବୁଠୁ ବଡ କଥା ହେଲା ୨୦୧୯ରେ ବିଜେପିର ମିଶନ ୧୨୦ ନାରା ଫେଲ ମାରିଥିଲା । ମିଶନ ୧୨୦ ମାତ୍ର ୨୩ରେ ହିଁ ସୀମିତ ରହିଥିଲା । ବିଜେପି ଓ ମୋଦୀଙ୍କୁ ନେଇ ପୂରା ଦେଶରେ ହାୱା ଥିଲା ସତ କିନ୍ତୁ ଓଡ଼ିଶାରେ ତାହା ପ୍ରତିଫଳିତ ହୋଇନଥିଲା । ସରକାର ଗଢିବା ପାଇଁ ସ୍ୱପ୍ନ ଦେଖିଥିବା ବିଜେପି ୨୩ ଆସନ ପାଇ ବିରୋଧୀ ଆସନରେ ବସିଥିଲା । ଆଉ ଏହାପରେ ରାଜ୍ୟରେ ହୋଇଥିବା ବିଭିନ୍ନ ଉପ-ନିର୍ବାଚନରେ ଦଳ କେବଳ ମାତ୍ ଖାଇନାହିଁ ବରଂ ବାଲେଶ୍ୱର ସଦର ଆସନ ମଧ୍ୟ ହରାଇଛି ।
ଏଭଳି ସ୍ଥିତିରେ ପ୍ରଶ୍ନ ଉଠିବା ସ୍ୱାଭାବିକ ଯେ, କାହିଁକି ପୁଣିଥରେ ଫେଲ ମିଶନ ଉପରେ ଫୋକସ କରୁଛି ବିଜେପି? ୨୦୧୯ରେ ବିଜେପି ଚାଣକ୍ୟ ଶାହାଙ୍କ ଷ୍ଟ୍ରାଟେଜି ଓଡ଼ିଶାରେ ଫେଲ ମାରିଥିଲା । ବିଜେପି ସପକ୍ଷରେ ହାୱା ଥିବା ସତ୍ତେ୍ୱ ମଧ୍ୟ ଏହାର ଫାଇଦା ନେବାରେ ବିଫଳ ହୋଇଥିଲା ଦଳ । ଏହାପରେ ଗତ ପଞ୍ଚାୟତ ଓ ପୌର ନିର୍ବାଚନରେ ମଧ୍ୟ ମାତ୍ ଖାଇଛି ଦଳ । ତେଣୁ ନଡ୍ଡା ମିଶନ ୧୨୦ ପାଇଁ କଣ ଅଙ୍କ କଷିବେ ଓ ଏହା ରାଜ୍ୟ ବିଜେପି ପାଇଁ କେତେ ଫାଇଦା ଆଣିଦେବ ତାହା ଉପରେ ସମସ୍ତଙ୍କର ନଜର ରହିଛି ।