ପିସିସି ସଭାପତି ନିରଞ୍ଜନ ପଟ୍ଟନାୟକଙ୍କ ଗାଡ଼ି ଉପରକୁ ଆକ୍ରମଣ ଘଟଣା: ଜଣକୁ ଅଟକ ରଖି ପଚରାଉଚରା କରୁଛି ପୋଲିସ
ଗତକାଲି କେନ୍ଦୁଝର ଟାଉନ ଥାନା କାଶୀପୁରରେ ଗାଡ଼ି ଅଟକାଇ ହୋଇଥିଲା ଆକ୍ରମଣ
କନକ ବ୍ୟୁରୋ: ପିସିସି ସଭାପତି ନିରଞ୍ଜନ ପଟ୍ଟନାୟକଙ୍କ ଗାଡ଼ି ଉପରକୁ ଆକ୍ରମଣ ଘଟଣା । ଜଣକୁ ଅଟକ ରଖି ପଚରାଉଚରା କରୁଛି ପୋଲିସ୍ । ଅଭିଯୁକ୍ତ ସଂଜୟ ମହାନ୍ତିଙ୍କୁୁ ଥାନାରେ ଅଟକ ରଖି ପଚରାଉଚରା କରାଯାଉଛି । ଅନ୍ୟ ଅଭିଯୁକ୍ତଙ୍କୁୁ ଧରିବାକୁ ଟାଉନ ଥାନା ପୁଲିସ ତନାଘନା ଚଳାଇଛି । କେନ୍ଦୁଝର ଟାଉନ ଥାନା ପୁଲିସ ପକ୍ଷରୁ ଏନେଇ ସୂଚନା ଦିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଗତକାଲି କେନ୍ଦୁଝର ଟାଉନ ଥାନା ଅଂଚଳର କାଶିପୁରରେ ପିସିସି ସଭାପତି ଯାଉଥିବା ଗାଡ଼ିକୁ ଅଟକାଇଥିଲେ କିଛି ଦୁର୍ବୃତ୍ତ । ଏହାପରେ ଦୃର୍ବୃତ୍ତମାନେ ଗାଡ଼ି ଉପରକୁ ଆକ୍ରମଣ କରିଥିଲେ । ଏନେଇ କେନ୍ଦୁଝର ଟାଉନ ଥାନାରେ ମାମଲା ରୁଜୁ ହୋଇଛି । ତେବେ ଘଟଣା ସମ୍ପର୍କରେ ପ୍ରତିକ୍ରିୟା ରଖି ନିରଞ୍ଜନ ପଟ୍ଟନାୟକ କହିଛନ୍ତି ଯେ, ଗାଡ଼ିରେ ଆସୁଥିବା ବେଳେ କିଛି ଯୁବକ ଓଭରଟେକ୍ କରି ଅଚାନକ୍ ତାଙ୍କ ଗାଡ଼ିକୁ ରାସ୍ତାରେ ଅଟକାଇଥିଲେ । ପିଏସଓ ଯାଇ ଯେତେବେଳେ ପଚାରିଥିଲେ କ’ଣ ପାଇଁ ଅଟକାଇଥିଲେ, ଗାଡ଼ିକୁ ଦୃର୍ବୃତ୍ତମାନେ ବାଡେଇଥିଲେ । ଆଉ ଏହି ସମୟରେ ଏକ ଆମ୍ବୁଲାନ୍ସ ଯାଉଥିବାର ସୁଯୋଗ ନେଇ ସେମାନେ, ସେଇ ଆଢ଼ୁଆଳରେ ଖସିଯାଇଥିଲେ ।
ତେବେ ଘଟଣାକୁ ନେଇ ଚିନ୍ତା ପ୍ରକାଟ କରିଛନ୍ତି ପିସିସି ସଭାପତି । ପିସିସି ସଭାପତିଙ୍କ ଗାଡି ଉପରେ ଆକ୍ରମଣ ଘଟଣାକୁ ନେଇ ଯୁବ କଂଗ୍ରେସ କର୍ମୀମାନେ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ କରିଥିଲେ । କଂଗ୍ରେସକର୍ମୀଙ୍କୁ ପିସିସି ସଭାପତି ନିରଞ୍ଜନ ପଟ୍ଟନାୟକ ବୁଝାସୁଝା କରିବା ପରେ ପ୍ରତିବାଦରୁ ଓହରିଯାଇଥିଲେ ।