ବିଶ୍ୱ ନିୟନ୍ତାଙ୍କ ବଡ ଯାତ୍ରା ନେଇ ଦୂର ହେଲା ଦ୍ୱନ୍ଦ୍ୱ । ଗୋଟିଏ ଦିନରେ ନିଷ୍ପତି ବଦଳାଇଲେ ସୁପ୍ରିମକୋର୍ଟ, କୋଟି କୋଟି ଜଗନ୍ନାଥପ୍ରେମୀଙ୍କ ବିଶ୍ୱାସର ହେଲା ବିଜୟ।
କନକ ବ୍ୟୁରୋ : ଚଳିତ ବର୍ଷ ରଥଯାତ୍ରା ହେବ ନାହିଁ । ଏହା କୋଟି କୋଟି ଜଗନ୍ନାଥ ପ୍ରେମୀଙ୍କ ମନକୁ ଆନ୍ଦୋଳିତ କରୁଥିଲା । ଏପରିକି କେହି କେହି ରଥଯାତ୍ରା ହୋଇପାରିବ ନାହିଁ ବୋଲି କହିବାକୁ ପଛାଉନଥିଲେ । ଏହାକୁ ଆଖି ଆଗରେ ରଖି ବିଧି ରକ୍ଷା ପାଇଁ ଚାଲିଥିଲା ଆଲୋଚନା । ହେଲେ, ଏସବୁ ଭିତରେ ସମସ୍ତଙ୍କ ଚମକାଇ ଦେଇ ରଥଯାତ୍ରା ପାଇଁ ଅନୁମତି ଦେଇଥିଲେ ସର୍ବୋଚ୍ଚ ନ୍ୟାୟାଳୟ । ଆଉ ଏହାକୁ ନେଇ ଜୋର ଧରିଛି ଚର୍ଚ୍ଚା, କରିସ୍ମା କଲା କି କାଳିଆ?
Kanak News is now on WhatsApp
Join and get latest news updates delivered to you via WhatsApp
ବଡ଼ଦେଉଳ ଆଗରେ କାନ୍ଦି କାନ୍ଦି କାଳିଆ ଠାକୁରଙ୍କୁ ଗୁହାରି କରୁଥିଲେ ମହିଳା ଭକ୍ତମାନେ । ସମସ୍ତେ ଆଶା କରୁଥିଲେ, କିଛି ଅଲୌକିକ ଘଟଣା ଘଟିବ । ବଡ଼ଦାଣ୍ଡରେ ଗଡିବ ତିନି ରଥ । ସେମାନଙ୍କ ବିଶ୍ୱାସ, ଜଗତର ନାଥ ଜଗନ୍ନାଥ ସକଳ ସୃଷ୍ଟିର ଆଧାର । ତାଙ୍କରି ଇଙ୍ଗିତରେ ସବୁ କିଛି ହୋଇଥାଏ । ଆଉ ତାଙ୍କରି ଇଚ୍ଛାରେ ରଥଯାତ୍ରା ହେବ, ଏପରି ଆସ୍ଥା ଥିଲା ଅନେକଙ୍କ ମନରେ । ଗତ ୧୮ ତାରିଖରେ ଶହ ଶହ ବର୍ଷର ପୁରୀ ରଥଯାତ୍ରା ବନ୍ଦ କରିବା ନେଇ ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ ମହାପ୍ରଭୁଙ୍କ ଅଲୌକିକତାକୁ ଅପେକ୍ଷା କରିଥିଲେ ଲୋକେ ।
କରୋନା କଟକଣା ଦୃଷ୍ଟିରୁ ରଥଯାତ୍ରା ଉପରେ ରୋକ ଲାଗିବା ପରେ ପରେ ସାରା ଓଡ଼ିଶାରେ ହଇଚଇ ସୃଷ୍ଟି ହୋଇଥିଲା । ରାୟର ପରିବର୍ତନ କରି କେବଳ ପୁରୀରେ ରଥଯାତ୍ରା କରିବା ପାଇଁ ଅନୁମତି ଦେବାକୁ ଗୋଟିଏ ପରେ ଗୋଟିଏ ପିଟିସନ ଦାୟର ହେଲା ସୁପ୍ରିମକୋର୍ଟରେ । ଶନିବାର ଓ ରବିବାର କୋର୍ଟ ବନ୍ଦ ରହିଥିଲା । ମଙ୍ଗଳବାର ଦିନ ରଥଯାତ୍ରା । ମଝିରେ ଥିଲା ଗୋଟିଏ ଦିନ । ସମସ୍ତଙ୍କ ମନରେ ଆଶା ଓ ଆଶଙ୍କା ବଢ଼ି ଚାଲିଥିଲା । ଯଦି ଜଗନ୍ନାଥ ଚାହାଁନ୍ତି, ଏହି ଗୋଟିଏ ଦିନରେ ସବୁ ସମସ୍ୟା ହଟିଯିବ, ଆଉ ରଥଯାତ୍ରା ପାଇଁ ସୁପ୍ରିମକୋର୍ଟଙ୍କ ଅନୁମତି ମିଳିବ ବୋଲି ଭକ୍ତ ଓ ସେବାୟତଙ୍କ ବିଶ୍ୱାସ ।
ଆଜି ସୁପ୍ରିମକୋର୍ଟ କି ନିଷ୍ପତି ନେଉଛନ୍ତି, ଏହା ଉପରେ ଓଡ଼ିଶା ସମେତ ବିଶ୍ୱରେ ଥିବା କୋଟି କୋଟି ଜଗନ୍ନାଥ ପ୍ରେମୀ ନଜର ର୍ଖିଥିଲେ । ଉଭୟ କେନ୍ଦ୍ର ଓ ଓଡ଼ିଶା ସରକାର ରଥଯାତ୍ରା ସପକ୍ଷରେ ସୁପ୍ରିମକୋର୍ଟରେ ପକ୍ଷ ରଖିବା ପାଇଁ ଆଗେଇ ଆସିଲେ । ରଥଯାତ୍ରା ସପକ୍ଷରେ ସର୍ବୋଚ୍ଚ ନ୍ୟାୟାଳୟରେ ଦେଶର ବଡ଼ ବଡ଼ ଓକିଲ ଯୁକ୍ତି ଦର୍ଶାଇବା ପାଇଁ ପ୍ରସ୍ତୁତ ହେଲେ । ଅଲୌକିକ ଘଟଣା ଭଳି ସବୁକିଛି ଘଟିଥିଲା ଖୁବ କମ୍ ସମୟ ମଧ୍ୟରେ । ଶେଷରେ କୋଭିଡ୍ କଟକଣା ଭିତରେ ବିନା ଭକ୍ତରେ ପୁରୀରେ ରଥଯାତ୍ରା କରିବା ପାଇଁ ଅନୁମତି ଦେଇଥିଲେ ସୁପ୍ରିମକୋର୍ଟ ।