ଦୁନିଆ ନ ଦେଖୁଣୁ ଆରପାରିକୁ ଚାଲିଗଲା ମାଆ । ବାପା ମାନସିକ ବିକାରଗ୍ରସ୍ତ । ଏ ଦୁନିଆରେ କେମିତି ବଞ୍ଚିବ କୁନି ଝିଅ ଚୁମାଲି ? କିଏ ଗଢିବ ତା ଭବିଷ୍ୟତ ? ଶୁଣ ସରକାର…
କନକ ବ୍ୟୁରୋ: କୋମଳମତି ଶିଶୁଟିଏ, ଏ ଦୁନିଆ ବିଷୟରେ କଣ ବା ଜାଣିଛି ସେ । ହେଲେ ଏ ଦୁନିଆକୁ ଆସିବା ପୂର୍ବ ଆରପାରିକୁ ଚାଲିଯାଇଥିଲା ମାଆ । ଆଉ ବାପା ଜଣେ ମାନସିକ ବିକାରଗ୍ରସ୍ତ ରୋଗୀ । ନିଜ ହାତରେ ଖାଇବା ଶିଖିନି କି ନିଜର ଦାୟିତ୍ୱ ନେବା ଜାଣିନି । ଏବେ କେମିତି ବଞ୍ଚିବ ଏ କୁନି ଝିଅ । ତା ସୁନାର ଭବିଷ୍ୟତ ଗଢିବ କିଏ? ଆଉ ତାକୁ କୋଳରେ ଧରି ଜହ୍ନ ମାମୁ ଦେଖାଇବ କିଏ ? ଏମିତି ଆଶା ଆଶଙ୍କାରେ ଏବେ କୁନି ଝିଅ ଚୁମାଲିର ଭବିଷ୍ୟତ ।
Kanak News is now on WhatsApp
Join and get latest news updates delivered to you via WhatsApp
ଆମେ କହୁଛୁ ପୁରୀ ଜିଲ୍ଲା କୃଷ୍ଣପ୍ରସାଦ ବ୍ଲକ ଅନ୍ତର୍ଗତ କୁରୁପାଳ ଗାଁର ପ୍ରଶନ୍ନ ଜେନାଙ୍କ ଝିଅ ଚୁମାଲିର କଥା । ମାଆ ବ୍ଲଡ କ୍ୟାନ୍ସରରେ ମୃତ୍ୟୁ ବରଣ କରିବା ପରେ ଅଜା ଆଇ ପାଖରେ ରହୁଛି ଚୁମାଲି । ଚୁମାଲିର ଦୁଃଖ ଦେଖି ଅଜା ଆଇ ତାକୁ କୋଳେଇ ନେଇଥିଲେ, ହେଲେ ଏବେ ତାକୁ କେମିତି ବଡ ମଣିଷ କରିବେ ସେହି କଥା ତାଙ୍କୁ ଚିନ୍ତାରେ ପକାଇଛି ।
ୟାରି ଭିତରେ ଚୁମାଲିକୁ ୮ବର୍ଷ ହୋଇଯାଇଛି । ଏବେ ଚୁମାଲି ଚତୁର୍ଥ ଶ୍ରେଣୀରେ ପାଠ ପଢୁଛି । ପାଠ ପଢି ବଡ ମଣିଷ ହେବାକୁ ସଂଘର୍ଷ କରୁଛି ଚୁମାଲି । ଆଉ ତାର ପାଠ ପଢାରେ ସାହାଯ୍ୟ କଲେ ସେ ଆଗକୁ ଆହୁରି ଭଲ ପଢିପାରିବ ବୋଲି ସରକାରଙ୍କ ପାଖରେ ନିବେଦନ କରିଛି ।
ଚୁମାଲି ଛୋଟ ଥିବା ବେଳେ ବ୍ଲଡ କ୍ୟାନ୍ସରରେ ଆରପାରିକୁ ଚାଲି ଯାଇଥିଲେ ମାଆ । ଆଉ ମାଆକୁ ଏବେ ବି ଝୁରୁଛି ଚୁମାଲି । ହୁଏତ ଆଜି ଚୁମାଲିର ମାଆ ଥିଲେ ତାକୁ ଏ ଦିନ ଦେଖିବାକୁ ପଡିନଥାନ୍ତା । ହେଲେ ଚୁମାଲିକୁ ବଡ ମଣିଷ କରିବା ପାଇଁ ଅଜା ଆଇ ଅନେକ ପରିଶ୍ରମ କରୁଛନ୍ତି । ଯଦି ଚୁମାଲିକୁ ଆଗକୁ ପଢିବାକୁ ସରକାର ସାହାଯ୍ୟ କରନ୍ତେ ତେବେ ଚୁମାଲିର ଭବିଷ୍ୟତ ଉଜ୍ୱଳ ହୋଇପାରନ୍ତା ।