ରାଜଧାନୀ ଦିଲ୍ଲୀରୁ ଏକ ଅଭାବନୀୟ ଘଟଣା ସାମ୍ନାକୁ ଆସିଛି । ଅଧ ରାତିରେ ପାଣି ମାଗିବାରୁ ମା’କୁ ହତ୍ୟା କରିଛି ନାବାଳକ ପୁଅ । ଯାହା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳାଇଦେଇଛି ।
Kanak News is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ମୁତାବକ, ଗ୍ରେଟର ନୋଏଡାର ବାଦଲପୁର ଅଞ୍ଚଳରେ ଗତ ଶନିବାର ଜଣେ ୫୦ ବର୍ଷୀୟ ମହିଳାଙ୍କୁ ଗଳାଚିପି ହତ୍ୟା କରାଯାଇଥିବାର ଖବର ସାମ୍ନାକୁ ଆସିଥିଲା । ଯେଉଁ ସମୟରେ ମହିଳାଙ୍କ ମୃତ୍ୟୁ ହୋଇଥିଲା ସେହି ସମୟରେ ଘରେ କେବଳ ନାବାଳକ ପୁଅ ସାଥୀରେ ଥିଲା । ଏପରିକି ମା’ର ମୃତ୍ୟୁ ଖବର ମଧ୍ୟ ବାପାଙ୍କୁ ଫୋନ୍ କରି ଜଣାଇଥିଲା ପୁଅ ।
ପୋଲିସ ଘଟଣାସ୍ଥଳରେ ପହଞ୍ଚି ଯାଞ୍ଚ ଆରମ୍ଭ କରିଥିଲା । ଯେହେତୁ ମା’ର ମୃତ୍ୟୁ ସମୟରେ ନାବାଳକ ପୁଅ ପାଖରେ ଥିଲା ତେଣୁ ପୋଲିସ ପ୍ରଥମେ ପୂରା ଘଟଣା ବାବଦରେ ତାଙ୍କୁ ପଚାରିଥିଲା । କିନ୍ତୁ ପୋଲିସକୁ ମିଛ କହିଥିଲା ନାବାଳକ ପୁଅ । ନିଦରେ ଶୋଇଥିବା ବେଳେ ମା’ଙ୍କୁ ହତ୍ୟା କରାଯାଇଥିବା କହି ପୋଲିସକୁ ଭଣ୍ଡାଇବାକୁ ଚେଷ୍ଟା କରିଥିଲା ପୁଅ । କିନ୍ତୁ ପାରିପାଶ୍ୱିକ ପରିସ୍ଥିତି ଦେଖିବା ପରେ ନାବାଳକ ପୁଅ ଉପରେ ପୋଲିସର ସନ୍ଦେହ ହୋଇଥିଲା । ଅଧିକ ପଚରାଉଚରା ପରେ ପୂରା ହତ୍ୟାକାଣ୍ଡର କାହାଣୀ କହିଥିଲା ନାବାଳକ ପୁଅ । ଯାହା ଶୁଣି ଆଶ୍ଚର୍ଯ୍ୟ ହୋଇଯାଇଥିଲେ ପୋଲିସ ଅଧିକାରୀ ।
ନାବାଳକ ପୁଅର କହିବା ଅନୁଯାୟୀ, ପ୍ରତିଦିନ ଅଧ ରାତିରେ ନିଦରୁ ଉଠାଇ ବାରମ୍ବାର ପାଣି ଓ ତମ୍ବାକୁ ମାଗୁଥିଲେ ମା’ । ମଝି ରାତିରେ ନିଦ ଭାଙ୍ଗିବା ପରେ ଆଉ ଠିକ୍ ସେ ନିଦ ହୋଇପାରୁନଥିଲା । ତେଣୁ ଏଥିରୁ ମୁକ୍ତି ପାଇବା ପାଇଁ ଗଳାଚିପି ମା’ଙ୍କୁ ହତ୍ୟା କରିଥିବା କହିଥିଲା ପୁଅ ।