ମନ୍ତ୍ରୀ ହେବ ତ ଏମିତି…କାନ୍ଧରେ ମେସିନ୍ ବୋହିଲେ । ନିଜ ହାତରେ ସହରକୁ ସାନିଟାଇଜ୍ କଲେ । ମହାମାରୀ ବେଳେ ମନ୍ତ୍ରୀ ସାଜିଲେ ମାନବିକତାର ବଡ଼ ଉଦାହରଣ ।
କନକ ବ୍ୟୁରୋ : କରୋନା ମହାମାରୀ କେମିତି ମାନବିକତାକୁ ମାରିଦେଉଛି, ତାର ଅନେକ ଚିତ୍ର ଆମେ ଆପଣଙ୍କୁ ଦେଖାଇଛୁ । କିନ୍ତୁ ଏହାରି ଭିତରେ ମଣିଷପଣିଆ ବଂଚିରହିଥିବା ସାରା ସମାଜକୁ ବାର୍ତା ଦେଇଛନ୍ତି ମଧ୍ୟପ୍ରଦେଶର ଶକ୍ତି ମନ୍ତ୍ରୀ ପ୍ରଦ୍ୟୁମ୍ନ ସିଂ ତୋମାର । ସଂକ୍ରମଣ ବଢୁଥିବା ବେଳେ ନିଜ ହାତରେ ସହରକୁ ସାନିଟାଇଜ୍ କରିଛନ୍ତି ମନ୍ତ୍ରୀ ।
Kanak News is now on WhatsApp
Join and get latest news updates delivered to you via WhatsApp
ଗତ ଶନିବାର ଗ୍ୱାଲିଅର ଜିଲ୍ଲାର ଗ୍ରାମୀଣ ଅଂଚଳରେ କରୋନା ମୁକାବିଲା ପାଇଁ କ’ଣ ସବୁ ପଦକ୍ଷେପ ନିଆଯାଇଛି, ତାର ତଦାରଖ କରିବା ପାଇଁ ଯାଇଥିଲେ ମନ୍ତ୍ରୀ ପ୍ରଦ୍ୟୁମ୍ନ ସିଂ ତୋମାର । ଏତିକି ବେଳେ ନିଜ ଡ୍ୟୁଟି ସମୟରେ ଜଣେ କର୍ମଚାରୀ ସାନିଟାଇଜେସନ୍ ମେସିନ ସହ ଘରେ ଶୋଇଥିବାର ଦେଖିଥିଲେ ମନ୍ତ୍ରୀ । ଏହି ଘଟଣାରେ ମନ୍ତ୍ରୀ ରାଗିଯାଇ ଉପସ୍ଥିତ ଥିବା ଅଧିକାରୀଙ୍କ ଉପରେ ବର୍ଷିବା ସହ ନିଜ ପିଠିରେ ସାନିଟାଇଜେସନ୍ ମେସିନ୍ ବୋହି ସହରକୁ ସାନିଟାଇଜ୍ କରିଥିଲେ ।
ପାଖାପାଖି ୧ ଘଂଟା ଧରି ସହରର ଗଳିକନ୍ଦିଠାରୁ ଆରମ୍ଭ କରି ଦୋକାନ ବଜାର ସବୁଠି ନିଜେ ସାନିଟାଇଜ୍ କରିଥିଲେ ମନ୍ତ୍ରୀ । କେବଳ ଏତିକି ନୁହେଁ, ହସ୍ପିଟାଲ ଯାଇ ରୋଗୀଙ୍କୁ ଉତମ ଚିକିତ୍ସା ମିଳୁଛି କି ନାହିଁ, ସେ ବାବଦରେ ମଧ୍ୟ ପଚାରି ବୁଝିଥିଲେ ମନ୍ତ୍ରୀ । ଆଉ ଏହା ସହ କରୋନା ଆକ୍ରାନ୍ତଙ୍କର ସ୍ୱତନ୍ତ୍ର ଧ୍ୟାନ ରଖିବାକୁ ମଧ୍ୟ ସେ ପରାମର୍ଶ ଦେଇଥିଲେ ।
କରୋନା ମହାମାରୀ ଭଳି ମହାସଙ୍କଟ ସମୟରେ ମନ୍ତ୍ରୀ ପ୍ରଦ୍ୟୁମ୍ନ ସିଂ ତୋମାର ସମାଜ ଆଗରେ ଏକ ଉଦାହରଣ ପାଲଟିଛନ୍ତି । ତେବେ ଏଭଳି ସଙ୍କଟ ସମୟରେ ସମସ୍ତେ ପରସ୍ପରକୁ ସାହାଯ୍ୟ କରିବାର ଆବଶ୍ୟକତା ରହିଛି ।
ତେବେ କିଛିଦିନ ତଳେ କରୋନା ରୋଗୀଙ୍କ ପାଇଁ କେମିତି ଶ୍ରମମନ୍ତ୍ରୀ ସୁଶାନ୍ତ ସିଂ ଆମ୍ବୁଲାନ୍ସର ଡ୍ରାଇଭର ବନିଥିଲେ, ସେ ଚିତ୍ର ଆମେ ଆପଣଙ୍କୁ ଦେଖାଇଥିଲୁ । ବରଗଡ ସୋହେଲା ବ୍ଲକ ତବଡା ଗାଁର ଜଣେ ଯୁବକ କରୋନାରେ ଆକ୍ରାନ୍ତ ହୋଇ କଷ୍ଟ ପାଉଥିବାର ଖବର ଯେତେବେଳେ ମନ୍ତ୍ରୀଙ୍କ ପାଖରେ ପହଂଚିଥିଲା, ସେତେବେଳେ ସେ ନିଜେ ଆମ୍ବୁଲାନ୍ସ ଚଳାଇ ରୋଗୀଙ୍କ ପାଖରେ ପହଂଚିଯାଇଥିଲେ । ରୋଗୀଙ୍କୁ ଆମ୍ବୁଲାନ୍ସରେ ଆଣି ଡାକ୍ତରଖାନାରେ ଭର୍ତି କରାଇଥିଲେ । କେବଳ ଏତିକି ନୁହେଁ, ବରଗଡ ଜିଲ୍ଲା ସୋହେଲାରେ କରୋନା ସଂକ୍ରମିତଙ୍କ ସଂଖ୍ୟା ବଢିଚାଲିଥିବାବେଳେ ମନ୍ତ୍ରୀ ସୁଶାନ୍ତ ସିଂ ଜରୁରିକାଳୀନ ପରିସ୍ଥିତିର ମୁକାବିଲା ପାଇଁ ନିଜସ୍ୱ ଉଦ୍ୟମରେ ଏକ ଆମ୍ବୁଲାନ୍ସ ଓ ୧୫ଟି ଅକ୍ସିଜେନ୍ ସିଲିଣ୍ଡର ଲୋକଙ୍କ ଉଦ୍ଦେଶ୍ୟରେ ସମର୍ପିତ କରିଛନ୍ତି ।