ପ୍ରଶ୍ନ ଗୋଟେ, ଉତର ଆଉ ଗୋଟେ । ବିଧାନସଭାରେ ସଦସ୍ୟଙ୍କ ପ୍ରଶ୍ନର ନିଦ୍ଦିଷ୍ଟ ଉତର ରଖୁନଥିବା ଅଭିଯୋଗ ଆଣିଲେ ଉଭୟ ଶାସକ ଓ ବିରୋଧୀ ଦଳ ବିଧାୟକ
କନକ ବ୍ୟୁରୋ : ବିଧାନସଭାରେ ବାଚସ୍ପତିଙ୍କ ରୁଲିଂକୁ ବେଖାତିର କରାଯାଉଛି । ଆଜି ଗୃହରେ ଏନେଇ ଅଭିଯୋଗ କରିଛନ୍ତି ବିଧାୟକ । ବଡ କଥା ହେଉଛି, ବିରୋଧୀ ଦଳ ବିଧାୟକଙ୍କ ସହ ସମାନ ଅଭିଯୋଗ ଆଣିଛନ୍ତି ଶାସକ ଦଳର ବିଧାୟକ ।
Kanak News is now on WhatsApp
Join and get latest news updates delivered to you via WhatsApp
ଗୃହରେ ରାଜ୍ୟର ସ୍ୱାର୍ଥ ସମ୍ପର୍କିତ ପ୍ରସଙ୍ଗ ଉଠାଉଛନ୍ତି ସଦସ୍ୟ, ପ୍ରସଙ୍ଗକୁ ନେଇ ରୁଲିଂ ଦେଉଛନ୍ତି ବାଚସ୍ପତି, ହେଲେ ମନ୍ତ୍ରୀଙ୍କ ନିର୍ଦ୍ଦିଷ୍ଟ ଉତର ଆସୁନଥିବା ଅଭିଯୋଗ କରିଛନ୍ତି ସଦସ୍ୟ । ଅଭିଯୋଗ କେବଳ ବିରୋଧୀ ଦଳର ସଦସ୍ୟଙ୍କର ନୁହେଁ, ଶାସକଦଳର ସଦସ୍ୟ ବି ସମାନ ଅଭିଯୋଗ ଆଣିଛନ୍ତି । ଓଡ଼ିଆକୁ ଶାସ୍ତ୍ରୀୟ ଭାଷାର ମାନ୍ୟତା ମିଳିବା ପରେ କାହିଁକି କେନ୍ଦ୍ରୀୟ ଅନୁଦାନ ଆସୁ ନାହିଁ ଏବଂ ରାଜ୍ୟ ସରକାର କାହିଁକି ଆବେଦନ କରୁନାହିଁନ୍ତି ବୋଲି ପ୍ରଶ୍ନ କରିଥିଲେ କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି । ଏହି ପ୍ରସଙ୍ଗରେ ଯେତେବେଳେ ସଂସ୍କୃତି ମନ୍ତ୍ରୀ ଜ୍ୟୋତି ପ୍ରକାଶ ପାଣିଗ୍ରାହୀ ଉତର ରଖିଥିଲେ, ତାହା ଗୃହର ସଦସ୍ୟଙ୍କୁ ସନ୍ତୁଷ୍ଟ କରିପାରିନଥିଲା । ଆଉ ଏହାକୁ ନେଇ ବର୍ଷିଥିଲେ ବିଜେଡି ବିଧାୟକ ରାଜେନ୍ଦ୍ର ସାହୁ ଏବଂ କିଶୋର ମହାନ୍ତି ।
ଠିକ୍ ଅନୁରୂପ ଭାବରେ ଧାନର ମାନକୁ ନେଇ ନରସିଂହ ମିଶ୍ର ଉଠାଇଥିବା ପ୍ରଶ୍ନର ସନ୍ତୋଷ ଜନକ ଉତର ମିଳିନଥିବା ଅଭିଯୋଗ ହୋଇଛି । ଏପଟେ ଶୂନ୍ୟକାଳରେ ବରିଷ୍ଠ ବିଧାୟକ ଅମର ଶତପଥୀ ଆଇନ, ଉଚ୍ଚଶିକ୍ଷା ଓ ଗଣଶିକ୍ଷା ବିଭାଗରେ ଦୀର୍ଘଦିନ ଧରି ପଡ଼ି ରହିଥିବା ମାମଲା ପ୍ରତି ବିଭାଗର ବିମୁଖତା ନେଇ ବର୍ଷିଥିଲେ । ଆଉ ପୁରା ପ୍ରସଙ୍ଗରେ ବିରୋଧୀ କହିଛନ୍ତି ବାଚସ୍ପତିଙ୍କ ରୁଲିଂକୁ ଅବମାନନା କରୁଛନ୍ତି ମନ୍ତ୍ରୀ ।