ପାଦ ଥମିଗଲା, ଜୀବନ ଚାଲିଗଲା… ଜୀବନ ପାଇଁ ଘରକୁ ଫେରିଲା ବେଳେ ମଝି ରାସ୍ତାରେ ମାଡି ବସିଲା ମୃତ୍ୟୁ । ବଞ୍ଚିଥିବା ବେଳେ ଗାଡି ମିଳିଲାନି, ମଲା ପରେ ମିଳିଲା ଆମ୍ବୁଲାନ୍ସ । ଶ୍ରମିକ ବୋଲି ଶବ ନେବାକୁ ଆମ୍ବୁଲାନ୍ସ ଭଡା ୮ ହଜାର…

3,297

କନକ ବ୍ୟୁରୋ: ସରିଲାନି ରାସ୍ତା, ଚାଲିଗଲା ଜୀବନ । ଘରକୁ ଫେରୁ ଫେରୁ ଆଖି ବୁଜିଦେଲା ଶ୍ରମିକ । ବଞ୍ଚିଥିବା ବେଳେ ଗାଡି ମିଳିଲାନି, ମଲା ପରେ ଆସିଲା ଆମ୍ବୁଲାନ୍ସ । ବିଧାତାର ବିଚିତ୍ର ଖେଳ ନା ବ୍ୟବସ୍ଥାର ଦୋଷ? ସେ ଶ୍ରମିକ ବୋଲି ମଲାପରେ ବଢ଼ିଲା ମୂଲ । ବଞ୍ଚିଥିବା ବେଳେ ଗାଡ଼ି ଆସିଲାନି କିନ୍ତୁ ମୃତ୍ୟୁ ପରେ ଶବକୁ ନେବାକୁ ମିଳିଗଲା ଆମ୍ବୁଲାନ୍ସ । ତାହା ପୁଣି ମାଗଣାରେ ନୁହେଁ ଶ୍ରମିକର ଶବ ବୋଲି ୮ ହଜାର ଟଙ୍କାରୁ ଟଙ୍କେ କମ କଲାନି ଆମ୍ବୁଲାନ୍ସ । ଲକଡାଉନ ଭିତରେ ମାଲକାନଗିରିରୁ ଆସିଛି ଏମିତି ଏକ ଅଭାବନୀୟ ଘଟଣା । ଯାହା ସରକାରୀ ବ୍ୟବସ୍ଥା ଉପରେ ପ୍ରଶ୍ନର ପାହାଡ଼ ଛିଡ଼ା କରିଛି ।

ତାଲାବନ୍ଦରେ ହାଇଦ୍ରାବାଦରୁ ମାଲକାନଗିରି ଟାଙ୍ଗନିତଙ୍ଗକୁ ଚାଲିଚାଲି ଆସୁଥିଲେ ୨୨ ବର୍ଷୀୟ କସା ମାଡକାମୀ । କିନ୍ତୁ ବିଡ଼ମ୍ବନାର ବିଷୟ ହେଲା କି, ଘରେ ପହଚିଂବା ପୂର୍ବରୁ ଜୀବନ ଚାଲିଗଲା । ଆଉ ମୃତ୍ୟୁ ପରେ ଘରକୁ ଫେରିବାକୁ ଶବ ଦେଲା ୮ ହଜାର । ଏକ ଆମ୍ବୁଲାନ୍ସ ଭଡା କରି ୮ ହଜାର ଟଙ୍କାରେ ଶବକୁ ଗାଁକୁ ଫେରାଇ ଆଣିଥିଲେ ସାଥୀ ଶ୍ରମିକ । ବଞ୍ଚିଥିବାବେଳେ ଶ୍ରମିକଟି ଘରକୁ ଫେରିବା ପାଇଁ ଗାଡ଼ି ପାଇଲାନି କିନ୍ତୁ ସେ ମଲାପରେ ଶବ ପାଇଁ ଆମ୍ବୁଲାନ୍ସ ମିଳିଲା ଆଉ ଯାହାର ଦାମ୍ ଥିଲା ଝାଳଠୁ ଅଧିକ ।

ସେପଟ ଘରର ଏକ ମାତ୍ର ରୋଜଗାରିଆ ପୁଅକୁ ବଞ୍ଚିଥିବାବେଳେ ଦେଖିପାରିଲେନି ପରିବାର ଲୋକେ । ଆଉ ଭେଣ୍ଡିଆ ପୁଅର ଶବ ଆସିବା ପରେ ବାହୁନି ବାହୁନି କାନ୍ଦୁଛନ୍ତି ପୂରା ପରିବାର । କାରଣ ସେ ହିଁ ଥିଲା ଘରର ମେରୁଦଣ୍ଡ । କେବଳ ପରିବାର ଲୋକ ନୁହେଁ ପୂରା ଗାଁରେ ଶୋକାକୁଳ ପରିବେଶ ।

ତେବେ ଶ୍ରମିକଙ୍କ ମୃତ୍ୟୁ ପରେ ଘଟଣାକୁ ନେଇ କେନ୍ଦ୍ର ଓ ରାଜ୍ୟ ସରକାରଙ୍କ ଘର ବାହୁଡ଼ା ନୀତି ଉପରେ ଉଠିଛି ଅନେକ ପ୍ରଶ୍ନ? କାହା ପାଇଁ ଏତେ ସବୁ ଯୋଜନା? ଏତେ ସବୁ ନୀତି ନିୟମ ? ଜଣେ ଶ୍ରମିକ ଯଦି ବଞ୍ଚି ଥାଉ ଥାଉ ତା’ର ଜୀବନର ମୂଲ୍ୟ ନାହିଁ, ଆଉ ମଲାପରେ ତା ଶବର ଦାମକୁ ନେଇ ମୂଲଚାଲ ହେଉଛି ସେଠି ସରକାରଙ୍କ ବଡ଼ ବଡ଼ ଘୋଷଣା ଫମ୍ପା ମାଠିଆର ଶବ୍ଦ ନୁହେଁ ତ?

Comments are closed.