କରୋନା ସଂକ୍ରମଣ ଭିତରେ ସ୍କୁଲ ଖୋଲିବା ସମ୍ଭାବନା କ୍ଷୀଣ: ସରକାରୀ ସ୍କୁଲ ଛାତ୍ରଛାତ୍ରୀଙ୍କ ପାଇଁ ଅଗଷ୍ଟ ୩୧ ଯାଏଁ ମଧ୍ୟାହ୍ନ ଭୋଜନ ଯୋଗାଇବାକୁ ନିଷ୍ପତି; ସ୍କୁଲରେ ମିଳିବ ଚାଉଳ, ଆକାଉଂଟକୁ ଯିବ ଅର୍ଥ
ଦ୍ୱିତୀୟ ପର୍ଯ୍ୟାୟରେ ୫୭ ଦିନର ମିଳିବ ସହାୟତା
କନକ ବ୍ୟୁରୋ: ରାଜ୍ୟରେ କରୋନାର ପ୍ରଦୁର୍ଭାବ ବଢି ବଢି ଚାଲିଛି । ନିକଟ ଭବିଷ୍ୟତରେ ସ୍କୁଲ ଖୋଲିବାର ସମ୍ଭାବନା ମଧ୍ୟ କମ୍ । ଏହାକୁ ଦୃଷ୍ଟିରେ ରଖି ରାଜ୍ୟ ସ୍କୁଲ ଓ ଗଣଶିକ୍ଷା ବିଭାଗ ସରକାରୀ ସ୍କୁଲରେ ପଢୁଥିବା ଛାତ୍ର ଛାତ୍ରୀଙ୍କୁ ଅଗଷ୍ଟ ୩୧ ତାରିଖ ପର୍ଯ୍ୟନ୍ତ ମଧ୍ୟାହ୍ନ ଭୋଜନ ବାଂଟିବାକୁ ନିଷ୍ପତି ନେଇଛି । ପ୍ରଥମ ପର୍ଯ୍ୟାୟରେ ମାର୍ଚ୍ଚ ୧୭ରୁ ଜୁନ୍ ୧୩ ପର୍ଯ୍ୟନ୍ତ ମଧ୍ୟାହ୍ନ ଭୋଜନ ବାବଦରେ ଚାଉଳ ଓ ରୋଷେଇ ଖର୍ଚ୍ଚ ଦିଆଯାଇଥିଲା । ଏବେ ଜୁନ୍ ୧୪ରୁ ପିଛିଲା ଭାବେ ଦ୍ୱିତୀୟ ପର୍ଯ୍ୟାୟରେ ମଧ୍ୟାହ୍ନ ଭୋଜନ ଚାଉଳ ଓ ରୋଷେଇ ବାବଦ ଖର୍ଚ୍ଚ ଦିଆଯିବ । ତେବେ ଏହି ବାଂଟିବାରେ କୋଭିଡ ନିୟମକୁ ପାଳନକରିବାକୁ ନିର୍ଦ୍ଦେଶ ଦିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
ସେଭଳି ଜୁନ୍ ୧୪ରୁ ଅଗଷ୍ଟ ୩୧ ପର୍ଯ୍ୟନ୍ତ ୫୭ ଦିନର ମଧ୍ୟାହ୍ନଭୋଜନ ଚାଉଳ ସ୍କୁଲ ପରିଚାଳନା କମିଟି(ଏସ୍ଏମ୍ସି)ର ସଦସ୍ୟଙ୍କ ଉପସ୍ଥିତିରେ ପ୍ରଧାନ ଶିକ୍ଷକମାନେ ସ୍କୁଲ ପଏଣ୍ଟରେ ବଣ୍ଟନ କରିବେ। ଯଦି ସ୍କୁଲରେ ୫୭ଦିନରୁ ଅଧିକ ଦିନ ଲାଗି ମଧ୍ୟାହ୍ନଭୋଜନ ଚାଉଳ ରହିଥିବ, ତେବେ ସିଆରସିସିମାନେ ଉକ୍ତ ଚାଉଳକୁ ନିକଟସ୍ଥ ସ୍କୁଲକୁ ପଠାଇପାରିବେ, ଯେଉଁଠାରେ ଚାଉଳ ଅଭାବ ରହିଥିବ। ଏହାପରେ ବି ଯଦି ଚାଉଳ ଅଭାବ ଦେଖାଯାଏ, ସେଭଳି ସ୍ଥିତିରେ ଅଭିଭାବକଙ୍କୁ କୁପନ୍ ବଣ୍ଟାଯିବ ଏବଂ ସେମାନେ ନିକଟସ୍ଥ ଇପିଏସ୍/ପିଡିଏସ୍ ଆଉଟ୍ଲେଟ୍ରୁ ଚାଉଳ ସଂଗ୍ରହ କରିପାରିବେ। ରୋଷେଇ ବାବଦ ଖର୍ଚ୍ଚ ସିଧାସଳଖ ପିଲା/ଅଭିଭାବକଙ୍କ ବ୍ୟାଙ୍କ ଆକାଉଣ୍ଟକୁ ପଠାଯିବ। ଯଦି ସ୍କୁଲରେ ହୋଇଥିବା ସଙ୍ଗରୋଧ କେନ୍ଦ୍ର/ଟିଏମ୍ସି/କୋଭିଡ୍ କେୟାର ହୋମ୍ ଖାଲି ହୋଇଯାଇଥିବ, ତେବେ ତାହାକୁ ଭଲ ଭାବେ ବିଶୋଧନ କରି ସେଠାରେ ମଧ୍ୟାହ୍ନଭୋଜନ ଚାଉଳ ବଣ୍ଟନ କରାଯାଇପାରିବ।
ସେହିପରି ଯେଉଁ ସ୍କୁଲ କ୍ୟାମ୍ପସ୍ରେ ସଙ୍ଗରୋଧ କେନ୍ଦ୍ର/ଟିଏମ୍ସି/କୋଭିଡ୍ କେୟାର ହୋମ୍ ହୋଇଥିବ, କିନ୍ତୁ ଚାଉଳ ଅଲଗା ଘରେ ରହୁଥିବ ଏବଂ ବାହାର କରି ଅଣାଯାଇପାରିବ, ତେବେ ସେଠାରୁ ଚାଉଳକୁ ନିକଟସ୍ଥ ବିଦ୍ୟାଳୟକୁ ନିଆଯାଇ ବଣ୍ଟନ କରାଯାଇ ପାରିବ। ଯେଉଁ ସ୍କୁଲ କ୍ୟାମ୍ପସରୁ ଚାଉଳ ବାହାରକୁ ଆଣିବା ସମ୍ଭବପର ହେବ ନାହିଁ, ସେ କ୍ଷେତ୍ରରେ ପ୍ରଧାନ ଶିକ୍ଷକମାନେ ଜିଲ୍ଲା ଶିକ୍ଷା ଅଧିକାରୀଙ୍କ ଜରିଆରେ ଜିଲ୍ଲାପାଳଙ୍କୁ ଜଣାଇବେ। ମଧ୍ୟାହ୍ନଭୋଜନ ଚାଉଳ ବଣ୍ଟନ ବେଳେ କୋଭିଡ୍-୧୯ ନିୟମ ଯଥା ମାସ୍କ ପିନ୍ଧିବା, ହ୍ୟାଣ୍ଡ ସାନିଟାଇଜେସନ୍, ସାମାଜିକ ଦୂରତା ନିୟମକୁ କଡ଼ାକଡ଼ି ପାଳନ କରି ବଣ୍ଟନ କରିବାକୁ ବିଦ୍ୟାଳୟ ଓ ଗଣଶିକ୍ଷା ବିଭାଗ ଅତିରିକ୍ତ ସଚିବ ରଘୁରାମ ଆର. ଆୟାର ଏମ୍ଡିଏମ୍ ରାଜ୍ୟ ନୋଡାଲ ଅଫିସରଙ୍କୁ କହିଛନ୍ତି।