ଶିକୁଳିରୁ ମୁକୁଳୁନି ଜୀବନ: ୩୦ ବର୍ଷ ହେବ ଅନ୍ଧାରରେ ଅଧା ଜୀବନ । ଗୋଟିଏ ଘରେ ରହିଛନ୍ତି, ରାତି-ଦିନ ଦେଖିନାହାନ୍ତି ରମାକାନ୍ତ
କନକ ବ୍ୟୁରୋ: ଝରକା ଏପାଖେ ଜୀବନ, ଝରକା ସେପାଖେ ଯନ୍ତ୍ରଣା । ଜୀବନ-ଯନ୍ତ୍ରଣା ମଝିରେ ଲୁହାର ଜଞ୍ଜିର । ଜୀବନ ଯନ୍ତ୍ରଣାକୁ ଦେଖି ଲୁହ ଗଡାଉଛି, ଯନ୍ତ୍ରଣା ଜୀବନକୁ ଚାହିଁ ଭାଗ୍ୟକୁ ନିନ୍ଦୁଛି । ଆଉ ନିଜ ଇଚ୍ଛା, ଅନିଚ୍ଛାକୁ ଅନ୍ଧାରରେ ଆହୁତି ଦେଇ ଦୀର୍ଘ ୩୦ ବର୍ଷ ହେବ ଏମିତି ଅଭିଶପ୍ତ ଜୀବନ ଜିଉଁଛନ୍ତି ଯାଜପୁରର ରମାକାନ୍ତ ବେହେରା ।
Kanak News is now on WhatsApp
Join and get latest news updates delivered to you via WhatsApp
ମାଆ ଗର୍ଭରେ ଦଶ ମାସ ଅନ୍ଧାରରେ ରହି ପ୍ରଥମ ଆଲୁଅ ଦେଖିଥିବା ରମାକାନ୍ତ ହୁଏତ କେବେ ଭାବି ନଥିବେ ତାଙ୍କୁ ପୁଣି ଅନ୍ଧାରକୁ ଫେରିଯିବାକୁ ପଡିବ । ସୂର୍ଯ୍ୟ, ଚନ୍ଦ୍ର ତାଙ୍କ ପାଇଁ ସ୍ୱପ୍ନ ପାଲଟିଯିବ । ଆଉ ବାହାର ଦୁନିଆ ଏକ ପ୍ରକାର ବନ୍ଦ ହୋଇଯିବ । ଅନ୍ଧାରରେ ବସି ହୁଏତ ଖୋଲା ଆକାଶ, ମୁକ୍ତ ପବନ ଆଉ ସୁନ୍ଦର ପୃଥିବୀକୁ ଝୁରି ହେଉଥିବେ ରମାକାନ୍ତ । ହେଲେ ହଜାରେ ଇଚ୍ଛା ଥିଲେ ବି ଉଡିବା ଆଗରୁ ତାଙ୍କୁ ଭିଡି ଧରୁଛି ହାତରେ ପଡିଥିବା ବେଡି ।
ତେବେ ଦଶରଥପୁର ବ୍ଲକ ଚମ୍ପେଇମାଳ ପଞ୍ଚାୟତ ଉଦୟପୁର ଗାଁର ରମାକାନ୍ତ ଯୁକ୍ତ ୨ ପଢିବା ସମୟରେ ମାନସିକ ସନ୍ତୁଳନ ହରାଇଥିଲେ । ପରିବାରର କୌଣସି ଲୋକଙ୍କୁ ଚିହ୍ନି ପାରୁନଥିଲେ । ଆଉ ସମସ୍ତଙ୍କୁ ଆକ୍ରମଣ କରିବା ସହ ଘରର ଜିନିଷପତ୍ର ଭଙ୍ଗାରୁଜା କରୁଥିଲେ । ତେଣୁ ବାଧ୍ୟ ହୋଇ ପରିବାର ଲୋକେ ତାଙ୍କୁ ଶିକୁଳିରେ ବାନ୍ଧି ଗୋଟିଏ ଘରେ ରଖିଥିଲେ । ସେବେଠାରୁ ୩୦ ବର୍ଷ ହେବ ଶିକୁଳି ବନ୍ଧା ଜୀବନ କାଟୁଛନ୍ତି ରମାକାନ୍ତ ।
ସେପଟେ ଆର୍ଥିକ ପରିସ୍ଥିତି ଭଲ ନଥିବାରୁ ରମାକାନ୍ତଙ୍କୁ ଚିକିତ୍ସା କରାଇ ନପାରି ଘରେ ପକାଇ ରଖିଛନ୍ତି ପରିବାର ଲୋକେ । ପ୍ରଶାସନକୁ ବାରମ୍ବାର ଗୋଡ ଭାଙ୍ଗି ନେହୁରା ହେବା ପରେ ବି ସାହାଯ୍ୟ ତ ଦୂରର କଥା ରମାକାନ୍ତଙ୍କୁ ଏଯାଏଁ ଭିନ୍ନକ୍ଷମ ପ୍ରମାଣପତ୍ରଟିଏ ବି ମିଳିନି । ତେବେ ବିଡିଓ ସିଡିଏମଓଙ୍କୁ ତାଙ୍କ ବାବଦରେ ଅବଗତ କରାଇବା ପରେ ବି କେହି କର୍ଣ୍ଣପାତ କରୁନଥିବା ଖୋଦ ବିଡିଓ କହିଛନ୍ତି ।
ତେବେ ୩୦ ବର୍ଷ ଅଲୋଡା ହୋଇ ପଡିଥିବା ରମାକାନ୍ତଙ୍କର କଣ ସମାଜରେ ବଞ୍ଚିବାର ଅଧିକାର ନାହିଁ ? ନା ସମସ୍ତଙ୍କ ପରି ଜୀବନ ଜିଇଁବାର ଇଚ୍ଛା ନାହିଁ ? ପୁଅକୁ ନେଇ ପରିବାର ହାତ ଟେକିଦେବା ପରେ ପୂରା ଭରସା ପ୍ରଶାସନ ଉପରେ ଥିଲା । ହେଲେ ପ୍ରଶାସନ ସବୁ ଜାଣି ବି ଅଣଦେଖା କରୁଛି ।
ଯେତେବେଳେ ଖୋଦ ମୁଖ୍ୟମନ୍ତ୍ରୀ ନବୀନ, ସରକାରୀ ଅଫିସର ଓ ନେତାମନ୍ତ୍ରୀଙ୍କୁ ସାଧାରଣ ଲୋକଙ୍କ ସବୁ ସମସ୍ୟା ବୁଝିବାକୁ ନିର୍ଦ୍ଦେଶ ଦେଉଛନ୍ତି ଠିକ ସେତିକି ବେଳେ ଅଭିଶପ୍ତ ଜୀବନ କାଟୁଥିବା ମଣିଷ ଉପରେ ସେମାନଙ୍କ ଆଖି କେମିତି ପଡୁନି ତାହା ଏକ ବଡ ପ୍ରଶ୍ନବାଚୀ ସୃଷ୍ଟି କରିଛି ?