ଆମେରିକା ରାଷ୍ଟ୍ରପତି ଟ୍ରମ୍ପଙ୍କୁ ଛାଡପତ୍ର ଦେଇପାରନ୍ତି ପତ୍ନୀ ମେଲାନିଆ : ହ୍ୱାଇଟ ହାଉସ ଛାଡିବା ମାତ୍ରେ ବିବାହ ବିଚ୍ଛେଦ ଆଶଙ୍କା
ପ୍ରଘଟ କଲେ ମେଲାନିଆଙ୍କ ପୂର୍ବତନ ସହଯୋଗୀ
କନକ ବ୍ୟୁରୋ : ରାଷ୍ଟ୍ରପତି ନିର୍ବାଚନରେ ହାରିଯାଇଛନ୍ତି ଡୋନାଲ୍ଡ ଟ୍ରମ୍ପ । ହେଲେ ଜୋ ବାଇଡେନଙ୍କ ବିଜୟ ପରେ ନିର୍ବାଚନରେ ଅନିୟମିତତା ଅଭିଯୋଗ ଆଣି ଫଳାଫଳକୁ ସ୍ୱିକାର କରିବାକୁ ରାଜି ନୁହନ୍ତି ଟ୍ରମ୍ପ । ଏହାରି ଭିତରେ ବିଦେଶୀ ଗଣମାଧ୍ୟମ ଡେଲି ମେଲରେ ପ୍ରକାଶ ପାଇଥିବା ରିପୋର୍ଟ ଅନୁସାରେ ଟ୍ରମ୍ପ କେବଳ ନିର୍ବାଚନ ହାରିନାହାନ୍ତି ବରଂ ପତ୍ନୀ ମେଲାନିଆ ଟ୍ରମ୍ପଙ୍କୁ ମଧ୍ୟ ହରାଇ ପାରନ୍ତି । ମେଲାନିଆଙ୍କ ପୂର୍ବତନ ସହଯୋଗୀ ଷ୍ଟିଫାନୀ ୱାକଅଫ କହିଛନ୍ତି ହ୍ୱାଇଟ ହାଉସରୁ ବାହାରିବା ମାତ୍ରେ ମେଲାନିଆ, ଡୋନାଲ୍ଡ ଟ୍ରମ୍ପଙ୍କୁ ଛାଡପତ୍ର ଦେବେ । ଏପରିକି ହ୍ୱାଇଟ ହାଉସରେ ଉଭୟଙ୍କ ପୃଥକ ପୃଥକ ବେଡରୁମ ଥିବା ମଧ୍ୟ ଏହି ପୂର୍ବ ସହଯୋଗୀ ଦାବି କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ତାଙ୍କର ଆଉ ଜଣେ ପୂର୍ବତନ ସହଯୋଗୀଙ୍କ କହିବା ଅନୁଯାୟୀ, ୨୦୧୬ରେ ଯେତେବେଳେ ଟ୍ରମ୍ପ ବିଜୟୀ ହୋଇଥିଲେ ସେହି ସମୟରେ କାନ୍ଦି ପକାଇଥିଲେ ମେଲାନିଆ କାରଣ ସେ ଭାବିନଥିଲେ ଯେ ଟ୍ରମ୍ପ ବିଜୟୀ ହେବେ । ଏବେ ଏହି ୧୫ବର୍ଷର ବିବାହ ଶେଷ ହୋଇଯାଇଛି । ଏପରିକି ମେଲାନିଆ ପ୍ରତିଟି ମୁହୁର୍ତକୁ ଗଣୁଛନ୍ତି କେତେବେଳେ ସେ ହ୍ୱାଇଟ ହାଉସ ଛାଡିବେ ଓ ଡୋନାଲ୍ଡ ଟ୍ରମ୍ପଙ୍କୁ ଛାଡପତ୍ର ଦେବେ । ଟ୍ରମ୍ପ ଦମ୍ପତିଙ୍କ ପୁଅ ବାରୋନ ନ୍ୟୁୟର୍କରେ ପାଠ ପଢା ଶେଷ କରିନଥିବାରୁ ମେଲାନିଆ ୱାସିଂଟନ ଯିବାକୁ ୬ମାସ ଅପେକ୍ଷା କରିଥିଲେ । ତେବେ ଷ୍ଟିଫାନୀ ୱାକଅଫ କହିଛନ୍ତି ଯେ, ବାରୋନଙ୍କୁ ଟ୍ରମ୍ପଙ୍କ ସମ୍ପତିରୁ ସମାନ ଅଂଶ ଦେବା ଲାଗି ମେଲାନିଆ ଏକ ବିବାହୋତର ଚୁକ୍ତି ପାଇଁ ମଧ୍ୟ କହିଥିଲେ ।
ଡୋନାଲ୍ଡ ଟ୍ରମ୍ପ ଓ ପତ୍ନୀ ମେଲାନିଆ ଟ୍ରମ୍ପ, ବିଶ୍ୱର ସବୁଠାରୁ ଶକ୍ତିଶାଳୀ ତଥା ଚର୍ଚ୍ଚିତ ଦମ୍ପତି ରହି ଆସିଛନ୍ତି । ଆଉ ଏମାନଙ୍କ ପ୍ରେମକାହାଣୀ ବି କୌଣସି ଚଳଚ୍ଚିତ୍ର କାହାଣୀ ଠାରୁ କମ୍ ନୁହେଁ । ୧୯୯୮ ମସିହା ନ୍ୟୁୟର୍କ ଟାଇମ୍ସ ସ୍କେ୍ୱୟାର ଠାରେ ଏକ ଫ୍ୟାଶନ ଶୋ’ ପାର୍ଟିରେ ଡୋନାଲ୍ଡ ଓ ମେଲାନିଆଙ୍କ ସାକ୍ଷାତ ହୋଇଥିଲା । ସେତେବେଳେ ଡୋନାଲ୍ଡ ଟ୍ରମ୍ପଙ୍କ ବୟସ ୫୨ ବର୍ଷ ଥିବାବେଳେ ମେଲାନିଆ ମାତ୍ର ୨୮ ବର୍ଷର ଜଣେ ମଡେଲ ଥିଲେ । ପ୍ରଥମ ଦେଖାରେ ଦୁହିଁଙ୍କ ଆଖି ମିଶିବା ସହ ମନ ବି ମିଶିଯାଇଥିଲା । ପ୍ରଥମ ଦେଖାର ଗୋଟିଏ ସପ୍ତାହ ପରେ ମେଲାନିଆ ନିଜ ଆଡୁ ପ୍ରଥମେ ଡୋନାଲ୍ଡ ଟ୍ରମ୍ପଙ୍କୁ କଲ କଲେ ଏବଂ ତାଙ୍କୁ ସାକ୍ଷାତ କରିବା ପାଇଁ କହିଲେ ।
ଏହାପରେ ଆରମ୍ଭ ହେଲା ଟ୍ରମ୍ପ-ମେଲାନିଆଙ୍କ ପ୍ରେମ କାହାଣୀ । ଯାହା ସେତେବେଳେ ଆମେରିକା ଗଣମାଧ୍ୟମରେ ବେଶ ଚହଳ ସୃଷ୍ଟି କରିଥିଲା । ବର୍ଷ ୨୦୦୦ ଯେତେବେଳେ ଟ୍ରମ୍ପ ରିଫର୍ମ ପାର୍ଟିରେ ଯୋଗଦେଇ ଦଳର ଜଣେ ପାର୍ଥୀ ଭାବେ ମନୋନୀତ ହୋଇଥିଲେ । ସେତେବେଳେ ସେ ଚାହିଁଲେ ମେଲାନିଆ ତାଙ୍କ ପାଖରେ ରୁହନ୍ତୁ । ୨୦୦୧ ମେଲାନିଆଙ୍କୁ ଗ୍ରିନ କାର୍ଡ ମିଳିବା ପରେ ସେ ଟ୍ରମ୍ପ ଟାୱାରକୁ ସ୍ଥାନାନ୍ତର ହୋଇଗଲେ । ୨୦୦୪ରେ ମେଲାନିଆଙ୍କୁ ବିବାହ ପାଇଁ ପ୍ରସ୍ତାବ ଦେଲେ ଟ୍ରମ୍ପ । ୧.୨ ମିଲିଅନ ଡଲାରର ହିରାର ମୁଦି ଦେଇ ବିବାହ ପାଇଁ ପ୍ରପୋଜ କରିଥିଲେ ଟ୍ରମ୍ପ । ଏହା ପରେ ଜାନୁୟାରୀ ୨୨, ୨୦୦୫ରେ ବିବାହ ବନ୍ଧନରେ ଆବଦ୍ଧ ହେଲେ ଡୋଲାଲ୍ଡ ଟ୍ରମ୍ପ ଓ ମେଲାନିଆ ।