ୟାସ୍ ପୂର୍ବାନୁମାନ ଓ ମୁକାବିଲା ରଣନୀତିରେ ମିଳିଲା ସଫଳତା : ଚର୍ଚ୍ଚାରେ ୩ ଓଡ଼ିଆ ଅଧିକାରୀ
କନକ ବ୍ୟୁରୋ : ଅତି ଭୀଷଣ ବାତ୍ୟା ଆକାରରେ ୟାସ, ଉତର ଓଡିଶା ଉପକୂଳ ଦେଇ ଚାଲିଯିବା ପରେ ଏବେ ୩ ଓଡିଆ ଅଧିକାରୀଙ୍କୁ ନେଇ ଚର୍ଚ୍ଚା । ବାତ୍ୟାକୁ ନେଇ ପୂର୍ବାନୁମାନଠାରୁ ଆରମ୍ଭ କରି ଏହାର ଗତିପଥ ଓ ପ୍ରଭାବ ସଂପର୍କରେ ବାରମ୍ବାର ସତର୍କ କରାଇ ଦେଇଥିଲା ଭାରତୀୟ ପାଣିପାଗ ବିଭାଗ । ଏହାର ମହାନିର୍ଦ୍ଦେଶକ ମୃତ୍ୟୁଞ୍ଜୟ ମହାପାତ୍ର, ୟାସର ଗତିବିଧିକୁ ଦିନରାତି ନିରୀକ୍ଷଣ କରିବା ସହ ଗଣମାଧ୍ୟମକୁ ଏହାର ଟିକିନିଖି ସୂଚନା ଦେଉଥିଲେ ।
Kanak News is now on WhatsApp
Join and get latest news updates delivered to you via WhatsApp
ସେହିପରି ଆଇଏମଡି ସାଇକ୍ଲୋନ ୱାର୍ଣ୍ଣିଂ ସେଂଟର ମୁଖ୍ୟ ଭାବେ କାର୍ଯ୍ୟରତ ଥିଲେ ଆଉ ଜଣେ ଓଡିଆ ଅଧିକାରୀ ରାଜେନ୍ଦ୍ର କୁମାର ଜେନାମଣି । ବିଭିନ୍ନ ବୈଜ୍ଞାନିକ ମଡେଲ ଆଧାରରେ ବାତ୍ୟାକୁ ନେଇ ପୂର୍ବାନୁମାନ ସହିତ ସମସ୍ତ ପ୍ରକ୍ରିୟାକୁ ତ୍ୱରାନ୍ୱିତ କରିବାରେ ବିଶେଷ ଅବଦାନ ରହିଛି ଏହି ଓଡିଆ ଅଧିକାରୀମାନଙ୍କର । ସାଇକ୍ଲୋନ ମ୍ୟାନ ଭାବେ ପରିଚିତ ମୃତ୍ୟୁଞ୍ଜୟ ମହାପାତ୍ର ଏବେ ଭାରତୀୟ ପାଣିପାଗ ବିଭାଗର ମହାନିର୍ଦ୍ଦେଶକ । କୁହାଯାଉଛି ମୃତ୍ୟୁଞ୍ଜୟ ମହାପାତ୍ର ଆଜିଯାଏଁ ପ୍ରାୟ ଦେଢଶହ ବାତ୍ୟାର ପୂର୍ବାନୁମାନ କରିସାରିଛନ୍ତି । ବିଗତବର୍ଷ ଗୁଡିକରେ ଫାଇଲିନ, ହୁଡହୁଡ, ତିତଲି, ଫନି, ବୁଲବୁଲ ଓ ଅମ୍ଫାନ ଭଳି ବାତ୍ୟାର ସଠିକ ଆକଳନ କରିଥିଲେ ।
ସେହିଭଳି ଆଉଜଣେ ଓଡିଆ ଅଧକାରୀ ହେଉଛନ୍ତି, ଏନଡିଆରଏଫର ମହାନିର୍ଦ୍ଦେଶକ ସତ୍ୟନାରାୟଣ ପ୍ରଧାନ । ବିଶେଷ କରି ବାତ୍ୟା ମୁକାବିଲା ପାଇଁ ଫୋର୍ସ ମୁତୟନ ରଣନୀତି ପ୍ରସ୍ତୁତ କରିବାରେ ତାଙ୍କର ଯୋଗଦାନ ରହିଛି । ବାତ୍ୟା ୟସର ମୁକାବିଲା ପାଇଁ ୫ଟି ରାଜ୍ୟ ଓ ଗୋଟିଏ କେନ୍ଦ୍ର ଶାସିତ ଅଂଚଳରେ ୧୧୫ ଏନଡିଆରଏଫ ଫୋର୍ସକୁ ମୁତୟନ କରାଯାଇଛି । ବାତ୍ୟା ପରବର୍ତୀ ରିଲିଫ ଓ ଉଦ୍ଧାର କାମରେ ନିୟୋଜିତ ହୋଇଛନ୍ତି ଏହିସବୁ ଫୋର୍ସ ।