ବିଶ୍ୱର ସବୁଠାରୁ ବଡ ପ୍ରତିମା ‘ ଷ୍ଟାଚ୍ୟୁ ଅଫ୍ ୟୁନିଟି’ କୁ ନିର୍ମାଣ କରିବାରେ ଥିଲା ଏହି ବ୍ୟକ୍ତିଙ୍କ ହାତ ! ଯାହାଙ୍କ କଳାକୃତିକୁ ଗୋଟିଏ ନଜରରେ ପସନ୍ଦ କରିଥିଲେ ପ୍ରଧାନମନ୍ତ୍ରୀ ।
ଆଜି ସମ୍ପୁର୍ଣ୍ଣ ଦେଶରେ ସର୍ଦ୍ଦାର ବଲ୍ଲଭଭାଇ ପଟେଲଙ୍କ ୧୩୭ ତମ ଜୟନ୍ତୀ ତଥା ରାଷ୍ଟ୍ରୀୟ ଏକତା ଦିବସ ପାଳନ କରାଯାଉଛି । ଦେଶର ପ୍ରଥମ ଗୃହମନ୍ତ୍ରୀ ଏବଂ ଲୌହପୁରୁଷ ସର୍ଦ୍ଦାର ବଲ୍ଲଭଭାଇ ପଟେଲଙ୍କ ସମ୍ମାନରେ ପ୍ରସ୍ତୁତ ହୋଇଥିବା ୧୮୨ ମିଟରର ବିଶାଳ ପ୍ରତିମୂର୍ତ୍ତି ‘ ଷ୍ଟାଚ୍ୟୁ ଅଫ୍ ୟୁନିଟି ’ ଦୁନିଆର ସବୁଠାରୁ ଉଚ୍ଚ ପ୍ରତିମା । କିନ୍ତୁ ଏହା ଭିତରେ ସବୁଠାରୁ ବଡ ପ୍ରଶ୍ନ ହେଉଛି ଦୁନିଆର ସବୁଠାରୁ ବଡ ମୂର୍ତ୍ତିକୁ ପ୍ରସ୍ତୁତ କରିଥିବା ବ୍ୟକ୍ତି ଜଣକ କିଏ?
Kanak News is now on WhatsApp
Join and get latest news updates delivered to you via WhatsApp
ବିଶ୍ୱର ସବୁଠାରୁ ବଡ ପ୍ରତିମା ପ୍ରସ୍ତୁତ କରିଛନ୍ତି ରାମ ବି ସୁତାର ।
ବିଶାଳକାୟ ମୂର୍ତ୍ତି ତିଆରି କରିବାରେ ପାରଙ୍ଗମ ୯୩ ବର୍ଷୀୟ ରାମ ବି ସୁତାର ବିଶ୍ୱର ସବୁଠାରୁ ଉଚ୍ଚ ମୂର୍ତ୍ତି ପ୍ରସ୍ତୁତ କରିଛନ୍ତି । ‘ ଷ୍ଟାଚ୍ୟୁ ଅଫ୍ ୟୁନିଟି ’ ର ନିର୍ମାଣ କରିଥିବା ଶିଳ୍ପକାର ରାମ ବି ସୁତାରଙ୍କୁ ଭାରତ ସରକାର ପଦ୍ମଶ୍ରୀ ଏବଂ ପଦ୍ମଭୂଷଣ ପଦରେ ସମ୍ମାନିତ କରିସାରିଛନ୍ତି । ଜେଜେ ସ୍କୁଲ ଅଫ୍ ଆର୍ଟସରୁ ପାଠପଢା ଶେଷ କରି ଆର୍କିୟୋଲୋଜିକାଲ୍ ସର୍ଭେ ଅଫ୍ ଇଣ୍ଡିଆ ସହ ମିଶି ସେ ପ୍ରଥମେ ଏଲୋରା ଗୁମ୍ଫାରୁ ନିଜ କାମ ଆରମ୍ଭ କରିଥିଲେ । ଏହାର କିଛି ବର୍ଷ ପରେ ସେ ମୂର୍ତ୍ତି ପ୍ରସ୍ତୁତ କରିବା ଆରମ୍ଭ କରିଦେଲେ ।
ମହାତ୍ମାଙ୍କ ପ୍ରେରଣାରେ ପ୍ରେରିତ ରାମ ବି ସୁତାର ।
ମହାତ୍ମା ଗାନ୍ଧୀଙ୍କ ମାର୍ଗରେ ପ୍ରେରିତ ରାମ ବି ସୁତାର । ତାଙ୍କ କହିବାନୁସାର ଗାନ୍ଧୀ ଯେତେବେଳେ ବିଦେଶୀ କପଡା ବର୍ଜନ କରିବା ପାଇଁ ଲୋକଙ୍କୁ କହୁଥିଲେ ସେତେବେଳେ ସେ ଧୁଲିଆ ଗାଁ କୁ ଆସିଥିଲେ । ସେଠାରେ ରାମ ବି ସୁତାର ତାଙ୍କୁ ଭେଟିଥିଲେ । ଗାନ୍ଧୀଙ୍କ ଦ୍ୱାରା ପ୍ରେରିତ ହୋଇ ସେ ନିଜ ଟୋପୀକୁ ମଧ୍ୟ ଜଳାଇ ଦେଇଥିଲେ । ଏହା ପରେ ଦିଲ୍ଲୀ ଆସି ମଧ୍ୟ ସେ ଗାନ୍ଧୀଙ୍କ ସହ ମିଶିଥିଲେ ଏବଂ ଗାନ୍ଧୀଙ୍କ ମାଧ୍ୟମରେ ସେ ଜବାହାରଲାଲ ନେହେରୁଙ୍କ ସହ ସାକ୍ଷାତକାର କରିଥିଲେ । ତାଙ୍କ କହିବାନୁସାର ଏବେ ପର୍ଯ୍ୟନ୍ତ ସେ ଅଧିକ ମୂର୍ତ୍ତି ଗାନ୍ଧୀଙ୍କର ପ୍ରସ୍ତୁତ କରିଛନ୍ତି । ତେବେ ମଉକା ମିଳିଲେ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ମୂର୍ତ୍ତି ମଧ୍ୟ ପ୍ରସ୍ତୁତ କରିବେ ।
ନିଜ କଳାକୃତି ମାଧ୍ୟମରେ ମୋଦିଙ୍କୁ ପ୍ରଭାବିତ କରିଥିଲେ ରାମ ବି ସୁତାର ।
ରାମ ବି ସୁତାର ଏବେ ପର୍ଯ୍ୟନ୍ତ କେତେ ମୂର୍ତ୍ତି ପ୍ରସ୍ତୁତ କରିସାରିଛନ୍ତି ଯେତେବେଳେ ପ୍ରଧାନମନ୍ତ୍ରୀଙ୍କୁ ଏହି ଖବର ମିଳିଲା ସେ ମୂର୍ତ୍ତିର ଏକ ନମୂନା ପ୍ରସ୍ତୁତ କରିବାକୁ କହିଥିଲେ । ରାମ ସୁତାର ସର୍ଦ୍ଦାର ବଲ୍ଲଭଭାଇ ପଟେଲଙ୍କ ଏକ ଛୋଟ ଆକାରର ମୂର୍ତ୍ତିକୁ ପ୍ରସ୍ତୁତ କରି ମୋଦିଙ୍କ ପାଖକୁ ପଠାଇଥିଲେ । ନିଜ କଳାରେ ପ୍ରଧାନମନ୍ତ୍ରୀଙ୍କୁ ପ୍ରଭାବିତ କରିଥିବା ଶିଳ୍ପୀ ଆଜି ବିଶ୍ୱର ସବୁଠାରୁ ବଡ ପ୍ରତିମୂର୍ତ୍ତି ତିଆରି କରିବାରେ ସଫଳ ହେଲେ । ଏହି ଯୋଜନାରେ ତାଙ୍କ ପୁଅ ମଧ୍ୟ ବାପାଙ୍କ ସାଥ୍ ଦେଲେ ।