ଏଣିକି ଆପଣଙ୍କ ଘରେ ଆଣି ଔଷଧ ଦେବ ଡ୍ରୋନ୍ । ଭାରତରେ ପ୍ରଥମ ଥର ପାଇଁ ଆରମ୍ଭ ହେଲା ଏହି ସ୍ୱତନ୍ତ୍ର ସେବା ।
କନକ ବ୍ୟୁରୋ : ଏଣିକି ଡ୍ରୋନ୍ ମାଧ୍ୟମରେ ଘରେ ପହଞ୍ଚିବ ଔଷଧ । ରାସ୍ତା ଜାମ ଥାଉ କିମ୍ବା ଔଷଧ ଆଣିବା ପାଇଁ ପାଖରେ କେହି ନଥାନ୍ତୁ, ଏଣିକି ମେଡ଼ିସିନ ପାଇଁ ଚିନ୍ତା କରିବାକୁ ପଡିବ ନାହିଁ । ମିଳିଥିବା ସୂଚନା ମୁତାବକ ଶନିବାର ଦିନ ତେଲେଙ୍ଗାନାରେ ‘ମେଡ଼ିସିନ ଫ୍ରମ ଦି ସ୍କାଏ’ ପ୍ରକଳ୍ପ ଆରମ୍ଭ କରାଯାଇଛି । ଏହି ସମୟରେ କେନ୍ଦ୍ର ବିମାନ ଚଳାଚଳ ମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆ ମଧ୍ୟ ଉପସ୍ଥିତ ଥିଲେ । ସିନ୍ଧିଆ କହିଛନ୍ତି ଯେ ଏହି ପ୍ରକଳ୍ପ ଅଧୀନରେ ଡ୍ରୋନ୍ ବ୍ୟବହାର କରି ଔଷଧ ଏବଂ ଟିକା ବିତରଣ କରାଯିବ । କେନ୍ଦ୍ର ମନ୍ତ୍ରୀ କହିଛନ୍ତି ଯେ ବର୍ତ୍ତମାନ ପାଇଲଟ ପ୍ରକଳ୍ପ ଭାବରେ ତେଲେଙ୍ଗାନାର ୧୬ଟି ଗ୍ରୀନ୍ ଜୋନରେ ଏହା ଆରମ୍ଭ ହୋଇଛି । ପରେ ତଥ୍ୟ ଆଧାରରେ ଏହା ସମଗ୍ର ଦେଶରେ ଆରମ୍ଭ ହେବ ।
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ର ମନ୍ତ୍ରୀ କହିଛନ୍ତି ଯେ ତେଲେଙ୍ଗାନାର ୧୬ଟି ଗ୍ରୀନ ଜୋନରେ ‘ମେଡ଼ିସିନ ଫ୍ରମ ଦି ସ୍କାଏ’ ପ୍ରକଳ୍ପ ଆରମ୍ଭ ହୋଇଛି । ଏହାର ତଥ୍ୟ ତିନି ମାସ ପରେ ବିଶ୍ଳେଷଣ କରାଯିବ । ଏହା ପରେ ବିମାନ ଚଳାଚଳ ମନ୍ତ୍ରାଳୟ, ସ୍ୱାସ୍ଥ୍ୟ ମନ୍ତ୍ରାଳୟ, ଆଇଟି ମନ୍ତ୍ରାଳୟ, ରାଜ୍ୟ ସରକାର ଏବଂ କେନ୍ଦ୍ର ସରକାର ମିଳିତ ଭାବେ ସମଗ୍ର ଦେଶ ପାଇଁ ଏକ ମଡେଲ ପ୍ରସ୍ତୁତ କରିବେ । ସିନ୍ଧିଆ କହିଛନ୍ତି ଯେ କେବଳ ତେଲେଙ୍ଗାନା ପାଇଁ ନୁହେଁ ସମଗ୍ର ଦେଶ ପାଇଁ ଆଜି ଏକ ଗର୍ବର ଦିନ । ଜ୍ୟୋତିରାଦିତ୍ୟ ସିନ୍ଧିଆ କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦୂରଦୃଷ୍ଟିସମ୍ପନ୍ନ ନେତୃତ୍ୱରେ ଡ୍ରୋନ୍ ନୀତି ପ୍ରସ୍ତୁତ ଏବଂ କାର୍ଯ୍ୟକାରୀ କରାଯାଇଛି ।
ସେ ଆହୁରି ମଧ୍ୟ କହିଛନ୍ତି ଯେ ଏକ ଇଣ୍ଟରାକ୍ଟିଭ୍ ଏରୋସ୍ପେସ୍ ମାନଚିତ୍ର ପ୍ରସ୍ତୁତ କରାଯାଉଛି । ଏହି ମାନଚିତ୍ର ଏବଂ ରାଜ୍ୟଗୁଡିକର ସାହାଯ୍ୟରେ ବିଭିନ୍ନ ଜୋନ୍ ଚିହ୍ନଟ କରାଯାଉଛି । ଏଠାରେ ଉଲ୍ଲେଖଯୋଗ୍ୟ ଯେ ବିଶ୍ୱ ଅର୍ଥନୈତିକ ଫୋରମ୍, ନୀତି ଆୟୋଗ ଏବଂ ହେଲଥନେଟ୍ ଗ୍ଲୋବାଲ୍ ମାଧ୍ୟମରେ ତେଲେଙ୍ଗାନାରେ ‘ମେଡ଼ିସିନ ଫ୍ରମ ଦି ସ୍କାଏ’ ପ୍ରକଳ୍ପ ଆରମ୍ଭ ହୋଇଛି । ତେଲେଙ୍ଗାନାର ବିକାରାବାଦ ଜିଲ୍ଲାର ଚିହ୍ନିତ ଏୟାରସ୍ପେସରେ ଡ୍ରୋନ୍ ମାଧ୍ୟମରେ ଟିକା ବିତରଣ କରାଯାଉଛି । ଏହି ସମୟରେ ତେଲେଙ୍ଗାନାର ଆଇଟି ଏବଂ ଶିଳ୍ପ ମନ୍ତ୍ରୀ ରାମା ରାଓ ମଧ୍ୟ ଉପସ୍ଥିତ ଥିଲେ । ସେ ହାଇଦ୍ରାବାଦର ବେଗୁମପେଟ ବିମାନବନ୍ଦରରେ ବିମାନ ଚଳାଚଳ ବିଶ୍ୱବିଦ୍ୟାଳୟ ପ୍ରତିଷ୍ଠା କରିବାକୁ କେନ୍ଦ୍ର ମନ୍ତ୍ରୀଙ୍କ ନିକଟରେ ଦାବି କରିଥିଲେ ।