ଦିଲ୍ଲୀରେ ଭୋଟର ଲିଷ୍ଟକୁ ନେଇ ରାଜନୀତି ସରଗରମ୍ । ତାଲିକାରୁ ନାଁ କଟିଯିବାକୁ ନେଇ ବିଜେପି, ଆପ୍ ମୁହାଁମୁହିଁ
ବ୍ୟୁରୋ ରିପୋର୍ଟ: ଦିଲ୍ଲୀ ନଗର ନିଗମର ୨୫୦ଟି ଆସନରେ ଆଜି ମତଦାନ ହୋଇଛି । ଏହା ମଧ୍ୟରେ ଭୋଟର୍ ତାଲିକାରୁ ଭୋଟରଙ୍କ ନାଁ କଟା ହୋଇଯାଇଥିବା ଅଭିଯୋଗକୁ ନେଇ ରାଜନୀତି ସରଗରମ ହୋଇଛି । ଗୋଟେପଟେ ପାଖାପାଖି ୧ ହଜାରରୁ ଅଧିକ ବିଜେପି ସମର୍ଥକଙ୍କ ନାଁ ଭୋଟର ଲିଷ୍ଟରୁ କଟିଯାଇଥିବା ସାଂସଦ ମନୋଜ ତିୱାରୀ ଅଭିଯୋଗ ଆଣିଥିବାବେଳେ ଆପ୍ ଓ କଂଗ୍ରେସର କିଛି ନେତା ଓ କର୍ମୀର୍ଙ୍କ ନାଁ ମଧ୍ୟ ତାଲିକାରେ ନଥିବା ମନୀଷ ସିସୋଦିଆ ଅଭିଯୋଗ କରିଛନ୍ତି । ଏହାକୁ ନେଇ ଉଭୟ ଦଳ ପରସ୍ପରକୁ ଦୋଷାରୋପ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏମସିଡି ନିର୍ବାଚନ ମଧ୍ୟରେ ବିଜେପି ସାଂସଦ ମନୋଜ ତିୱାରୀ ଅଭିଯୋଗ କରିଛନ୍ତି ଯେ, ‘ଭୋଟର ଲିଷ୍ଟରୁ ନାଁ କାଟିବା ଓ ଯୋଡିବା ଦିଲ୍ଲୀ ସରକାରଙ୍କ କାମ । ଯଦି ଦୁଇଟି ସ୍ଥାନରେ ଭୋଟରଙ୍କ ନାଁ ଥାଏ ତେବେ କୌଣସି ଗୋଟିଏ ସ୍ଥାନରୁ ତାଙ୍କ ନାଁ କଟାଯାଇପାରିବ । ଏଥିପାଇଁ ଭୋଟର ନିଜେ ଆବେଦନ କରିବା ଉଚିତ । ହେଲେ ଏଠି ଭୋଟରଙ୍କ ବିନା ଜାଣତରେ ସେମାନଙ୍କ ନାଁ କଟିଯାଇଛି । ବିଜେପିର ପାଖାପାଖି ୧ହଜାର ସମର୍ଥକଙ୍କ ନାଁ ଭୋଟର ତାଲିକାରୁ କଟିଯାଇଥିବା ଅଭିଯୋଗ କରି ଏଥିପାଇଁ ଆପ୍ ସରକାରଙ୍କୁ ଦାୟୀ କରିଛନ୍ତି ମନୋଜ ତିୱାରୀ ।
ଅନ୍ୟପଟେ ଆପ୍ ନେତା ତଥା ଦିଲ୍ଲୀର ଉପମୁଖ୍ୟମନ୍ତ୍ରୀ ମନୀଷ ସିସୋଦିଆ ମଧ୍ୟ ବିଜେପିକୁ ଟାର୍ଗେଟ କରିଛନ୍ତି । ଆମ ଆଦମୀ ପାର୍ଟିର କିଛି ନେତାଙ୍କ ନାଁ ବି ଭୋଟର ତାଲିକାରୁ କଟିଯାଇଛି । ଏ ଘଟଣାରେ ବଡ ଷଡଯନ୍ତ୍ର ଚାଲିଛି । ଏନେଇ ସେ ନିର୍ବାଚନ କମିଶନଙ୍କ ପାଖରେ ଅଭିଯୋଗ କରିବାକୁ କହିଛନ୍ତି ।