ଡହ ଡହ ଖରାରେ ସାଇକେଲରେ ଅଫିସ ଯାଉଛନ୍ତି ଓଏଏସ୍ ଅଫିସର । ଚର୍ଚ୍ଚାରେ ମୟୂରଭଞ୍ଜର ଡେପୁଟି କଲେକ୍ଟର ସୁଜୟ କୁମାର ପତି ।
କନକ ବ୍ୟୁରୋ: ବର୍ତମାନ ସମୟରେ ଉଚ୍ଚ ସ୍ତରୀୟ ସରକାରୀ ଅଫିସରମାନେ ବଡ ଏବଂ ଦାମୀ ଗାଡ଼ିରେ ଯିବା ଆସିବା କରିବା ପାଇଁ ପସନ୍ଦ କରନ୍ତି । ଏଥିପାଇଁ ପ୍ରାୟତଃ ସବୁ ଅଧିକାରୀମାନଙ୍କ ପାଇଁ ଦାମୀ ଗାଡି ସବୁ ନିଆଯାଇଥାଏ । ଯେତେ ବଡ ଅଫିସର ସେତେ ଦାମୀ ଗାଡ଼ି । ହେଲେ ଏଭଳି ସ୍ଥିତିରେ ମୟୂରଭଞ୍ଜ ଜିଲ୍ଲାର ଜଣେ ଓଏଏସ ଅଧିକାରୀ ନିଜ କର୍ମକ୍ଷେତ୍ରକୁ ସାଇକେଲ୍ ଯୋଗେ ଯିବା ଆସିବା କରୁଥିବାର ନଜର ଆସିଛି । ତାହା ବି ପୁଣି ବର୍ତମାନର ଡହ ଡହ ଖରା ବା ୪୦ ଡିଗ୍ରୀରୁ ଅଧିକ ତାପମାତ୍ରାରେ, ଯାହା ସମସ୍ତଙ୍କୁ ଚକିତ କରିଛି ।
Kanak News is now on WhatsApp
Join and get latest news updates delivered to you via WhatsApp
ଘରୁ ଅଫିସ ଆସିବା ହେଉ ବା ଅଫିସ ଗାଡି ନଥିବା ବେଳେ ହଠାତ୍ ଅନ୍ୟ କୌଣସି କାମରେ ବାହାରକୁ ଯିବା । ସାଇକେଲ୍ ଧରି ବାହାରି ପଡନ୍ତି ମୟୂରଭଞ୍ଜର ଡେପୁଟି କଲେକ୍ଟର ସୁଜୟ କୁମାର ପତି । ୨୦୧୧ ବ୍ୟାଚ୍ର ଓଏଏସ ଅଫିସର ସୁଜୟ ପତି ୨୦୧୮ର ମାର୍ଚ୍ଚରୁ ବାରିପଦାରେ ଜଣେ ଉତ୍ତମ ପ୍ରଶାସନିକ ଅଧିକାରୀ ଭାବେ କାମ କରୁଛନ୍ତି । ନିଜର କାର୍ଯ୍ୟ ଦକ୍ଷତା ବେଶ ପରିଚିତ ଏହି ଅଫିସର ଏବେ ଡହଡହ ଖରାରେ ସାଇକେସରେ ଅଫିସ ଆସି ଚର୍ଚ୍ଚାକୁ ଆସିଛନ୍ତି ।
ନିଜକୁ ଫିଟ୍ ରଖିବା ସହ ଅନ୍ୟମାନଙ୍କୁ ପ୍ରୋତ୍ସାହିତ କରିବା ପାଇଁ ସାଇକେଲିଂ ପସନ୍ଦ କରନ୍ତି ଏହି ଓଏଏସ ଅଫିସର । ସାଇକେଲ ଚଳାଇବା ଦ୍ୱାରା ନିଜକୁ ସୁସ୍ଥ ଓ ସୁନ୍ଦର ରଖିବା ସହ ଇନ୍ଧନ ବଂଚିବ ଓ ପରିବେଶ ପ୍ରଦ୍ୟୁଷଣ ବି କିଛି ମାତ୍ରାରେ ରୋକାଯାଇ ପାରିବ ବୋଲି କୁହନ୍ତି ଓଏଏସ ସୁଜୟ କୁମାର ପତି । ବାରିପଦାରେ ଏବେ ୪୦ ଡିଗ୍ରୀ ଉପରେ ପାରଦ ରହିଛି । ଆଉ ଏହି ଡହ ଡହ ଖରାରେ ଜଣେ ପ୍ରଶାସନିତ ଅଧିକାରୀ ସାଇକେଲରେ ଅଫିସ ଆସିବା ନିଶ୍ଚୟ ପ୍ରେରଣା ଦାୟୀ ।