କନକ ବ୍ୟୁରୋ : ବିଗ୍ବାସ ଲିଗରେ ଗର୍ଜିଲା ଗ୍ଲେନ ମ୍ୟାକ୍ସୱେଲଙ୍କ ବ୍ୟାଟ୍ । ବିସ୍ଫୋରକ ବ୍ୟାଟିଂ କରି ନୂଆ ନୂଆ ରେକର୍ଡ ନିଜ ନାଁରେ କରିଛନ୍ତି ମ୍ୟାକ୍ସୱେଲ । ବୁଧବାର ବିବିଏଲରେ ହୋବାର୍ଟ ହରିକେନ୍ସ ବିପକ୍ଷରେ ବିଧ୍ୱଂସୀ ଇନିଂସ ଖେଳିଛନ୍ତି ମ୍ୟାକ୍ସୱେଲ । ମାତ୍ର ୬୪ ବଲରୁ ୨୨ଟି ଚୌକା ଓ ୪ଟି ଛକା ବଳରେ ଦ୍ରୁତ ୧୫୪ ରନ କରିଥିଲେ ମ୍ୟାକ୍ସୱେଲ । ଆଉ ମ୍ୟାକ୍ସୱେଲଙ୍କ ଏହି ଇନିଂସ ବଳରେ ମେଲବର୍ଣ୍ଣ ଷ୍ଟାର୍ସ ୨ ୱିକେଟ ବିନିମୟରେ ୨୭୩ ରନ କରିବାକୁ ସକ୍ଷମ ହୋଇଥିଲା । ଏହାସହ ବିଗବାସ୍ ଇତିହାସରେ ସର୍ବୋଚ୍ଚ ଦଳୀୟ ସ୍କୋରର ରେକର୍ଡ ମଧ୍ୟ ନିଜ ନାଁରେ କରିଥିଲା ମେଲବର୍ଣ୍ଣ । ଏହାପୂର୍ବରୁ ଏହି ରେକର୍ଡ ସିଡନୀ ଥଣ୍ଡର ନାଁରେ ରହିଥିଲା । ସିଡନୀ ଥଣ୍ଡର ଗତ ବିଗବାସ୍ ଲିଗ୍ ସିଜିନରେ ୨୩୨ ରନ କରି ରେକର୍ଡ ହାସଲ କରିଥିଲା ।

Advertisment

ମ୍ୟାକ୍ସୱେଲ ମଧ୍ୟ ୧୫୪ ରନର ଇନିଂସ ଖେଳି ବିଗବାସ୍ ଲିଗରେ ନୂଆ ରେକର୍ଡ କରିଛନ୍ତି । ବିଗବାସ ଲିଗରେ ସର୍ବୋଚ୍ଚ ବ୍ୟକ୍ତିଗତ ସ୍କୋର ରେକର୍ଡ ମ୍ୟାକ୍ସୱେଲ ନିଜ ନାଁରେ କରିଛନ୍ତି । ଏହାପୂର୍ବରୁ ମେଲବର୍ଣ୍ଣ ଷ୍ଟାର୍ସ ଖେଳାଳୀ ମାର୍କସ ଷ୍ଟୋଇନିସ ୨୦୨୦ରେ ୭୯ ବଲରୁ ୧୪୭ ରନ କରିବା ସହ ନିଜ ନାଁରେ ରେକର୍ଡ କରିଥିଲେ  । କେବଳ ଏତିକି ନୁହେଁ ମ୍ୟାକ୍ସୱେଲ ନିଜର ଶତକ ମାତ୍ର ୪୧ ରନରେ ପୂରା କରିବା ସହ ବିବିଏଲ ଇତିହାସର ଦ୍ୱିତୀୟ ଦ୍ରୁତ ଶତକ ହାସଲକାରୀ ହୋଇଛନ୍ତି । ଏହାପୂର୍ବରୁ ଏହି ରେକର୍ଡ କ୍ରେଗ ସିମନ୍ସଙ୍କ ନାଁରେ ରହିଥିଲା । ସିମନ୍ସ ବିବିଏଲର ତୃତୀୟ ସିଜିନରେ ପର୍ଥ ସ୍କଚର୍ସ ପକ୍ଷରୁ ମାତ୍ର ୩୯ ବଲରେ ଶତକ ହାସଲ କରିଥିଲେ ।

ତେବେ ମ୍ୟାକ୍ସୱେଲଙ୍କ ଏଭଳି ବିଧ୍ୱଂସୀ ଇନିଂସ ଆରସିବି ପ୍ରଂଶସକଙ୍କୁ ବେଶ ଖୁସି କରିଛି  । କାରଣ ଚଳିତ ଆଇପିଏଲ ମହାନିଲାମୀ ପୂର୍ବରୁ ମ୍ୟାକ୍ସୱେଲଙ୍କ ରିଟେନ ରଖିଛି ଆରସିବି ।  ଏହାଛଡା ୨୦୨୧ ଆଇପିଏଲରେ ଆରସିବି ପାଇଁ ସର୍ବାଧିକ ସ୍କୋର ମଧ୍ୟ କରିଥିଲେ ମ୍ୟାକ୍ସୱେଲ । ତେଣୁ ମ୍ୟାକ୍ସୱେଲଙ୍କ ବିସ୍ଫୋରକ ବ୍ୟାଟିଂ ଆରସିବି ପାଇଁ ଶୁଭ ସଂକେତ ।