ସଙ୍କଟରେ ଶ୍ରୀଲଙ୍କା । ପେଟ୍ରୋଲ ଓ ଡିଜେଲ କିଣିବାକୁ ଟଙ୍କା ନାହିଁ, ଦେଶର ଅଧିକାଂଶ ପେଟ୍ରୋଲ ପମ୍ପରେ ପଡିଲାଣି ତାଲା ।
କନକ ବ୍ୟୁରୋ : ସଙ୍କଟରେ ସୁନାର ଲଙ୍କା କୁହାଯାଉଥିବା ଶ୍ରୀଲଙ୍କାର ଅର୍ଥବ୍ୟବସ୍ଥା । ଭାରତର ପଡୋଶୀ ଦେଶ ଶ୍ରୀଲଙ୍କାର ଅବସ୍ଥା ଏବେ ଅତି ଶୋଚନୀୟ । ଶ୍ରୀଲଙ୍କା ପାଖରେ ପର୍ଯ୍ୟାପ୍ତ ପରିମାଣରେ ବିଦେଶୀ ମୁଦ୍ରା ନାହିଁ ଯାହାଦ୍ୱାରା ଏବେ ପେଟ୍ରୋଲ ଓ ଡିଜେଲ କିଣିବାକୁ ମଧ୍ୟ ଶ୍ରୀଲଙ୍କା ପାଖରେ ଟଙ୍କା ନାହିଁ । ଏପରିକି ଅଧିକାଂଶ ପେଟ୍ରୋଲ ପମ୍ପରେ ଇନ୍ଧନ ଓ ପେଟ୍ରୋଲ ସମାପ୍ତ ହେବା କାରଣରୁ କ୍ୱଚିତ ଖୋଲାଥିବା ପେଟ୍ରୋଲ ପମ୍ପରେ ଲମ୍ବା ଲାଇନ ଲାଗିଥିବା ଦେଖିବାକୁ ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ଶ୍ରୀଲଙ୍କାର ଆର୍ଥିକ ସ୍ଥିତି ଏତେ ଶୋଚନୀୟ ହୋଇଛି ଯେ, ଇନ୍ଧନ ଟାଙ୍କି ମଧ୍ୟ ଭର୍ତ୍ତି କରିବାକୁ ପର୍ଯ୍ୟାପ୍ତ ପରିମାଣର ଆମେରିକୀୟ ଡଲାର ନାହିଁ । ଏପରିକି ସରକାରଙ୍କ ଦ୍ୱାରା ନିର୍ଦ୍ଧାରିତ କରାଯାଇଥିବା ଦରରେ ପେଟ୍ରୋଲ ଓ ଡିଜେଲ ବିକ୍ରି କାରଣରୁ ଶ୍ରୀଲଙ୍କାର ପେଟ୍ରୋଲିୟମ କମ୍ପାନି ସିପିସି ମଧ୍ୟ ଏହା ଭିତରେ ୪୧.୫ କୋଟି ଡଲାର କ୍ଷତି ସହିଲାଣି । ଶ୍ରୀଲଙ୍କା ମୁଖ୍ୟତଃ ପେଟ୍ରୋଲ ଓ ଇନ୍ଧନର ଆମଦାନୀ ଉପରେ ନିର୍ଭର କରିଥାଏ । କିନ୍ତୁ ଆର୍ଥିକ ଦୁର୍ବଳ କାରଣରୁ ଏବେ ଆବଶ୍ୟକୀୟ ପେଟ୍ରୋଲ ଓ ଇନ୍ଧନ କିଣି ପାରୁନାହିଁ ଶ୍ରୀଲଙ୍କା । ଯାହା ଦେଶରେ ଏକ ସଙ୍କଟଜନକ ସ୍ଥିତି ସୃଷ୍ଟି କରିଛି ।
ତେବେ ଏହି ସଙ୍କଟ ଦୂର କରିବାକୁ ଶ୍ରୀଲଙ୍କା ଏବେ ପେଟ୍ରୋଲ ଓ ଇନ୍ଧନ ଆମଦାନୀ ଉପରେ ସୀମା ଶୁଳ୍କ କମ କରିବାକୁ ନିଷ୍ପତ୍ତି ନେଇଛି । ଯାହାଦ୍ୱାରା ଜନତାଙ୍କୁ ଏହାର ଫାଇଦା ମିଳିପାରିବ । ଚଳିତମାସ ଭାରତୀୟ କମ୍ପାନି ଇଣ୍ଡିଆନ ଅଏଲ କର୍ପୋରେସନ ଠାରୁ ୪୦୦୦୦ ଟନ୍ ଡିଜେଲ ଓ ପେଟ୍ରୋଲ କିଣିଥିଲା ଶ୍ରୀଲଙ୍କା । ଯାହାଦ୍ୱାରା ନିଜ ଦେଶର ଆବଶ୍ୟକତାକୁ ପୂରଣ କରାଯାଇପାରିବ । ଏହାସହ ଭାରତ ତରଫରୁ ୯୧୫ ମିଲିୟନ ଡଲାରର ବିଦେଶୀ ମୁଦ୍ରାର ସହାୟତା ମଧ୍ୟ ଦିଆଯାଇଛି । ପର୍ଯ୍ୟଟନ କ୍ଷେତ୍ରରୁ ଶ୍ରୀଲଙ୍କା ଆବଶ୍ୟକୀୟ ବିଦେଶୀ ମୁଦ୍ରା ପାଇଥାଏ । କିନ୍ତୁ କରୋନା କାରଣରୁ ଦେଶର ପର୍ଯ୍ୟଟନ କ୍ଷେତ୍ର ସମ୍ପୂର୍ଣ୍ଣ ଧ୍ୱସ୍ତବିଧ୍ୱସ୍ତ ହୋଇଛି ।