ଡେରାସରେ ଚାଷୀଙ୍କ ଜମି ଦୁର୍ନୀତି ପ୍ରସଙ୍ଗ : ସାଂସଦ ଅପରାଜିତାଙ୍କ ନେତୃତ୍ୱରେ ସ୍ଥାନୀୟ ଲୋକ ସାମିଲ

କନକ ବ୍ୟୁରୋ : ଜମି ଦୁର୍ନୀତି ବିରୋଧରେ ଭୁବନେଶ୍ୱର ଉପକଣ୍ଠ ଡେରାସରେ ବିଶାଳ ଜନ ଆନ୍ଦୋଳନ । ସାଂସଦ ଅପରାଜିତା ଷଡ଼ଙ୍ଗୀଙ୍କ ନେତୃତ୍ୱରେ ଏକାଠି ହୋଇଛନ୍ତି ସ୍ଥାନୀୟ ଅଞ୍ଚଳର ହଜାର ହଜାର ଲୋକ । ଡେରାସ ଚାଷୀଙ୍କ ଜମି ଦୁର୍ନୀତି ପ୍ରସଙ୍ଗରେ ସାଂସଦ ଅପରାଜିତା ଷଡ଼ଙ୍ଗୀଙ୍କ ସମାବେଶରେ ଚାଷୀଙ୍କ ସହ ଆଲୋଚନା କରୁଛନ୍ତି । ରାଜ୍ୟ ସରକାରଙ୍କ ପ୍ରତ୍ୟକ୍ଷ ପ୍ରୋତ୍ସାହନରେ ଜମି ଦୁର୍ନୀତି ସହ ଡେରାସ କ୍ଷୁଦ୍ର ଜଳସେଚନ ପ୍ରକଳ୍ପର ପାଣି ଅବରୋଧ କରିଥିବା ଅଭିଯୋଗ ଆଣି ପୂର୍ବରୁ ରାଜ୍ୟ ସରକାରଙ୍କୁ ଘେରିଥିଲେ ଭୁବନେଶ୍ୱର ସାଂସଦ ।

ଜମି ଅବରୋଧ ନେଇ ଅଭିଯୋଗ କରିବା ପରେ ଅବରୋଧ ହଟାଇବା ପାଇଁ କୋଦାଳ ଧରିଥିଲେ ସାଂସଦ । ଶେଷରେ ନଡ଼ିଆ ଭାଙ୍ଗି ଉତ୍ସବ ପାଳନ କରିଥିଲେ । ଭୁବନେଶ୍ୱର ଉପକଣ୍ଠରେ ଏକର ଏକର ଜମି ଅବରୋଧ ହଟାଇବା ପାଇଁ କ୍ଷତିଗ୍ରସ୍ତଙ୍କ ସହ ମିଶି ଅଭିଯାନ ଚଳାଇଥିଲେ ସାଂସଦ ଅପରାଜିତା ଷଡ଼ଙ୍ଗୀ । ଭୁବନେଶ୍ୱର ଓ ଏହାର ଉପକଣ୍ଠରେ ୧୫୦ ଏକର ଜମି ହଡ଼ପ କରାଯାଉଥିବା ନେଇ ସଂଗୀନ ଅଭିଯୋଗ କରିଥିଲେ ।

ସ୍ଥାନୀୟ ଲୋକଙ୍କ ଠାରୁ ଅଭିଯୋଗ ପାଇବା ପରେ ଘଟଣାସ୍ଥଳକୁ ଯାଇଥିଲେ ଏବଂ ଅନୈତିକ ଅବରୋଧ ନେଇ ପ୍ରଭାବଶାଳୀ ମହିଳା ତଥା ଶିଳ୍ପପତି କିରୁଥିକା ପ୍ରଭାକରନଙ୍କୁ ସିଧା ଟାର୍ଗେଟ କରିଥିଲେ । ସରକାରଙ୍କୁ ବି କାଠଗଡ଼ାକୁ ଟାଣିଥିଲେ । ଜମି ଜବର ଦଖଲ ହଟାଇବା ନେଇ ମୁଖ୍ୟମନ୍ତ୍ରୀ, ଜିଲ୍ଲାପାଳ, ଜଳସେଚନ ବିଭାଗକୁ ଚିଠି ଲେଖିବା ସହ ବାରମ୍ବାର ରିମାଇଣ୍ଡର ପଠାଇ ସ୍ଥାନୀୟ ଲୋକଙ୍କ ଏହି ଲଢ଼େଇର ମଙ୍ଗ ଧରିଥିଲେ ଅପରାଜିତା । ଗୋଟିଏ ପଟେ ମାନହାନୀ ମାମଲା ପାଇଁ କିରୁଥିକା ପ୍ରଭାକରନଙ୍କ ନୋଟିସ୍, ଅନ୍ୟପଟେ ଅବରୋଧ ହଟାଇବା ପାଇଁ ସାଂସଦଙ୍କ ଜିଦ୍, ସାରା ରାଜ୍ୟରେ ଚର୍ଚ୍ଚା ସୃଷ୍ଟି କରିଥିଲା ।

ହାତରେ କୋଦାଳ ଧରି ଅବରୋଧ ଥିବା କେନାଲକୁ ଖୋଳିଥିଲେ ଅପରାଜିତା । ଡେରାସ ଡ୍ୟାମର କ୍ଷୁଦ୍ର ଜଳସେଚନ ପ୍ରକଳ୍ପର କେନାଲ, ୩ଶହ ଏକର ଚାଷ ଜମିରେ ପାଣି ଯୋଗାଉଥିଲା । କିନ୍ତୁ ୨ ବର୍ଷ ହେଲା କେନାଲ ଅବରୋଧ କରାଯାଇଥିବାରୁ ଜମିକୁ ପାଣି ଯାଉନଥିଲା । ଫଳରେ ଚାଷକାମ ବାଧାପ୍ରାପ୍ତ ହୋଇଥିବା ଅଭିଯୋଗ କରିଥିଲେ ଗିରିଙ୍ଗାପୁଟ ଗାଁ ଲୋକ । ଏହାପରେ ଆକ୍ସନ ମୋଡ୍କୁ ଆସିଥିଲା ଜଳ ସେଚନ ବିଭାଗ । ଦୁଇ ବର୍ଷର ସଂଘର୍ଷ ଓ ପରେ ଚାଷୀଙ୍କୁ ମିଳିଥିଲା ହକ୍ । କେନାଲରେ ଗତ ଦୁଇ ବର୍ଷ ହେବ ଥିବା ଅବରୋଧ ହଟିବା ପରେ ଚାଷୀଙ୍କ ମୁହଁରେ ହସ ଫୁଟିଥିଲା । ନଡିଆ ଭାଙ୍ଗି ବିଜୟ ଉତ୍ସବ ପାଳନ କରିଥିଲେ ଅପରାଜିତା ।