କଳାହାଣ୍ଡି ଭବାନୀପାଟଣା ପୌରାଂଚଳରେ ଆଜିଠୁ ୨ ଦିନ ସଟଡାଉନ୍: କରୋନା ସଂକ୍ରମଣକୁ ଦୃଷ୍ଟି ରଖି ଜିଲ୍ଲା ପ୍ରଶାସନର ପଦକ୍ଷେପ
ସେପଟେ ଅନୁଗୁଳରେ କୋଭିଡ ଆଇନ୍ ଉଲ୍ଲଂଘନକାରୀଙ୍କୁ ସତର୍କ ସୂଚନା: ଏସପି କହିଲେ, ନାକ ଓ ମୁହଁକୁ ମାସ୍କ ଘୋଡାଇ ନଥିଲେ ଦେବାକୁ ପଡିବ ଫାଇନ୍
କନକ ବ୍ୟୁରୋ: କଳାହାଣ୍ଡି ଜିଲ୍ଲାରେ ନୂଆ ୧୨ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ସେଥିମଧ୍ୟରୁ ଭବାନୀପାଟଣାର ୧୦ କରୋନା ଯୋଦ୍ଧା ଅଛନ୍ତି । ସେହିପରି ଅନ୍ୟ ଜଣେ ନର୍ଲା ରେଖପୁର ଅଂଚଳ ଓ ଜଣେ ବରଗଡ ଘରୋଇ ଡାକ୍ତରଖାନାରେ ଚିହ୍ନଟ ହୋଇଛନ୍ତି । ଭବାନୀପାଟଣା ପୌରପାଳିକା ଅଂଚଳରେ କରୋନା ସଂକ୍ରମଣ ବଢି ଚାଲିଥିବା ଦୃଷ୍ଟିରୁ ଶନିବାର ଓ ରବିବାର ମଧ୍ୟରାତ୍ର ପର୍ଯ୍ୟନ୍ତ ସ୍ଥାନୀୟ ଅଂଚଳକୁ ସଟଡାଉନ୍ ଘୋଷଣା କରିଛନ୍ତି ଜିଲ୍ଲାପାଳ ।
Kanak News is now on WhatsApp
Join and get latest news updates delivered to you via WhatsApp
ଏହି ସମୟରେ ଘର ଘର ବୁଲି ତଥ୍ୟ ସଂଗ୍ରହ ସହ କରୋନା ଆକ୍ରାନ୍ତ ଚିହ୍ନଟ କରାଯିବ ବୋଲି ସୂଚନା ମିଳିଛି । ତେବେ ଏହି ସମୟରେ ସମସ୍ତ ଦୋକାନବଜାର, ସ୍କୁଲ କଲେଜ ତଥା ଅନ୍ୟ ଜରୁରୀ ସେବାରୁ ବାହାରେ ଥିବା ଅନୁଷ୍ଠାନ ଓ କାର୍ଯ୍ୟାଳୟ ବନ୍ଦ ରହିବ । ମେଡିକାଲ ଷ୍ଟୋର ଖୋଲା ରହିବ ବୋଲି କୁହାଯାଇଛି । ଆଇନ୍ ଉଲ୍ଲଂଘନ କଲେ କଠୋର କାର୍ଯ୍ୟାନୁଷ୍ଠାନ ନିଆଯିବ ବୋଲି ଚେତାଇ ଦେଇଛନ୍ତି । ଏନେଇ ପୌରପାଳିକା ଅଂଚଳରେ ସ୍ଥାନୀୟ ପ୍ରଶାସନ ପକ୍ଷରୁ ଆଗରୁ ଘୋଷଣା ମଧ୍ୟ କରାଯାଇଛି ।
ସେପଟେ କାଡକଡି ଲାଗୁ ହେବ କରୋନା କଟକଣା । ନିୟମ ଉଲ୍ଲଂଘନ କଲେ ନିସ୍ତାର ନାହିଁ । ସମସ୍ତେ ସହଯୋଗ କଲେ କରୋନାଠାରୁ ଆମେ ଜିତି ପାରିବା । ଏଭଳି ଆହ୍ୱାନ ଦେଇଛନ୍ତି ଅନୁଗୁଳ ଏସପି ଜଗମୋହନ ମୀନା । ଏହା ସହ ସେ କହିଛନ୍ତି ମୁହଁ ଓ ନାକରୁ ତଳକୁ ଖସାଇ ମାସ୍କ ପିନ୍ଧିବା ବ୍ୟକ୍ତିଙ୍କ ବିରୋଧରେ ମଧ୍ୟ ଜରିମାନା ଆଦାୟ ହେବ । ତେବେ ମାସ୍କ ବ୍ୟବାହାର କରିନଥିବାରୁ ଜିଲ୍ଲାରେ ମୋଟ ୧୧ ହଜାର ୪୩୫ ଜଣଙ୍କଠାରୁ ୩୬ ଲକ୍ଷ ୨୦ ହଜାର ୨୦୦ ଟଙ୍କା ଜରିମାନା ଆଦାୟ ହୋଇଥିବା ସେ ସୂଚନା ଦେଇଛନ୍ତି । ସାମାଜିକ ଦୂରତା ରକ୍ଷା କରି ନଥିବା ଅଭିଯୋଗରେ ୧୨୪୧ ଜଣ ବ୍ୟକ୍ତିଙ୍କ ବିରୋଧରେ ୩୮୫ଟି ମାମଲା ରୁଜୁ ହୋଇଛି । ଏହା ସହ ୮୯ଟି ଦୋକାନ ସିଲ୍ କରାଯାଇଥିବା ବେଳେ ୫୧୩ ଗାଡି ଜବତ ହୋଇଛି ବୋଲି ଏସପି କହିଛନ୍ତି । ତେବେ ଜନସାଧାରଣ ସହଯୋଗ କରିବାକୁ ସେ ଅପିଲ କରିଛନ୍ତି ।