କନକ ବ୍ୟୁରୋ : ଟ୍ରେନ ଯାତ୍ରା ବେଳେ ମିଳିବ ମହିଳା ଯାତ୍ରୀଙ୍କୁ ସୁରକ୍ଷା । ମହିଳା ଯାତ୍ରୀଙ୍କୁ ସୁରକ୍ଷା ଦେବାକୁ ଦେଶର ସମସ୍ତ ଜୋନରେ ରେଳବାଇ ପକ୍ଷରୁ ‘ମେରି ସହେଲି’ ନାମକ ଏକ ପଦକ୍ଷେପର ଶୁଭାରମ୍ଭ କରାଯାଇଛି । ମହିଳା ଯାତ୍ରୀ ମାନେ କିଭଳି ସୁରକ୍ଷିତ ଭାବେ ଆରମ୍ଭରୁ ଗନ୍ତବ୍ୟ ସ୍ଥଳରେ ପହଂଚି ପାରିବେ ତାହା ଏହି ଅଭିଯାନର ଲକ୍ଷ୍ୟ ବୋଲି ରେଳମନ୍ତ୍ରଣାଳୟ କହିଛି । ୨୦୨୦ ସେପ୍ଟେମ୍ବର ମାସରେ ଦକ୍ଷିଣ ପୂର୍ବ ରେଳବାଇ ପକ୍ଷରୁ ଏହି ପାଇଲଟ୍ ପ୍ରକଳ୍ପ ପ୍ରଥମେ ଆରମ୍ଭ କରାଯାଇଥିଲା । ଏହି ପାଇଲଟ୍ ପ୍ରକଳ୍ପକୁ ମହିଳା ଯାତ୍ରୀଙ୍କ ତରଫରୁ ପ୍ରୋତ୍ସାହନ ମିଳିବା ପରେ ଏବେ ରେଳ ମନ୍ତ୍ରଣାଳୟ ପକ୍ଷରୁ ଏହାକୁ ଦେଶର ସମସ୍ତ ଜୋନ୍ କୁ ସଂପ୍ରସାରିତ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଟ୍ରେନରେ ମହିଳା ଯାତ୍ରୀ ମାନଙ୍କ ସୁରକ୍ଷାକୁ ଦୃଷ୍ଟିରେ ରଖି ରେଳବାଇ ସୁରକ୍ଷା ବାହିନୀ ପକ୍ଷରୁ ଏଭଳି ପଦକ୍ଷେପ ନିଆଯାଇଛି । ଟ୍ରେନରେ ଯାତ୍ରା ସମୟରେ ମହିଳା ମାନେ ବିଭିନ୍ନ ସମୟରେ ବିଭିନ୍ନ ଅସୁବିଧାରେ ସମ୍ମୁଖୀନ ହୋଇଥା’ନ୍ତି । ଯେମିତି କି ଚୋରୀ, ଅସଦାଚରଣ, ମହିଳାଙ୍କ ମାସିକ ଧର୍ମ ଇତ୍ୟାଦି । ଏହି ସବୁ ସମସ୍ୟାର ସମାଧାନ ସହ ମହିଳା ଯାତ୍ରୀ ମାନେ କିଭଳି ସୁରକ୍ଷିତ ଟ୍ରେନ ଯାତ୍ରା କରିପାରିବେ ତାହା ଉପରେ ‘ମେରି ସହେଲି’ କାମ କରିବ ।
ରେଳ ମନ୍ତ୍ରଣାଳୟ ପକ୍ଷରୁ କୁହାଯାଇଛି ଯେ ‘ମେରି ସହେଲି’ ଅଧିନରେ ଯାତାୟତ କରୁଥିବା ଟ୍ରେନ୍ ଗୁଡିକରୁ କୌଣସି ସମସ୍ୟା ଜନିତ ଫୋନ୍ କଲ ଆସିଲେ ତାହାକୁ ବରିଷ୍ଠ ଅଧିକାରୀ ସ୍ତରରେ ଯାଞ୍ଚ କରାଯିବ । ସୁରକ୍ଷା ସଂପର୍କିତ ଅଭିଯୋଗ ଗୁଡିକର ଫଇସଲା ଦିଗରେ ଆରପିଏଫ୍ ତ୍ୱିରିତ ପଦକ୍ଷେପ ଗ୍ରହଣ କରିବ । ଆରପିଏଫ୍ ମହିଳା ମାନଙ୍କର ସିଟ୍ ନମ୍ବର ସଂଗ୍ରହ କରି ଯାତ୍ରା ବେଳେ ପ୍ରତି ରେଳ ଷ୍ଟେସନକୁ ବିବରଣୀ ପ୍ରଦାନ କରିବ । ରେଳ ପ୍ଲାଟଫର୍ମରେ କାର୍ଯ୍ୟରତ ଆରପିଏଫ୍ କର୍ମଚାରୀମାନେ ରହଣି ଷ୍ଟେସନ ଗୁଡିକରେ ମହିଳାଯାତ୍ରୀ ଥିବା କୋଚ୍ ଓ ବର୍ଥର ଅନୁଧ୍ୟାନ କରିବେ ।