ସ୍ୱାଭିମାନ ଅଂଚଳରେ ମାଓ ସଂଗଠନକୁ ପୁଣି ଲାଗିଛି ଝଟକା । ମାଟି ତଳୁ ମାଓ ସାମଗ୍ରୀ ଜବତ । ଗୁରାସେତୁ, ମୁକୁଡିପାଲି, ବେଜିଂ ଅଂଚଳରେ ବହୁ ବିସ୍ଫୋରକ ଜବତ କଲେ ଯବାନ । ସେପଟେ ପୁଲିସକୁ ସହଯୋଗ କଲେ ଗ୍ରାମବାସୀଙ୍କୁ ମୃତ୍ୟୁଦଣ୍ଡର ଧମକ ଦେଲା ଲାଲବାହିନୀ

କନକ ବ୍ୟୁରୋ : ସ୍ୱାଭିମାନ ଅଂଚଳରେ ମାଓ ସଂଗଠନକୁ ପୁଣି ଲାଗିଛି ଝଟକା । ମାଟି ତଳୁ ଗଚ୍ଛିତ ମାଓ ସାମଗ୍ରୀ ଜବତ କରିଛନ୍ତି ଯବାନ । ଚିତ୍ରକୋଣ୍ଡ ବ୍ଲକ ସ୍ୱାଭିମାନ ଅଂଚଳର ଅନ୍ତର୍ଗତ ଗୁରାସେତୁ, ମୁକୁଡିପାଲି, ବେଜିଂ ଅଂଚଳ ମାଓବାଦୀମାନେ ମାଟି ତଳେ ପୋତି ରଖିଥିବା ବିସ୍ଫୋରକ ଜବତ କରିଛନ୍ତି ଯବାନ । ଗୋଟିଏ ବନ୍ଧୁକ, କ୍ଲେମର ମାଇନ୍, କୋଡେକ୍ସ ତାର ଓ ବିପୁଳ ପରିମାଣର ବିସ୍ଫୋରକ ଉଦ୍ଧାର ହୋଇଛି ।
ଗୁଇନ୍ଦା ସୂଚନା ଅନୁସାରେ ସ୍ୱାଭିମାନ ଅଂଚଳରେ ଓଡିଶା ପୁଲିସ, ଏସଓଜି ଓ ବିଏସଏଫ ଯବାନ ମାନେ ଛାନଭିନ୍ କରିଥିଲେ । ସେପଟେ ପୁଲିସକୁ ସହଯୋଗ ନକରିବା ପାଇଁ ଗ୍ରାମବାସୀଙ୍କ ଧମକ ଦେଇଛି ଲାଲ ସଂଗଠନ । ସ୍ୱାଭିମାନ ଅଂଚଳର ବିଭିନ୍ନ ସ୍ଥାନରେ ଚେତାବନୀପୂର୍ଣ୍ଣ ଚିଠି ଲଗାଇଛନ୍ତି ମାଓବାଦୀ ।

ଗୁମ୍ମା ଏରିଆ କମିଟିର ସେକ୍ରେଟାରୀ ମାଓ ନେତା ଅନିଲ ଜାରି କରିଥିବା ମାଓ ଲେଟର ସିନ୍ଧିବାଡି, ରାଦଲାବେଡ, ଜନ୍ତୁରାଇ, ଯୋଡାମ୍ବ ଅଂଚଳର ଅନେକ ସ୍ଥାନରେ ଲାଗିଛି । ଗ୍ରାମବାସୀ ପୁଲିସକୁ ସହାୟତା ନକରିବା ପାଇଁ ମାଓ ସଂଗଠନ ଧମକ ଦେଇଛି । ଯଦି କୌଣସି ଗ୍ରାମବାସୀ ପୁଲିସକୁ ସହାୟତା କରନ୍ତି ତେବେ ତାଙ୍କୁ ମୃତ୍ୟୁ ଦଣ୍ଡ ଦିଆଯିବ ବୋଲି ଧମକ ଦେଇଛି ଲାଲବାହିନୀ ।