କନକ ବ୍ୟୁରୋ : ଆସନ୍ତା ଡିସେମ୍ବର ୧୯ ତାରିଖରେ ଦୁବାଇରେ ହୋଇପାରେ ଆଇପିଏଲ ନିଲାମୀ । ତେବେ ଏହି ନିଲାମୀ ପୂର୍ବରୁ ଦଳ ଭିତରେ ଆରମ୍ଭ ହୋଇଛି ଟ୍ରେଡ । ନିଲାମୀ ପୂର୍ବରୁ ଅନେକ ଖେଳାଳୀଙ୍କୁ ରିଲିଜ କରିବେ ଫ୍ରାଞ୍ଚାଇଜ । ଯେଉଁ ତାଲିକାରେ ଅନେକ ଦାମୀ ଖେଳାଳୀ ମଧ୍ୟ ରହିଛନ୍ତି । ଗତ ସିଜିନରେ ଯେଉଁ ଖେଳାଳୀଙ୍କର ପ୍ରଦର୍ଶନ ସେତେଟା ପ୍ରଭାବୀ ନଥିଲା ସେମାନଙ୍କୁ ରିଲିଜ କରି ନୂଆ ମୁହଁକୁ ଦଳରେ ସାମିଲ କରିବାକୁ ଚାହୁଁଛନ୍ତି ଅନେକ ଫ୍ରାଞ୍ଚାଇଜ । ଏହାସହ ଚଳିତ ବିଶ୍ୱକପରେ ଦମଦାର ପ୍ରଦର୍ଶନ କରିଥିବା ଖେଳାଳୀଙ୍କ ଉପରେ ମଧ୍ୟ ନଜର ରଖିଛନ୍ତି ଫ୍ରାଞ୍ଚାଇଜ । ତେବେ ରିଲିଜ ହେବାକୁ ଥିବା ଖେଳାଳୀଙ୍କ ଭିତରେ ସବୁଠୁ ଦାମୀ ଖେଳାଳୀ ସାମ କୁରାନ ରହିଥିବା ନେଇ ଜାତୀୟ ଗଣମାଧ୍ୟମରେ ଖବର ପ୍ରକାଶ ପାଇଛି ।
Kanak News is now on WhatsApp
Join and get latest news updates delivered to you via WhatsApp
ଇଂଲଣ୍ଡର ଅଲରାଉଣ୍ଡର ସାମ କୁରାନଙ୍କୁ ୨୦୨୩ରେ ହୋଇଥିବା ମହାନିଲାମୀରେ ସର୍ବାଧିକ ଟଙ୍କା ଦେଇ ଦଳରେ ସାମିଲ କରିଥିଲା ପଞ୍ଜାବ କିଙ୍ଗସ । ୧୮.୫ କୋଟିରେ ପଞ୍ଜାବ କିଙ୍ଗସରେ ସାମିଲ ହୋଇଥିବା ସାମ କୁରାନଙ୍କର ପ୍ରଦର୍ଶନ ସେତେଟା ଉତ୍ସାହଜନକ ନଥିଲା । ୧୪ଟି ମ୍ୟାଚରୁ ସାମ କୁରାନ ୨୭୬ ରନ୍ କରିଥିବା ବେଳେ ୧୦ଟି ୱିକେଟ ହାତେଇଥିଲେ । ସାମ କୁରାନଙ୍କ ଏଭଳି ପ୍ରଦର୍ଶନ ଫ୍ରାଞ୍ଚାଇଜକୁ ନିରାଶ କରିଥିଲା । କାରଣ ୨୦୨୨ ଟି-୨୦ ବିଶ୍ୱକପ ପ୍ରଦର୍ଶନ ଆଧାରରେ ସାମ କୁରାନଙ୍କୁ ସର୍ବାଧିକ ଟଙ୍କା ଦେଇ ଦଳରେ ସାମିଲ କରିବାକୁ ପଛାଇ ନଥିଲା ପଞ୍ଜାବ କିଙ୍ଗସ । ତେଣୁ ଚଳିତ ନିଲାମୀ ପୂର୍ବରୁ ସାମ କୁରାନଙ୍କୁ ରିଲିଜ କରି ପୁଣିଥରେ କମ ଦାମରେ ଦଳରେ ସାମିଲ କରିପାରେ ପଞ୍ଜାବ ।
ସେହିଭଳି ଆରସିବି ପକ୍ଷରୁ ଖେଳୁଥିବା ହସରଙ୍ଗାଙ୍କୁ ମଧ୍ୟ ପୁଣିଥରେ ନିଲାମୀରେ ଦେଖିବାକୁ ମିଳିପାରେ । କାରଣ ଗତ ସିଜିନରେ ହସରଙ୍ଗାଙ୍କ ପ୍ରଦର୍ଶନ ସେତେଟା ପ୍ରଭାବୀ ନଥିବା ବେଳେ ଏବେ ଆହତ ସମସ୍ୟା କାରଣରୁ କ୍ରିକେଟ ମୈଦାନରୁ ଦୂରେଇ ରହିଛନ୍ତି । ତେଣୁ ତାଙ୍କୁ ଏତେ ଟଙ୍କାରେ ରିଟେନ ନ କରିବାକୁ ପ୍ରସ୍ତୁତ ହେଉଛି ଆରସିବି ମ୍ୟାନେଜମେଣ୍ଟ । ହସରଙ୍ଗାଙ୍କ ବ୍ୟତୀତ ହର୍ଷଲ ପଟେଲ, ଦିନେଶ କାର୍ତ୍ତିକଙ୍କୁ ମଧ୍ୟ ରିଲିଜ କରିପାରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର । ସାମ କୁରାନଙ୍କ ଭଳି ଇଂଲଣ୍ଡର ଷ୍ଟାର ଅଲରାଉଣ୍ଡର ବେନ୍ ଷ୍ଟୋକ୍ସଙ୍କୁ ମଧ୍ୟ ଚେନ୍ନାଇ ସୁପର କିଙ୍ଗସ ରିଲିଜ କରିପାରେ । ଗତ ସିଜିନରେ ଷ୍ଟୋକ୍ସ ଆଇପିଏଲରେ ସେଭଳି ଛାପ ଛାଡିବାରେ ସଫଳ ହୋଇନଥିଲେ । ଏପରିକି ଚଳିତ ବିଶ୍ୱକପରେ ମଧ୍ୟ ଷ୍ଟୋକ୍ସ ସେଭଳି ଆଖିଦୃଶିଆ ପ୍ରଦର୍ଶନ କରିବାରେ ବିଫଳ ହୋଇଛନ୍ତି । ଅଧିକାଂଶ ମ୍ୟାଚରେ ଷ୍ଟୋକ୍ସଙ୍କୁ ପ୍ୟାଭିଲିୟନରେ ଦେଖିବାକୁ ମିଳିଛି । ତେଣୁ ଷ୍ଟୋକ୍ସଙ୍କୁ ରିଲିଜ କରି ନୂଆ ଅଲରାଉଣ୍ଡର ସନ୍ଧାନରେ ଚେନ୍ନାଇ ରହିଥିବା ଜାତୀୟ ଗଣମାଧ୍ୟମରେ ଖବର ପ୍ରକାଶ ପାଇଛି ।
ଇଂଲଣ୍ଡର ଷ୍ଟାର ବୋଲର ଜୋଫ୍ରା ଆର୍ଚରଙ୍କୁ ମୁମ୍ବାଇ ଇଣ୍ଡିଆନ୍ସ ରିଲିଜ କରିବାର ଯଥେଷ୍ଟ ସମ୍ଭାବନା ରହିଛି । କାରଣ ଦୀର୍ଘଦିନ ହେବ ଅନ୍ତର୍ଜାତୀୟ କ୍ରିକେଟ ପଡିଆରୁ ଦୂରେଇ ରହିଛନ୍ତି ଆର୍ଚର । ତେଣୁ ତାଙ୍କ ବଦଳରେ ନୂଆ ଦ୍ରୁତ ବୋଲରଙ୍କ ସନ୍ଧାନରେ ରହିଛି ମୁମ୍ବାଇ ଇଣ୍ଡିଆନ୍ସ ।
ଅନେକ ଦାମୀ ଖେଳାଳୀଙ୍କୁ ଫ୍ରାଞ୍ଚାଇଜ ରିଲିଜ କରିବାକୁ ଥିବା ବେଳେ ବିଶ୍ୱକପ ଷ୍ଟାରଙ୍କୁ ଦଳରେ ସାମିଲ କରିବାକୁ ଏବେଠାରୁ ପ୍ରସ୍ତୁତ ହେଉଛନ୍ତି । ଯେଉଁମାନଙ୍କ ମଧ୍ୟରେ ନ୍ୟୁଜିଲାଣ୍ଡର ରଚିନ ରବୀନ୍ଦ୍ର ଓ ଡାରେଲ ମିଚେଲ, ଅଷ୍ଟ୍ରେଲିଆର ଟ୍ରାଭିସ ହେଡ, ମିଚେଲ ଷ୍ଟାର୍କ, ପାଟ କମିନ୍ସଙ୍କ ଭଳି ଖେଳାଳୀ ରହିଛନ୍ତି । ଯେଉଁମାନେ ଚଳିତ ବିଶ୍ୱକପରେ ପ୍ରଭାବୀ ପ୍ରଦର୍ଶନ କରିବାରେ ସଫଳ ହୋଇଛନ୍ତି ।