ଶବ୍ଦ ପ୍ରଦୂଷଣ ହେବନି ବୋଲି ବିନା ବାଜା, ବିନା ବାଣରେ ଗଲା ବରଯାତ୍ରୀ । ପରିବେଶ ସୁରକ୍ଷା ସହ ପରମ୍ପରାକୁ ବଞ୍ଚାଇ ରଖିଲେ ବର ।
କନକ ବ୍ୟୁରୋ: ନା ବାଜୁଥିଲା ବାଜା, ନା ଫୁଟୁଥିଲା ବାଣ । ବିନା ବାଜା, ବିନା ବାଣରେ ଆଗେଇ ଚାଲିଥିଲା ବରଯାତ୍ରୀ । ରାସ୍ତାରେ ଚାଲୁଥିଲେ ବର, ସାଙ୍ଗରେ ଥିଲେ ବରଯାତ୍ରୀ । ଶଙ୍ଖ, ହୁଳହୁଳି ଶବ୍ଦରେ ସମସ୍ତେ କନିଆଁ ଘର ଅଭିମୁଖେ ପାଦ ବଢାଉଥିଲେ । ତେବେ ଡିଜେ ଡ୍ୟାନସର ଜମାନାରେ, ବାଜାବାଣର ଯୁଗରେ ଏମିତି ବିବାହ ସମସ୍ତଙ୍କୁ ଆଶ୍ଚର୍ଯ୍ୟ କରିଥିବା ବେଳେ ଏ ନିଆରା ବାହାଘର ପଛରେ ରହିଛି ଏକ ମହତ ଉଦ୍ଦେଶ୍ୟ ।
Kanak News is now on WhatsApp
Join and get latest news updates delivered to you via WhatsApp
ଶବ୍ଦ ପ୍ରଦୂଷଣ ହେବନି ବୋଲି, ପରିବେଶ ସୁରକ୍ଷିତ ରହିବ ବୋଲି ନିଜ ବାହାଘରକୁ ଶୃଙ୍ଖଳିତ ଢଙ୍ଗରେ କରିଛନ୍ତି ବର । ଗାଡି ନୁହେଁ ବରଂ ପାଦରେ ଚାଲି ଚାଲି କନିଆଁ ଘରେ ପହଞ୍ଚିଛନ୍ତି । ସମାଜ ପ୍ରତି ଥିବା ଜଣେ ମଣିଷର କର୍ତ୍ତବ୍ୟ କରିବାକୁ ଯାଇ, ଯେତିକି ପାରିବେ ସେତିକି କରିଛନ୍ତି ନବ ବିବାହିତ ଜ୍ଞାନରଞ୍ଜନ ।
ତେବେ କେନ୍ଦ୍ରାପଡା ମାର୍ଶାଘାଈ ବ୍ଲକ ବନ୍ଧକଟା ଗ୍ରାମରେ ଦେଖିବାକୁ ମିଳିଛି ଏକ ନିଆରା ବାହାଘର । ଗାଁର କୈଳାଶ ଚନ୍ଦ୍ର ବେଉରାଙ୍କ ସାନପୁଅ ଜ୍ଞାନରଂଜନ ବେଉରା ନିଆରା ଢଙ୍ଗରେ ବିବାହ କରି ଅନ୍ୟ ପାଇଁ ସାଜିଛନ୍ତି ଉଦାହରଣ । ଜ୍ଞାନରଂଜନଙ୍କ ବିବାହ ମହାକାଳପଡା ଚଢେଇଗୁଆଁ ଗାଁର କନକପ୍ରଭାଙ୍କ ସହ ସ୍ଥିର ହୋଇଥିଲା । ପରିବେଶର ସୁରକ୍ଷା ପାଇଁ ପୁଅର ବାହାଘର ନିରାଡମ୍ବର ଭାବେ କରିବାକୁ ନିଷ୍ପତ୍ତି ହୋଇଥିଲା ଆଉ ପରେ ବିବାହ ପାଇଁ ବର ସହିତ ମାର୍କୁଣ୍ଡି ଏବଂ ବରଯାତ୍ରୀ ମଧ୍ୟ ଚାଲି ଚାଲି ପ୍ରୋସେସନରେ ବହାରିଥିଲେ ।
ଆଜିର ବ୍ୟୟ ବହୁଳ ବାହାଘରରେ ଅଯଥା ଖର୍ଚ୍ଚ ନକରି ସାଧାସିଧା ବାହାଘରରେ ବିଶ୍ୱାସ କରନ୍ତି ଜ୍ଞାନରଞ୍ଜନ ଆଉ ଶଙ୍ଖ, ହୁଳହୁଳି ସହ ପାଦରେ ଚାଲି ଚାଲି ୪ କିଲୋମିଟର ଗଲେ ବରଯାତ୍ରୀ । ଆଧୁନିକ ଯୁଗରେ ପରମ୍ପରା ମରି ମରି ଆସୁଥିବା ବେଳେ ନିଜ ସଂସ୍କୃତି ଓ ପରମମ୍ପରାକୁ ରକ୍ଷା କରିବା ସହ ପରିବେଶ ପାଇଁ ନେଇଥିବା ବଡ ନିଷ୍ପତ୍ତି ସମସ୍ତଙ୍କୁ ଖୁସି କରାଇଛି । ସବୁଠାରୁ ବଡ କଥା ହେଉଛି ବର ଯେଉଁ ଟଙ୍କାରେ ବାଜାବାଣ ଫୁଟାଇ ବରଯାତ୍ରୀ ନେଇଥାନ୍ତେ ସେହି ଟଙ୍କାକୁ ସେ ଗରିବଙ୍କ ମଧ୍ୟରେ ବାଣ୍ଟିଛନ୍ତି ।
ସତରେ ପରମ୍ପରା ସହ ପରିବେଶର ସୁରକ୍ଷା ଦାୟିତ୍ୱ ନେଇ ନିଜ ବାହାଘରକୁ ସଦା ସ୍ମରଣୀୟ ରଖିଥିବା ବର ଜ୍ଞାନରଞ୍ଜନଙ୍କ ଏ ମହତ ଉଦ୍ଦେଶ୍ୟ ପୁନଶ୍ଚ ପୃଥିବୀ ଗଢି ତୋଳିବାରେ ବଡ ଭୂମିକା ନିଭାଇବ । ଯେତେବେଳେ ଡିଜେ ମୁଜିକ, ରୋଶଣୀ ବାଣର କମ୍ପନରେ ପରିବେଶ ପ୍ରକମ୍ପିତ ହୁଏ, ଶବ୍ଦ ପ୍ରଦୂଷଣ ହୁଏ ତାହାକୁ ରୋକିବାକୁ ଏମିତି ନିଷ୍ପତ୍ତି ହିଁ ଆମ ସମାଜକୁ ସୁସ୍ଥ ରଖିପାରିବ । ପୁନଶ୍ଚ ପୃଥିବୀ ଗଢିବାରେ ସହାୟ ହେବ ।