ମାଗଣା ବିଜୁଳିକୁ ନେଇ ବିଜେଡିକୁ କାଉଣ୍ଟର କଲେ ମନମୋହନ । କହିଲେ ବିଜେପିର ସଂକଳ୍ପପତ୍ରକୁ ଠିକ୍ ଢଙ୍ଗରେ ପଢିନି ବିଜେଡି, ମୋଦୀ ଯାହା କୁହନ୍ତି ତାହା କରନ୍ତି ।
କନକ ବ୍ୟୁରୋ : ୩୦୦ ୟୁନିଟ୍ ପର୍ଯ୍ୟନ୍ତ ମାଗଣା ବିଜୁଳି ବିଲ୍ ନିର୍ବାଚନ ପ୍ରତିଶ୍ରୁତି ପ୍ରସଙ୍ଗ ଉଠାଇ ବିଜେପିକୁ ବିଜେଡି ଟାର୍ଗେଟ କରିଥିବା ବେଳେ ଏହାର ଜବାବ ରଖିଛି ବିଜେପି । ଦଳର ରାଜ୍ୟ ସଭାପତି ମନମୋହନ ସାମଲ କହିଛନ୍ତି, ବିଜେପିର ସଂକଳ୍ପପତ୍ରକୁ ବୋଧହୁଏ ଠିକ୍ ଢଙ୍ଗରେ ପଢିନି ବିଜେଡି । ମୋଦୀ ସରକାରଙ୍କ ତୃତୀୟ ପାଳିର ପ୍ରଥମ ବଜେଟର ଅଭିଭାଷଣ ଶେଷ ହୋଇଛି । ମାଗଣା ବିଜୁଳି ପାଇଁ ପ୍ରତ୍ୟେକ ବ୍ୟକ୍ତିଙ୍କୁ ୭୫ ହଜାର ଟଙ୍କାର ସୋଲାର ସିଷ୍ଟମ ଦିଆଯିବ । ସୋଲାର ସିଷ୍ଟମ ଦ୍ୱାରା ମାଗଣା ବିଜୁଳି ବ୍ୟବହାର କରିବା ପରେ ବଳକା ବିଜୁଳିକୁ ସରକାରଙ୍କୁ ବିକିପାରିବେ ହିତାଧିକାରୀ । କେନ୍ଦ୍ର ବଜେଟ ଆସିବା ପରେ ଏହି ଯୋଜନା ଆରମ୍ଭ ହେବ । ଲୋକେ ମାଗଣା ବିଜୁଳି ପାଇବା ସହ ଏହାକୁ ବିକିପାରିବେ । ମୋଦୀ ଯାହା କୁହନ୍ତି ତାହା କରନ୍ତି, ସମସ୍ତ ରାଜ୍ୟରେ ମାଗଣା ବିଜୁଳି ବ୍ୟବସ୍ଥା ଲାଗୁ କରାଯିବ ।
Kanak News is now on WhatsApp
Join and get latest news updates delivered to you via WhatsApp
ସେହିଭଳି ମୁଖ୍ୟମନ୍ତ୍ରୀଙ୍କ ଅଭିଯୋଗ ଶୁଣାଣିକୁ ନେଇ ବିଜେଡି ଯେଉଁ ବୟାନ ରଖିଛି ତାହାକୁ କାଉଣ୍ଟର କରିଛନ୍ତି ବିଜେପି ରାଜ୍ୟ ସଭାପତି ମନମୋହନ ସାମଲ । ବିଗତ ୨୪ ବର୍ଷ ଭିତରେ ସରକାର କେତେ ଥର ଅଭିଯୋଗ ଶୁଣିଛନ୍ତି ତାହାର ଯାଞ୍ଚ କରନ୍ତୁ । ବିଗତ ସରକାର ବିରୋଧରେ କହିବାର ମୋର ଅଭ୍ୟାସ ନାହିଁ । କିନ୍ତୁ ବିଜେପି ସରକାରରେ ମୁଖ୍ୟମନ୍ତ୍ରୀ ଦାୟିତ୍ୱ ନେବା କ୍ଷଣି ୪ଟି ପ୍ରସ୍ତାବ ଉପରେ ମୋହର ମାରିଛନ୍ତି । ଶ୍ରୀମନ୍ଦିରର ୪ ଦ୍ୱାର ଖୋଲିବା ନିଷ୍ପତ୍ତିକୁ ୬ ଘଣ୍ଟା ମଧ୍ୟରେ କାର୍ଯ୍ୟକାରୀ କରିବା ସହ ସୁଭଦ୍ରା ଯୋଜନାରେ ମହିଳାଙ୍କୁ ଭାଉଚର, ଧାନର ଏମଏସପି ମୂଲ୍ୟ ୩୧୦୦ କରିବାକୁ ନିଷ୍ପତ୍ତି ନେଇଛନ୍ତି ବିଜେପି ସରକାର । ଏହାସହ ମୁଖ୍ୟମନ୍ତ୍ରୀ ଆଜିଠାରୁ ଯେଉଁ ଅଭିଯୋଗ ଶୁଣାଣି ଆରମ୍ଭ କରିଛନ୍ତି ସେଥିପାଇଁ ଦଳ ତରଫରୁ ଧନ୍ୟବାଦ ଜଣାଇଛନ୍ତି ମନମୋହନ ।