ମିଶୁ ମିଶୁ ମିଳିଲା ମନ୍ମଥଙ୍କୁ ଟିକେଟ୍ । ମାତ୍ର ଅଢେଇ ଘଣ୍ଟାରେ ଟିକେଟ୍ ଉପହାର ଦେଇ ଭୁବନେଶ୍ୱର ଲୋକସଭା ପ୍ରାର୍ଥୀ କଲା ବିଜେଡି ।
କନକ ବ୍ୟୁରୋ: ଦିନ ପ୍ରାୟ ସାଢେ ୧୧ଟା ପାଖାପାଖି । ବିଶାଳ ସମାବେଶ କରି ନିଜ ସମର୍ଥକଙ୍କ ସହ ଶଙ୍ଖ ଭବନରେ ପହଞ୍ଚିଥିଲେ ସୁର ରାଉତରାୟଙ୍କ ସାନପୁଅ କ୍ୟାପଟେନ୍ ମନ୍ମଥ ରାଉତରାୟ । ବିଜେଡିରେ ମନ୍ମଥ ମିଶିବା ନେଇ ଆଗରୁ ଅନେକ ଚର୍ଚ୍ଚା ଆଲୋଚନା ଆଉ ସୁର-ମନ୍ମଥ ମଧ୍ୟରେ ରାଗ ଅଭିମାନର କଥା ଗଣମାଧ୍ୟମରେ ଚର୍ଚ୍ଚା ହୋଇଥିବା ବେଳେ ଶେଷରେ ଶତାଧିକ ସମର୍ଥକଙ୍କ ସହ ଶଙ୍ଖ ଫୁଙ୍କିଛନ୍ତି ସୁରଙ୍କ ସାନପୁଅ । ଆଉ ବିଜେଡିରେ ବିଧିବଦ୍ଧ ଭାବେ ସାମିଲ ହୋଇଛନ୍ତି କଂଗ୍ରେସର ବରିଷ୍ଠ ନେତା ସୁର ରାଉତରାୟଙ୍କ ପୁଅ ମନ୍ମଥ ରାଉତରାୟ ।
Kanak News is now on WhatsApp
Join and get latest news updates delivered to you via WhatsApp
ବିଜେଡିରେ ସାମିଲ ହୋଇ ମନ୍ମଥ ଟିକେ ଭାବବିହ୍ୱଳ ହେବା ସହ ବାପାଙ୍କ ଅନୁମତି ନେଇ ବିଜେଡିରେ ସାମିଲ ହୋଇଥିବା କହିଥିବା ବେଳେ ସୁର ମଧ୍ୟ ନିଜ ପ୍ରତିକ୍ରିୟାରେ ତାଙ୍କ ପୁଅକୁ ବିଜେଡିରେ ଉଚିତ ସମ୍ମାନ ମିଳୁ ବୋଲି ଆଶା ରଖିଥିଲେ । ଆଉ ସବୁଠାରୁ ବଡ କଥା ହେଉଛି, ମନ୍ମଥଙ୍କ ଯୋଗଦାନର ପ୍ରାୟ ଅଢେଇ ଘଣ୍ଟା ପରେ ହିଁ ମନ୍ମଥଙ୍କୁ ବଡ ଉପହାର ଦେଇଛି ବିଜେଡି । ଦିନ ୨ଟା ପରେ ପରେ ହିଁ ବିଜେଡି ନିଜର ପ୍ରାର୍ଥୀ ଘୋଷଣା କରିଥିଲା । ୨୦୨୪ ନିର୍ବାଚନ ପାଇଁ ୯ଟି ଲୋକସଭା ଆସନର ତାଲିକା ଘୋଷଣା ହୋଇଥିବା ବେଳେ ଭୁବନେଶ୍ୱର ଲୋକସଭା ଆସନ ପାଇଁ କ୍ୟାପଟେନ୍ ମନ୍ମଥ ରାଉତରାୟଙ୍କୁ ପ୍ରାର୍ଥୀ କରିଛି ବିଜେଡି ।
ଭୁବନେଶ୍ୱରରୁ ଅପରାଜିତାଙ୍କ ଉପରେ ବିଜେପି ପୁନଃଶ୍ଚ ଆସ୍ଥା ପ୍ରକଟ କରିଥିବା ବେଳେ ବିଜେଡିରୁ ତାଙ୍କୁ ଚେକ୍ ଦେବାକୁ ଶ୍ରୀମୟୀ ମିଶ୍ର ଲଢିପାରନ୍ତି ବୋଲି ଆକଳନ ଓ ଆଲୋଚନା ହେଉଥିବା ବେଳେ ସବୁ କଳ୍ପନା ଓ ଆକଳନକୁ ଭୁଲ ପ୍ରମାଣିତ କରି ସୁରଙ୍କ ପୁଅଙ୍କୁ ସରପ୍ରାଇଜ୍ କ୍ୟାଣ୍ଡିଡେଟ୍ କରିଛି ବିଜେଡି । ଆଉ ଏଥର ଭୁବନେଶ୍ୱର ଦେଖିବ ଆଇଏଏସ ବନାମ ପାଇଲଟ୍ ଲଢେଇ ।