ହାଇକୋର୍ଟଙ୍କ ଆଦେଶ ପରେ ମଣିପୁରରେ ବଢିଥିଲା ଜାତିଗତ ହିଂସା । ଏବେ କୋର୍ଟ ବଦଳାଇଲେ ନିଷ୍ପତ୍ତି

କନକ ବ୍ୟୁରୋ : ହଜାର ହାଜର ଲୋକ ବେଘର ହେଲେ, ୨୦୦ରୁ ଅଧିକ ଲୋକଙ୍କର ମୃତ୍ୟୁ ହେଲା । ରାଜ୍ୟ ଠାରୁ କେନ୍ଦ୍ର ସରକାର ପର୍ଯ୍ୟନ୍ତ ବଦନାମ ହେଲେ । ୧୦ ମାସ ଧରି ମଣିପୁରର ଜନଜୀବନ ଅସ୍ତବ୍ୟସ୍ତ ହେବା ପରେ ହାଇକୋର୍ଟ ତାର ଆଦେଶ ବଦଳାଇଲେ ।

ମଣିପୁର ହାଇକୋର୍ଟ ମୈତେଇ ସମୁଦାୟକୁ ଅନୁସୂଚିତ ଜନଜାତି ବର୍ଗରେ ସାମିଲ କରିବା ନେଇ ଦେଇଥିବା ଆଦେଶ ପ୍ରତ୍ୟାହାର କରିନେଇଛନ୍ତି । ଏନେଇ ହାଇକୋର୍ଟଙ୍କ ତରଫରୁ ୨୦୨୩ ମସିହାରେ ରାଜ୍ୟସରକାରଙ୍କୁ ମୈତେଇ ସଂପ୍ରଦାୟକୁ ଜନଜାତି ବର୍ଗରେ ସାମିଲ କରିବାକୁ ଆଦେଶ ଦେଇଥିଲେ । ଏହି ଆଦେଶ ପରେ ମଣିପୁରରେ ଜାତିଗତ ହିଂସା ଉଗ୍ରରୂପ ନେଇଥିଲା । ଏଥିରେ ସରକାରୀ ରିପୋର୍ଟ ମୁତାବକ ୨ଶହରୁ ଅଧିକ ନାଗରିକଙ୍କ ଜୀବନ ଯାଇଛି ।

ହାଇକୋର୍ଟଙ୍କ ଆଦେଶ ପରେ ମଣିପୁରରେ ଏହାକୁ ପ୍ରବଳ ବିରୋଧ କରାଯାଇଥିଲା । ଏହାପରେ ଜଣେ ଆବେଦନକାରୀ ଏହା ପରେ ସମୀକ୍ଷା ଆବେଦନ ଦାଖଲ କରିଥିଲେ । ଏହି ସମୀକ୍ଷା ଆବେଦନ ଉପରେ ଶୁଣାଣି କରି କୋର୍ଟ ନିଜୟ ନିଷ୍ପତ୍ତି ବଦଳାଇ ଦେଇଛନ୍ତି ।

ସୂଚନା ଥାଉ କି, ଗତବର୍ଷ ମାର୍ଚ୍ଚ ୨୭ ତାରିଖରେ ମଣିପୁର ହାଇକୋର୍ଟ ରାଜ୍ୟସରକାରଙ୍କୁ ନିର୍ଦ୍ଦେଶ ଦେଇଥିଲେ କି ମୈତେଇ ସମୁଦାୟକୁ ଜନଜାତି ବର୍ଗରେ ସାମିଲ କରିବା ନେଇ ବିଚାର କରାଯାଉ ।