ପଶ୍ଚିମ ଓଡିଶାରେ ମୁଣ୍ଡ ଟେକିଛି ମଣ୍ଡି ସମସ୍ୟା । ବିଭିନ୍ନ ଆଳ ଦେଖାଇ ଧାନ କିଣୁନାହାନ୍ତି ମିଲର । ଅମଳ ହୋଇଛି ଅଧିକ ଧାନ, କିଣିବାକୁ କମ୍ ଟାର୍ଗେଟ୍ ଦେଇଛି ଯୋଗାଣ ବିଭାଗ ।
କନକ ବ୍ୟୁରୋ : ପଶ୍ଚିମ ଓଡିଶାରେ ମୁଣ୍ଡ ଟେକିଛି ମଣ୍ଡି ସମସ୍ୟା । ମଣ୍ଡିରେ ଧାନ ବିକ୍ରିକୁ ନେଇ ଅସନ୍ତୋଷ ଜାହିର କରିଛନ୍ତି ଚାଷୀ । କଳାହାଣ୍ଡି ଜିଲ୍ଲାର ବିଭିନ୍ନ ମଣ୍ଡିରେ ପଡିରହିଛି ପ୍ରାୟ ଅଢେଇ ଲକ୍ଷ କ୍ୱିଂଟାଲ ଧାନ । ଧାନ କିଣା ଟାର୍ଗେଟ ରହିଛି ମାତ୍ର ୧ ଲକ୍ଷ କ୍ୱିଂଟାଲ । ଟାର୍ଗେଟ ବୃଦ୍ଧି ନ ହେଲେ ଜିଲ୍ଲାର ହଜାର ହଜାର ଚାଷୀ ଟୋକନ ପାଇ ବି ଧାନ ବିକ୍ରିରୁ ବଞ୍ଚିତ ହେବା ନେଇ ଆଶଙ୍କା କରାଯାଉଛି । ସମ୍ବଲପୁର ଭଳି କଳାହାଣ୍ଡି, ବୌଦ୍ଧ ଓ ଦେବଗଡ ଜିଲ୍ଲାରେ ମଧ୍ୟ ଖରିଫ ଧାନ ବିକ୍ରିକୁ ନେଇ ବିବାଦ ଦେଖିବାକୁ ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ରାଜ୍ୟ ସରକାର କଳାହାଣ୍ଡି ଜିଲ୍ଲାରେ ଧାନ କିଣା ଟାର୍ଗେଟ ନବଢାଇଲେ ଲକ୍ଷ ଲକ୍ଷ କ୍ୱିଂଟାଲ ଧାନକୁ ସରକାରୀ ଦରରେ ବିକ୍ରିରୁ ବଂଚିତ ହେବେ ଚାଷୀ । ଜିଲ୍ଲା ଯୋଗାଣ ବିଭାଗ ଓ ରାଜ୍ୟ ଯୋଗାଣ ନିଗମର ସମନ୍ୱୟ ଅଭାବ ଯୋଗୁଁ ଜିଲ୍ଲାରେ ପଂଜିକୃତ ଚାଷୀଙ୍କ ଠାରୁ ୫୮ ଲକ୍ଷ କ୍ୱିଂଟାଲ ଧାନ କିଣିବା ପାଇଁ ଟୋକନ ଦିଆଯାଇଥିବା ବେଳେ ଜିଲ୍ଲାରୁ ମାତ୍ର ୪୬ ଲକ୍ଷ କ୍ୱିଂଟାଲ ଧାନ କିଣିବାକୁ ଲକ୍ଷ୍ୟ ଧାର୍ଯ୍ୟ କରାଯାଇଛି ।
କଳାହାଣ୍ଡିରେ କ୍ରମାଗତ ଭାବେ ଜଳସେଚନ ବୃଦ୍ଧି ପାଉଥିବା ବେଳେ ଧାନ ଅମଳରେ, ରାଜ୍ୟର ଦ୍ୱିତୀୟ ଉତ୍ପାଦନକାରୀ ଜିଲ୍ଲାରୁ ପ୍ରଥମ ହେବାକୁ ଯାଉଛି । ଗତ ୧୪ରେ ଇନ୍ଦ୍ରାବତୀ ବୃହତ ଉଠା ଜଳସେଚନ ପ୍ରକଳ୍ପର ଲୋକାର୍ପଣ କରି ମୁଖ୍ୟମନ୍ତ୍ରୀ ଏହା କହିଥିଲେ । ଜଳସେଚନ ଯୋଗୁଁ ଅଧିକ ଧାନ ଅମଳ ହୋଇଥିଲେ ବି ବିକ୍ରି ଅବ୍ୟବସ୍ଥା ଯୋଗୁଁ ଚାଷୀ ସେହି ଚିରାଚରିତ ଅଭାବୀ ବିକ୍ରିର ସାମ୍ନା କରୁଛି ।
ପଶ୍ଚିମ ଓଡିଶାର ଆଉ ୨ଟି ଜିଲ୍ଲାରୁ ମଧ୍ୟ ସମାନ ଅଭିଯୋଗ ଆସିଛି । ବୌଦ୍ଧ ଜିଲ୍ଲାର ବିଭିନ୍ନ ମଣ୍ଡିରେ ଶହ ଶହ ବସ୍ତା ଧାନ ପଡି ରହିଥିବା ବେଳେ ବିଭିନ୍ନ ଆଳ ଦେଖାଇ ମିଲର କିଣୁନଥିବା ଅଭିଯୋଗ ହୋଇଛି । ସେପେଟ ଦେବଗଡ ଜିଲ୍ଲା ବାରକୋଟ୍ ବ୍ଲକର ସରୁଆଳି, ଗୋଳାବନ୍ଧ, ଗୁରସଙ୍ଗ ଓ ବଂପରଡା ପଂଚାୟତର ଚାଷୀଙ୍କ ସୁବିଧା ପାଇଁ ଗୁରସଙ୍ଗ ପ୍ୟାକ୍ସରେ ଧାନ କିଣା ବ୍ୟବସ୍ଥା ହୋଇଛି । କିନ୍ତୁ ଜାନୁୟାରୀ ୨ ତାରିଖରେ ଧାନ ବିକିବା ପାଇଁ ଟୋକନ ପାଇଥିବା ଚାଷୀଙ୍କ ଧାନ ଆଜି ଯାଏଁ ଉଠିନାହିଁ ।