ଥ୍ରୀଡି କ୍ୟାମେରାରେ ନିଆଗଲା ଫଟୋ, ମିଳିଲା ବାଡି । ଛାନଭିନ ପରେ ଦୟାଲ ଆଶ୍ରମ ସିଲ୍ କଲା କ୍ରାଇମବ୍ରାଞ୍ଚ ଟିମ୍ ।

କନକ ବ୍ୟୁରୋ : କ୍ୟାମେରାମ୍ୟାନ ମାନସ ସ୍ୱାଇଁ ହତ୍ୟାକାଣ୍ଡ ମାମଲାରେ ଭୁବନେଶ୍ୱରର ଦୟାଲ ଆଶ୍ରମରେ ଛାନଭିନ ପରେ ଏହାକୁ ସିଲ କରିଛି କ୍ରାଇମବ୍ରାଞ୍ଚ । କ୍ରାଇମବ୍ରାଞ୍ଚର ୫ ଜଣିଆ ଟିମ୍ ଆଶ୍ରମର ଲେଡିକେୟାରଟେକର, ଦିଲ୍ଲୀପ ଖଟେଇ ଓ ଆଶ୍ରମ ସହିତ ଜଡିତ ଲୋକଙ୍କୁ ପଚରାଉଚରା କରିଛନ୍ତି । ଫରେନସିକ୍ ଟିମ୍ ଓ ଡାକ୍ତରୀଦଳ ମଧ୍ୟ ତଦନ୍ତରେ ସାମିଲ ହୋଇଥିଲେ । ଥ୍ରୀଡି କ୍ୟାମେରାରେ ଆଶ୍ରମ ଭିତର ଓ ବାହାରର ଫଟୋ ନିଆଯାଇଛି । ଏଥିସହ ମହିଳା କେୟାର ଟେକରଙ୍କୁ କ୍ରାଇମବ୍ରାଞ୍ଚ ଟିମ ସାଙ୍ଗରେ ନେଇଥିବା ଜଣାପଡିଛି ।

ହତ୍ୟାକାଣ୍ଡରେ ବ୍ୟବହୃତ ହୋଇଥିବା ଏକ ବାଡିକୁ ମଧ୍ୟ ତଦନ୍ତକାରୀ ଟିମ୍ ସାଙ୍ଗରେ ନେଇଯାଇଛି । କାରଣ ଏହି ଆଶ୍ରମରେ କ୍ୟାମେରାମ୍ୟାନ ମାନସ ସ୍ୱାଇଁଙ୍କୁ ହତ୍ୟା କରାଯାଇଥିଲା । ୱେବ-ପୋର୍ଟାଲ ମାଲିକାଣି ଶର୍ମିଷ୍ଠା ରାଉତ ଓ ପୂର୍ବତନ ପ୍ରଶାସନିକ ଅଧିକାରୀ ନିରଞ୍ଜନ ସେଠୀ ମାନସଙ୍କୁ ଅପହରଣ କରିବା ପରେ ଏହି ଆଶ୍ରମରେ ହତ୍ୟା କରିଥିବା ପୁଲିସ କହିଥିଲା । ଏହି ମାମଲାରେ ନିରଞ୍ଜନଙ୍କ ସମେତ ୬ଜଣଙ୍କୁ ଗିରଫ କରାଯାଇଥିଲେ ବି ମୁଖ୍ୟ ଅଭିଯୁକ୍ତ ଶର୍ମିଷ୍ଠା ରାଉତ ଏବେ ବି ଫେରାର ଅଛନ୍ତି । ଦୀର୍ଘ ଦିନ ବିତିଯାଇଥିଲେ ବି ଶର୍ମିଷ୍ଠାଙ୍କୁ ଧରିବାରେ ବିଫଳ ହୋଇଛି ପୁଲିସ ।