ପତ୍ନୀଙ୍କ ମୃତଦେହକୁ ଟ୍ରଲିରେ ୫ କିଲୋମିଟର ବୋହିଲେ ସ୍ୱାମୀ : ନା ଆସିଲା ଆମ୍ବୁଲାନ୍ସ, ନା ମିଳିଲା ମହାପରାୟଣ ସେବା; ପାଖରେ ପଇସା ନାହିଁ ବୋଲି କେହି ଶୁଣିଲେନି ଗୁହାରି
କନକ ବ୍ୟୁରୋ : ଅନ୍ଧାର ରାତି, ଟ୍ରଲିରେ ପତ୍ନୀର ଶବ, ଆଉ ପତ୍ନୀଙ୍କ ମୃ୍ତଦେହକୁ ୫ କିଲୋମିଟର ଟ୍ରଲିରେ ବୋହିଲେ ସ୍ୱାମୀ । ନା ଆମ୍ବୁଲାନ୍ସ ଆସିଲା, ନା ମହାପରାୟଣ ସେବା କାମରେ ଲାଗିଲା । ସ୍ୱାସ୍ଥ୍ୟସେବାର ବିକଳ ଓ ଅଭାବନୀୟ ଚିତ୍ର ବାଲେଶ୍ୱର ଜିଲ୍ଲା ସୋର ଡାକ୍ତରଖାନାରୁ ।
Kanak News is now on WhatsApp
Join and get latest news updates delivered to you via WhatsApp
ସୋର ବ୍ଲକ ଦହିସଡ଼ା ପଂଚାୟତ ଛପୁଲିଆ ଗାଁର ଗୁରୁବା ସିଂଙ୍କ ସ୍ତ୍ରୀ ମମତାଙ୍କ ଦେହ ଅସୁସ୍ଥ ହୋଇପଡ଼ିବାରୁ ପରିବାର ଲୋକ ଶୁକ୍ରବାର ପୂର୍ବାହ୍ନରେ ସୋର ଡାକ୍ତରଖାନାକୁ ଆଣିଥିଲେ । ତେବେ ସେଠାରେ ଚିକିତ୍ସାଧୀନ ଅବସ୍ଥାରେ ମମତାଙ୍କର ସଂଧ୍ୟାରେ ମୃତ୍ୟୁ ହୋଇଯାଇଥିଲା । ପରେ ପରିବାର ଲୋକ ମୃତଦେହ ନେବାକୁ ଆମ୍ବୁଲାନ୍ସକୁ ଯୋଗାଯୋଗ କରିଥିଲେ, ହେଲେ ସେମାନେ ମୃତଦେହ ନେବେ ନାହିଁ ବୋଲି ଆମ୍ବୁଲାନ୍ସ କର୍ମଚାରୀ କହିଥିଲେ ।
ଏହାପରେ ଘରୋଇ ଆମ୍ବୁଲାନ୍ସକୁ ଯୋଗାଯୋଗ କରିଥିଲେ ଗୁରୁବା ସିଂ । ହେଲେ ଘରୋଇ ଆମ୍ବୁଲାନ୍ସ ୧୫୦୦ ଟଙ୍କା ଦେଲେ ହିଁ ଯାଇ ମୃତଦେହ ନେବେ ବୋଲି କହିଥିଲେ । ଗରିବ ଗୁରୁବାଙ୍କ ପାଖରେ ଏତେ ଟଙ୍କା ଦେବା ସମ୍ଭବ ନଥିଲା । ଶେଷରେ ନିଜ ମୃତ ପତ୍ନୀର ମୃତଦେହକୁ ଟ୍ରଲିରେ ପକାଇ ୫ କିଲୋମିଟର ବୋହିନେଇଥିଲେ । ଏଭଳି ଅଭାବନୀୟ ଘଟଣା ପୁରା ସ୍ଥାନୀୟ ଅଂଚଳରେ ଚର୍ଚ୍ଚାର କାରଣ ପାଲଟିଛି ।