ଅଢ଼େଇ ଲକ୍ଷ ଟଙ୍କାର ଟଙ୍କିକିଆ କଏନ୍ ଧରି ସୋ’ରୁମରେ ପହଞ୍ଚିଲେ ଯୁବକ । ଖୁଚୁରା ଦେଇ କିଣିଲେ ବାଇକ, ଗଣି ଗଣି ଥକିଗଲେ ସୋ’ରୁମ୍ କର୍ମଚାରୀ ।
କନକ ବ୍ୟୁରୋ : ଇଏ କୌଣସି ଭିଜିଲାନ୍ସ ରେଡର କାହାଣୀ ନୁହେଁ, କିମ୍ବା ମନ୍ଦିର ଦାନହୁଣ୍ଡିରୁ ବାହାରିଥିବା ଟଙ୍କା ନୁହେଁ । ଏ ଘଟଣା ହେଉଛି ଏକ ବାଇକ୍ ସୋ’ରୁମର । ବାଇକ କିଣିବାକୁ ବସ୍ତାରେ ଆଣିଲେ ଟଙ୍କା । ଖୁଚୁରା ଦେଇ କିଣିଲେ ବାଇକ । ଗଣି ଗଣି ଥକିଗଲେ ସୋ’ରୁମ୍ କର୍ମଚାରୀ । ସାଧାରଣତଃ ଯେତେବେଳେ ଗ୍ରାହକଟିଏ ଗାଡି କିଣିବାକୁ କୌଣସି ସୋ’ରୁମକୁ ଯାଆନ୍ତି, ସେତେବେଳେ ସୋ’ରୁମ କର୍ମଚାରୀ ଖୁସି ହୋଇଯାନ୍ତି । କିନ୍ତୁ ତାମିଲନାଡୁର ଏହି ସୋରୁମକୁ ଯେତେବେଳେ ଜଣେ ଯୁବକ ବାଇକ୍ କିଣିବାକୁ ଆସିଥିଲେ, ସେତେବେଳେ କର୍ମଚାରୀଙ୍କ ହୋସ୍ ଉଡିଯାଇଥିଲା । କାରଣ ବାଇକ କିଣିବା ପାଇଁ ବସ୍ତାରେ କେବଳ ଟଙ୍କିକିଆ କଏନ୍ ନେଇ ଆସିଥିଲେ ଏହି ଯୁବକ ।
Kanak News is now on WhatsApp
Join and get latest news updates delivered to you via WhatsApp
ତାମିଲନାଡୁର ଗାନ୍ଧି ମୈଦାନ ଅଂଚଳର ଭୂପତି ନାମକ ଏହି ଯୁବକ ନିଜ ପସନ୍ଦର ବାଇକ୍ କିଣିବା ପାଇଁ ଗତ ୩ ବର୍ଷ ହେଲାଣି ଟଙ୍କା ଜମା କରୁଛନ୍ତି । ତେବେ ଗତ ଶନିବାର ନିଜ ସାଙ୍ଗମାନଙ୍କ ସହ ବସ୍ତାରେ ଟଙ୍କା ନେଇ ବାଇକ୍ କିଣିବାକୁ ସୋରୁମକୁ ଯାଇଥିଲେ ଭୂପତି । ବାଇକର ଦାମ୍ ଥିଲା ୨ ଲକ୍ଷ ୬୦ ହଜାର ଟଙ୍କା । ଆଉ ଆପଣ ଜାଣିଲେ ଆଶ୍ଚର୍ଯ୍ୟ ହେବେ, ଯେ ଏହି ପୂରା ଟଙ୍କା କେବଳ ଖୁଚୁରା ଆକାରରେ ଦେଇଥିଲେ ଭୂପତି । ତାହା ପୁଣି କେବଳ ଟଙ୍କିକିଆ କଏନ୍ । ଆଉ ସେହି କଏନକୁ ଗଣି ଗଣି ଥକିଯାଇଥିଲେ ସୋ’ରୁମ୍ କର୍ମଚାରୀ ।
ତେବେ ସୋ’ରୁମ୍ ମ୍ୟାନେଜରଙ୍କ କହିବା ଅନୁଯାୟୀ, ଏତେ ପରିମାଣର କଏନ ଗଣିବାକୁ ୮ରୁ ୧୦ ଜଣ କର୍ମଚାରୀ ନିୟୋଜିତ ହୋଇଥିବା ବେଳେ ପାଖାପାଖି ୧୦ ଘଂଟାରୁ ଅଧିକ ସମୟ ଲାଗିଥିଲା । ତେବେ ଭୂପତିଙ୍କ କହିବା କଥା, ନିଆରା ଷ୍ଟାଇଲରେ ନିଜ ସ୍ୱପ୍ନ ପୂରା କରିବା ପାଇଁ ସେ ଏପରି କରିଥିଲେ । ଗତ ୩ ବର୍ଷ ହେଲାଣି ସେ ନୋଟକୁ ବଦଳାଇ କଏନ ସଂଗ୍ରହ କରୁଥିଲେ । ତେବେ ତାଙ୍କର ଏପରି ପ୍ରୟାସ ଏବେ ସୋସିଆଲ୍ ମିଡିଆରେ ବେଶ୍ ଭାଇରାଲ ହେଉଛି ।