ପୋଲିସ୍ ଙ୍କ ଉପରେ ଗମ୍ଭୀର ଅଭିଯୋଗ ! ଗାଡି କାଗଜପତ୍ର ଚେକିଙ୍ଗ୍ ସମୟରେ ବ୍ୟକ୍ତିଙ୍କୁ ଧୁମ୍ ପିଟିଲେ ପୋଲିସ୍ ଅଧିକାରୀ , ଛାତିରେ ଆଘାତ ଯୋଗୁଁ ମୃତ ।

ଉତ୍ତରପ୍ରଦେଶର ବିଜନୋରରେ ପୋଲିସ୍ ଉପରେ ଏକ ଗମ୍ଭୀର ଅଭିଯୋଗ ଆସିଛି ଯେ ଗାଡି ଚେକିଙ୍ଗ୍ କରୁଥିବା ସମୟରେ ପୋଲିସ୍ ଜଣେ ଯୁବକଙ୍କୁ ଏତେ ଅଧିକ ପିଟିଥିଲେ ଯେ ଉକ୍ତ ଯୁବକଙ୍କ ମୃତ୍ୟୁ ହୋଇଯାଇଥିଲା । ଉକ୍ତ ଘଟଣାକୁ ବିରୋଧ କରି ଯେତେବେଳେ ସ୍ଥାନୀୟ ଲୋକ ଥାନା ଘେରାଉ କରିଥିଲେ ତାଙ୍କ ଉପରେ ଲାଠିଚାର୍ଜ କରାଯାଇଥିଲା । ପୋଲିସ୍ ର କହିବା ଅନୁସାରେ ଯୋଗେନ୍ଦ୍ର ନାମକ ଜଣେ ବ୍ୟକ୍ତିକୁ ଏଥିପାଇଁ ଅଟକ ରଖାଯାଇଥିଲା । କିନ୍ତୁ ସେ ନିଜେ ପଡିଯିବା କାରଣରୁ ତାଙ୍କ ମୃତ୍ୟୁ ହୋଇଥିଲା । ଅନ୍ୟପକ୍ଷରେ ଯୋଗେନ୍ଦ୍ରଙ୍କ ଭାଇ ମନଜିତ୍ କୁମାରଙ୍କ କହିବାନୁସାରେ ଗାଡି ଚେକିଙ୍ଗ୍ ଚାଲିଥିବା ସମୟରେ ପୋଲିସ୍ ଯୋଗେନ୍ଦ୍ରଙ୍କ ଗାଡିକୁ ଅଟକାଇଥିଲେ ଏବଂ କାଗଜପତ୍ର ମାଗିଥିଲେ । କିନ୍ତୁ ଯୋଗେନ୍ଦ୍ର କିଛି ସମୟ ପରେ କାଗଜପତ୍ର ଆସିବା କଥା କହିଥିଲେ । ଏହାପରେ ପୋଲିସବାବୁମାନେ ରାଗି ଯାଇ ଉକ୍ତ ଯୁବକଙ୍କୁ ଧୁମ୍ ପିଟିଥିଲେ ।

ଯୋଗେନ୍ଦ୍ର ମନଜିତଙ୍କୁ ଫୋନ୍ କରି ପୋଲିସ୍ ପିଟିଥିବା କଥା କହିଥିଲେ । ଯେତେବେଳ ପର୍ଯ୍ୟନ୍ତ ମନଜିତ୍ ସେଠାରେ ପହଁଚନ୍ତି ଯୋଗେନ୍ଦ୍ରଙ୍କ ମୃତ୍ୟୁ ହୋଇଯାଇଥିଲା । ଯୋଗେନ୍ଦ୍ରଙ୍କ ସହ ମାରପିଟ୍ ହେଉଥିବା ସମୟରେ ତାଙ୍କ ପୁଅ ମଧ୍ୟ ତାଙ୍କ ସହ ଥିଲା । ଘଟଣାରେ କ୍ରୋଧ ଜାହିର କରି ପରିଜନ ଥାନା ଘେରାଉ କରିଥିଲେ କିନ୍ତୁ ପୋଲିସ୍ ପରିଜନଙ୍କ ଉପରକୁ ଲାଠିଚାର୍ଜ କରିଥିଲେ । କିନ୍ତୁ ପୋଲିସ୍ ଘଟଣାକୁ ମିଥ୍ୟା କହି ପଡିବା କାରଣରୁ ଯୋଗେନ୍ଦ୍ରଙ୍କ ମୃତ୍ୟୁ ହେଉଥିବା କହୁଛନ୍ତି ।