ଦିଦିଙ୍କ ଦୟାରେ ପୁରିବ ଗରିବଙ୍କ ପେଟ । ୫ ଟଙ୍କାରେ ମିଳିବ ଭାତ, ଡାଲି, ଅଣ୍ଡା ଓ ପରିବା ତରକାରୀ । ନିର୍ବାଚନ ପୂର୍ବରୁ ପେଡି ଖୋଲୁଛନ୍ତି ମମତା ବାନାର୍ଜୀ
କନକ ବ୍ୟୁରୋ : ଆଗାମୀ ବିଧାନସଭା ନିର୍ବାଚନରେ ସହରି ଗରିବ ଲୋକଙ୍କ ଭୋଟ ହାତେଇବାକୁ ମୁଖ୍ୟମନ୍ତ୍ରୀ ମମତା ବାନାର୍ଜୀ ମା’ ଯୋଜନାର ଶୁଭାରମ୍ଭ କରିଛନ୍ତି । ଏହି ଯୋଜନାରେ ରାଜ୍ୟର ସହରୀ ଗରିବ ମାନଙ୍କୁ ମାତ୍ର ୫ ଟଙ୍କା ମୂଲ୍ୟରେ ଖାଦ୍ୟ ଯୋଗାଇବେ ମମତା ସରକାର । ଗରିବ ଲୋକମାନେ ମାତ୍ର ୫ ଟଙ୍କା ଦେଇ ଭାତ, ଡାଲି, ଅଣ୍ଡା ଓ ପରିବା ତରକାରୀ ପାଇ ପାରିବେ । ମଧ୍ୟାହ୍ନ ଭୋଜନରେ ଏହି ଖାଦ୍ୟ ଯୋଗାଇ ଦିଆଯିବ ବୋଲି କୁହାଯାଇଛି । ପ୍ରଥମେ କଲକୋତା ମହାନଗରୀରେ ଏହି ଯୋଜନା କାର୍ଯ୍ୟକାରୀ କରାଯିବ । ଏହାପରେ ଏହାକୁ ସାରା ରାଜ୍ୟକୁ ସଂପ୍ରସାରଣ କରାଯିବ ବୋଲି ସୂଚନା ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ଏହି ଯୋଜନାରେ ସହରି ଗରିବ ଲୋକମାନଙ୍କୁ ଖାଦ୍ୟ ଯୋଗାଇ ଦେବାକୁ କଲକୋତାରେ ପ୍ରଥମ ପର୍ଯ୍ୟାୟରେ ୧୬ ଟି ରୋଷଶାଳାର ବ୍ୟବସ୍ଥା କରାଯାଇଛି । କ୍ଷମତାକୁ ଆସିବା ପୂର୍ବରୁ ତୃଣମୂଳ କଂଗ୍ରେସର ଥିବା ମା, ମାଟି ମାନୁଷ ରୁ ଏହି ଯୋଜନାର ନାମ ମା’ ରଖାଯାଇଛି । କହିରଖୁ କି କରେନା ମହାମାରୀ ବେଳେ ଯେତେବେଳେ ରାଜ୍ୟରେ ତାଲାବନ୍ଦ ଚାଲିଥିଲା ପ୍ରବାସୀ ଶ୍ରମିକ ମାନଙ୍କ ପାଇଁ ରାଜ୍ୟ ସରକାରଙ୍କ ପକ୍ଷରୁ ‘ମମତା କି ରୋଷେଇ’ ନାମରେ ଏକ ଯୋଜନା କରି ସେମାନଙ୍କୁ ବିନା ମୂଲ୍ୟରେ ଖାଦ୍ୟ ଯୋଗାଇ ଦିଆଯାଉଥିଲା ।
କହିରଖୁ କି ଚଳିତ ବର୍ଷ ଏପ୍ରିଲ କିମ୍ବା ମେ ମାସରେ ପଶ୍ଚିମବଙ୍ଗରେ ବିଧାନସଭା ନିର୍ବାଚନ ଅନୁଷ୍ଠିତ ହେବାକୁ ଯାଉଛି । ଗୋଟିଏ ପଟେ ଦୀର୍ଘବର୍ଷ ଧରି ପଶ୍ଚିମବଙ୍ଗ କ୍ଷମତାରେ ଥିବା ବାମଦଳ ତାର ସର୍ତ୍ତା ଖୋଜୁଥିବା ବେଳେ ମୁଖ୍ୟ ଲଢେଇ ବିଜେପି ଓ ତୃଣମୂଳ କଂଗ୍ରେସ ମଧ୍ୟରେ ହେବାକୁ ଯାଉଛି । ଏହି କ୍ରମରେ ବିଜେପି ବଙ୍ଗଳା ଦଖଲ କରିବାକୁ ପୁରା କଳ ବଳ କୌଶଳ ଲଗାଇ ଦେଇଥିବା ବେଳେ ମମତା ବାନାର୍ଜୀ ବିଜେପିକୁ ଟକ୍କର ଦେବାକୁ ଯୋଜନା ଯୁଦ୍ଧ ଆରମ୍ଭ କରିଛି ।