କନକ ବ୍ୟୁରୋ : ମୟୂରଭଞ୍ଜରୁ ମହାଲିଙ୍ଗ, କଟକରୁ କଳାହାଣ୍ଡି । ସବୁଠୁ ଜଳୁଛି ଅସନ୍ତୋଷର ନିଆଁ । ବିରୋଧୀ ତ ବିରୋଧୀ, ସାଧାରଣ ଲୋକ ବି ତାତିଲେଣି, ସରକାରଙ୍କୁ ପ୍ରଶ୍ନ କଲେଣି । ଗୋଟିଏ ଦାବି ଇସ୍ତଫା ଦିଅନ୍ତୁ ଗୃହରାଷ୍ଟ୍ର ମନ୍ତ୍ରୀ ଦିବ୍ୟଶଙ୍କର । ମମିତା ହତ୍ୟାକାଣ୍ଡ ଘଟଣାରେ ପୂରା ରାଜ୍ୟରେ ଚିତ୍ର କିଛି ଏମିତି । କ୍ୟାପଟେନଙ୍କୁ ଅଭିଯୋଗର କାଠଗଡା ଭିତରକୁ ଟାଣିବା ପରେ ଏବେ ସରକାରଙ୍କ ପାଇଁ ସଙ୍କଟ ବଢୁଛି, ଜନଅସନ୍ତୋଷ ତେଜିଛି । ଆଉ ଏହି ଜନଅସନ୍ତୋଷକୁ ଦ୍ୱିଗୁଣିତ କରୁଛି ମନ୍ତ୍ରୀ ଦିବ୍ୟଶଙ୍କରଙ୍କ ମୌନ ଅବତାର । ମମିତା ହତ୍ୟାକାଣ୍ଡକୁ ନେଇ ରାଜ୍ୟ ସାରା ତୁମ୍ବିତୋଫାନ ହେଉଥିବା ବେଳେ ଦିବ୍ୟଶଙ୍କରଙ୍କ ଦର୍ଶନ ମିଳୁନି । କାରଣ ମମିତା ମାମଲାରେ ଉଠିଛି ଖୋଦ୍ ଦିବ୍ୟଶଙ୍କରଙ୍କ ନାଁ । ଆଉ ଏହାପରଠାରୁ ଅଜ୍ଞାତବାସରେ ଦିବ୍ୟଶଙ୍କର ଥିବା କୁହାଯାଉଛି । ତେବେ ଅଜ୍ଞାତବାସ ଠାରୁ ଦିବ୍ୟଶଙ୍କରଙ୍କ ଅନ୍ଧାରୀବିଜେ ଏବେ ସରକାରଙ୍କୁ ଅଧିକ ଅଡୁଆରେ ପକାଇଲାଣି ।
Kanak News is now on WhatsApp
Join and get latest news updates delivered to you via WhatsApp
ମମିତା ହତ୍ୟାକାଣ୍ଡ ଘଟଣାରେ ମୁଖ୍ୟ ଅଭିଯୁକ୍ତ ଗୋବିନ୍ଦ ସାହୁ ଗିରଫ ହେବା ପରେ ପ୍ରତିଦିନ ନୂଆ ନୂଆ ତଥ୍ୟ ସାମ୍ନାକୁ ଆସୁଛି । ପରକୀୟା ପ୍ରୀତି ବାବଦରେ ଜାଣିଥିବାରୁ ମମିତାଙ୍କୁ ଗୋବିନ୍ଦ ହତ୍ୟା କରିଥିବା ନେଇ ପୋଲିସ ସ୍ପଷ୍ଟ କରିଥିବା ବେଳେ ଏବେ ବି ତଦନ୍ତ କରୁଛି । ତେବେ କେଉଁ ଦିଗକୁ ନେଇ ତଦନ୍ତ ଆଗକୁ ବଢୁଛି ତାହା ପୋଲିସ ସ୍ପଷ୍ଟ କରୁନି । କିନ୍ତୁ ଅନ୍ୟପଟେ ପୋଲିସର ପରକୀୟା ପ୍ରୀତି ଥିଓରୀକୁ ନେଇ ସାଧାରଣରେ ପ୍ରଶ୍ନ ଉଠିଛି । କାରଣ ଗୋବିନ୍ଦଙ୍କ କଲେଜରେ ଅନୈତିକ କାର୍ଯ୍ୟକଳାପ ବାବଦରେ ମମିତାଙ୍କ ପାଖରେ ସମସ୍ତ ପ୍ରମାଣ ଥିବାରୁ ତାଙ୍କୁ ହତ୍ୟା କରାଯାଇଥିବା କୁହାଯାଉଛି । ଏପରିକି କଲେଜର ଛାତ୍ର କହିଛନ୍ତି ଗୋବିନ୍ଦଙ୍କ କଲେଜରେ ସେକ୍ସ ରାକେଟ ଚାଲିଥିଲା । ଆଉ ଏହି ମାମଲାକୁ ନେଇ ରାଜନୀତି ସେତେବେଳେ ତେଜିଛି ଯେତେବେଳେ ମମିତାଙ୍କ ପରିବାର ଲୋକ ଓ କଲେଜ ଛାତ୍ର ସ୍ପଷ୍ଟ କରିଥିଲେ ଯେ, କଲେଜକୁ ବାରମ୍ବାର ମନ୍ତ୍ରୀ ଦିବ୍ୟଶଙ୍କର ମିଶ୍ର ଆସିଥାନ୍ତି । ଏପରିକି କଲେଜର ଲେଡିଜ ହଷ୍ଟେଲକୁ ମନ୍ତ୍ରୀ ଅନ୍ଧାରୀବିଜେ କରୁଥିବା ନେଇ ସ୍ଥାନୀୟ ଅଞ୍ଚଳରେ ଚର୍ଚ୍ଚା ହେଉଛି । ଆଉ ମନ୍ତ୍ରୀଙ୍କ ବିରୋଧରେ ଆସିଥିବା ଏହି ଅନ୍ଧାରୀବିଜେ ଅଭିଯୋଗ ଏବେ ବିଜେଡିକୁ ଅଡୁଆରେ ପକାଇଛି ।
ଏକଥା ଏଥିପାଇଁ କୁହାଯାଉଛି କାରଣ ମମିତା ହତ୍ୟାକାଣ୍ଡକୁ ନେଇ ଜନଆକ୍ରୋଶ ବଢିବାରେ ଲାଗିଛି । କାରଣ ଶିକ୍ଷାନୁଷ୍ଠାନ ଭଳି ପବିତ୍ର ସ୍ଥାନରେ ସେକ୍ସ ରାକେଟ ଚାଲୁଥିବା ନେଇ ଅଭିଯୋଗ ଆସିବା ପରେ ଏହାକୁ ସହଜରେ ଗ୍ରହଣ କରିପାରୁନାହାନ୍ତି ରାଜ୍ୟବାସୀ । ଆଉ ଯେତେବେଳେ ଖୋଦ୍ ମନ୍ତ୍ରୀ ଉକ୍ତ କଲେଜକୁ ବାରମ୍ବାର ଯାଉଥିବାର ଖବର ସାମ୍ନାକୁ ଆସୁଛି ସେତେବେଳେ ସରକାରଙ୍କ ବିରୋଧରେ ଜନଆକ୍ରୋଶ ଆହୁରି ତୀବ୍ର ହେଉଛି । ଯେହେତୁ ଆଗକୁ ପଞ୍ଚାୟତ ନିର୍ବାଚନ ରହିଛି ତେଣୁ ମନ୍ତ୍ରୀଙ୍କୁ ନେଇ ଯେଉଁ ଜନଅସନ୍ତୋଷ ରହିଛି ତାହାକୁ ପ୍ରତିହତ କରିବାର ଯଥେଷ୍ଟ ଆବଶ୍ୟକତା ରହିଛି । ନଚେତ ଦଳକୁ ଏଥିପାଇଁ ବହୁମୂଲ୍ୟ ଦେବାକୁ ପଡିପାରେ ।
ଏହାବାଦ୍ ମମିତା ହତ୍ୟାକାଣ୍ଡ ଘଟଣା ରାଜ୍ୟର ମହିଳାଙ୍କ ଉପରେ ନିର୍ଯାତନା ଓ ସୁରକ୍ଷା ଉପରେ ବଡ ପ୍ରଶ୍ନବାଚୀ ସୃଷ୍ଟି କରିଛି । ଯେଉଁ ମହିଳାଙ୍କୁ ବିଜେଡିର ବଡ ଭୋଟ ବ୍ୟାଙ୍କ ବିବେଚନା କରାଯାଏ, ମମିତା ହତ୍ୟାକାଣ୍ଡ ପରେ ସେହି ମହିଳାଙ୍କ ସୁରକ୍ଷା ଉପରେ ଏବେ ପ୍ରଶ୍ନ ଉଠିଛି । ଏପରିକି ମମିତା ହତ୍ୟାକାଣ୍ଡ ମାମଲାରେ ଗୃହରାଷ୍ଟ୍ର ମନ୍ତ୍ରୀଙ୍କ ଅସମ୍ଭବ ନୀରବତା ବିଜେଡି ପାଇଁ ବୁମେରାଂ ହେବ ବୋଲି କୁହାଯାଉଛି । କାରଣ ଆଗକୁ ପଞ୍ଚାୟତ ନିର୍ବାଚନ ଆସୁଛି, ଆଉ ଶାସକ ଦଳର ମନ୍ତ୍ରୀଙ୍କ ବିରୋଧରେ ଥିବା ଜନଅସନ୍ତୋଷ ନିର୍ବାଚନ ଉପରେ ବଡଧରଣର ପ୍ରଭାବ ପକାଇପାରେ । ତେଣୁ ସରକାର ଶୂନ୍ୟ ସହନଶୀଳ ନୀତି ଆପଣାଇବା ସହ ଘଟଣାକୁ ଗୁରୁତ୍ୱର ସହ ନେଇ କାର୍ଯ୍ୟାନୁଷ୍ଠାନ ନେବାର ଆବଶ୍ୟକତା ରହିଛି । ଯାହାଦ୍ୱାରା ପଞ୍ଚାୟତ ନିର୍ବାଚନ ପୂର୍ବରୁ ଭୋଟରଙ୍କ ପାଖକୁ ବାର୍ତ୍ତା ଯିବ ଯେ, ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାରେ ସରକାର ଆଦୌ ପଛଘୁଞ୍ଚା ଦିଅନ୍ତି ନାହିଁ ।