ମମିତା ମେହେର ହତ୍ୟା ମାମଲା : ନବୀନ ନିବାସ ଘେରିବ ବିଜେପି
ରାଜମହଲ ଛକରୁ ବାହାରିବ ଭୁବନେଶ୍ୱର ସାଙ୍ଗଠନିକ ଜିଲ୍ଲା ବିଜେପିର ଶୋଭାଯାତ୍ରା; ଶିଶୁ ଭବନ ଛକରେ ଅଟକାଇବାକୁ ପୋଲିସର ଯୋଜନା
କନକ ବ୍ୟୁରୋ : ପଞ୍ଚାୟତ ଓ ପୌର ନିର୍ବାଚନ ଯେତିକି ପାଖେଇ ଆସୁଛି ରାଜଧାନୀ ରାଜନୀତି ସେତିକି ଉଷ୍ମ ହେବାରେ ଲାଗିଛି । ରନ୍ଧନ ଗ୍ୟାସ ଦର ବୃଦ୍ଧି ପ୍ରତିବାଦରେ ବିଜୁ ଯୁବ, ଛାତ୍ର ଓ ମହିଳା ଜନତା ଦଳ, ଭୁବନେଶ୍ବର ପକ୍ଷରୁ ସୋମବାର ସହରର ତିନୋଟି ସ୍ଥାନରେ ଗଣଧାରଣା ଓ ପ୍ରତିବାଦ ସଭା ଆୟୋଜନ ଲାଗି ପ୍ରସ୍ତୁତି ଚାଲିଛି । ଆଉ ଏହାର ଜବାବ ଦେବାକୁ ଯାଇ ମମିତା ମେହେର ହତ୍ୟା ଘଟଣାରେ ରାଜ୍ୟ ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ ବହିଷ୍କାର, ଗିରଫ ଓ ସିବିଆଇ ତଦନ୍ତ ଦାବିରେ ଭୁବନେଶ୍ବର ବିଜେପି ମଧ୍ୟ ଆଜି ନବୀନ ନିବାସ ଘେରାଉ ଡାକରା ଦେଇଛି ।
Kanak News is now on WhatsApp
Join and get latest news updates delivered to you via WhatsApp
ଆନ୍ଦୋଳନ ଲାଗି ଉଭୟ ଦଳ ରଣକୌଶଳ ପ୍ରସ୍ତୁତି କରିଥିବା ବେଳେ କମିସନରେଟ୍ ପୁଲିସ ପାଇଁ ବଡ଼ ଆହ୍ବାନ ସୃଷ୍ଟି ହୋଇଛି । ଗୋଟିଏ ଦିନ ଓ ଗୋଟିଏ ସମୟରେ ସହରର ୪ଟି ସ୍ଥାନରେ ଆନ୍ଦୋଳନ ହେବାକୁ ଥିବାରୁ ସହରର ବିଭିନ୍ନ ସ୍ଥାନରେ ୧୫ ପ୍ଲାଟୁନ୍ରୁ ଅଧିକ ପୁଲିସ ଫୋର୍ସ ମୁତୟନ କରାଯିବାକୁ ନିଷ୍ପତ୍ତି ହୋଇଛି । ନବୀନ ନିବାସର ସୁରକ୍ଷାକୁ ବି ଆହୁରି ବଢ଼ାଇ ଦିଆଯାଇଛି । ସକାଳ ୧୧ଟାରେ ନବୀନ ନିବାସ ଘେରାଉ କରାଯିବ ।
ଭୁବନେଶ୍ୱର ସାଙ୍ଗଠନିକ ଜିଲ୍ଲା ବିଜେପି ପକ୍ଷରୁ ପୂର୍ବାହ୍ନ ୧୦ଟାରେ ରାଜମହଲ ଛକ ନିକଟରୁ ଶୋଭାଯାତ୍ରା ଆରମ୍ଭ ହୋଇ ଶିଶୁ ଭବନ ଛକ ଦେଇ ନବୀନ ନିବାସ ଆଡ଼କୁ ମୁହାଁଇବ । ଯେଉଁଥିରେ ଦଳର ବରିଷ୍ଠ ନେତାମାନେ ବି ସାମିଲ ହେବେ । ତାହାକୁ ନଜରରେ ରଖି ଶିଶୁ ଭବନ ଛକରେ ବାରିକେଡ୍ କରିବାକୁ ପୁଲିସ ଯୋଜନା କରିଛି। ଆନ୍ଦୋଳନକାରୀ ଯେପରି ଶିଶୁ ଭବନ ଛକ ନ ଡିଅନ୍ତି ତାହା ଉପରେ ଅଧିକ ଗୁରୁତ୍ବ ଦିଆଯାଇଛି । ପୂର୍ବରୁ ଗୁଇନ୍ଦା ବାରମ୍ବାର ବିଫଳ ହେଉଥିବାରୁ ଏଥର କଡ଼ା ନଜର ରଖିବାକୁ ନିର୍ଦେଶ ଦିଆଯାଇଛି ।