ଥମୁନି ମମିତା ମାମଲା । ଦିବ୍ୟଶଙ୍କର ବହିଷ୍କାର ଦାବିରେ ପ୍ରତିବାଦ ଜାରି । ମନ୍ତ୍ରୀ ପଦ୍ମନାଭ ବେହେରାଙ୍କ ଗାଡିକୁ ଅଣ୍ଡାମାଡ
କନକ ବ୍ୟୁରୋ: ମମିତା ମେହେର ହତ୍ୟା ମାମଲାରେ ଥମୁନି ବିବାଦ । ମନ୍ତ୍ରୀ ଦିବ୍ୟଶଙ୍କରଙ୍କ ଇସ୍ତଫା ଦାବିରେ ଆନ୍ଦୋଳନ ଜାରି ରଖିଛନ୍ତି ବିରୋଧୀ । ଏହି କ୍ରମରେ ଆଜି ମନ୍ତ୍ରୀ ପଦ୍ମନାଭ ବେହେରାଙ୍କ ଗାଡ଼ି ଉପରେ ହୋଇଛି ଅଣ୍ଡାମାଡ଼ । ତା ସହିତ ସାମ୍ବାଦିକ ସମ୍ମିଳନୀ କରି ଉଭୟ କଂଗ୍ରେସ ଓ ବିଜେପି ଅଭିଯୋଗ କରିଛନ୍ତି, ମନ୍ତ୍ରୀଙ୍କୁ ସୁରକ୍ଷା ଦେଉଛନ୍ତି ମୁଖ୍ୟମନ୍ତ୍ରୀ
Kanak News is now on WhatsApp
Join and get latest news updates delivered to you via WhatsApp
ମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କୁ ମୁଖ୍ୟମନ୍ତ୍ରୀ ମଞ୍ଚରେ ବସାଇବା ପରେ ମମିତା ହତ୍ୟା ମାମଲାରେ ବିରୋଧୀଙ୍କ ପ୍ରତିବାଦ ତୀବ୍ର ହୋଇଛି । ବିରୋଧୀମାନେ ନିଜର ବିକ୍ଷୋଭ ଜାରି ରଖିଛନ୍ତି । ମନ୍ତ୍ରୀଙ୍କ ଇସ୍ତଫା ଓ ଗିରଫ ଦାବିରେ ବାଲେଶ୍ୱର ମ୍ୟୁନସିପାଲିଟି କାର୍ଯ୍ୟାଳୟ ଘେରାଉ କରିଛନ୍ତି ବିଜେପି ମହିଳା ମୋର୍ଚ୍ଚା । ଶତାଧିକ ବିଜେପି କର୍ମୀ ଶୋଭଯାତ୍ରା କରିବା ସହ ବିକ୍ଷୋଭ ପ୍ରଦର୍ଶନ କରିଛନ୍ତି ।ଅନ୍ୟପଟେ ସରକାର ବିରୋଧୀଙ୍କ କଥାକୁ ବେଖାତିର କରି ଚାଲିଥିବା ଅଭିଯୋଗ ଆଣି, ରାଜ୍ୟ କ୍ୟାବିନେଟର ମନ୍ତ୍ରୀଙ୍କ ଗାଡି ଉପରକୁ ଅଣ୍ଡାମାଡ ଜାରି ରଖିଛନ୍ତି ବିରୋଧୀ । ପରିବହନ ମନ୍ତ୍ରୀ ପଦ୍ମନାଭ ବେହେରା ନୂଆପଡା ଗସ୍ତରେ ଯାଇଥିବାବେଳେ କଳାପତାକା ଦେଖାଇବା ସହ ଅଣ୍ଡାମାଡ କରିଛନ୍ତି ବିଜେପି କର୍ମୀ ।
ଏପଟେ ମମିତା ମେହେର ହତ୍ୟାକାଣ୍ଡ ମାମଲାରେ ମନ୍ତ୍ରୀଙ୍କୁ ଶାସକ ଦଳ କ୍ଲିନଚିଟ୍ ଦେବା ପ୍ରସଙ୍ଗରେ, ପୌରାଣିକ ଚରିତ୍ରର ଉଦାହରଣ ଦେଇ ମୁଖ୍ୟମନ୍ତ୍ରୀ, ଗୃହ ରାଷ୍ଟ୍ରମନ୍ତ୍ରୀ ଓ ସ୍ୱାସ୍ଥ୍ୟମନ୍ତ୍ରୀଙ୍କୁ କଡା ଭାଷାରେ ସମାଲୋଚନା କରିଛନ୍ତି ବିଜେପି ନେତା । ସେହିପରି ସରକାର ଓ ମୁଖ୍ୟମନ୍ତ୍ରୀଙ୍କ ଉପରେ ବର୍ଷିଛି କଂଗ୍ରେସ । ତେବେ ବିଜେଡିର ଜବାବ, ବିରୋଧୀ ତାଙ୍କ କାମ କରୁଛନ୍ତି । ଏଥିରେ କିଛି ଫରକ ପଡ଼ିବ ନାହିଁ । ଆଗକୁ ପଞ୍ଚାୟତ ନିର୍ବାଚନ ଥିବାରୁ ମମିତା ମେହେର ହତ୍ୟାକାଣ୍ଡ ମାମଲା ବିରୋଧୀଙ୍କ ପାଇଁ ଏକ ବଡ ପ୍ରସଙ୍ଗ ପାଲଟିଯାଇଛି କିନ୍ତୁ, ମମିତା ମେହେର ହତ୍ୟାକାଣ୍ଡର ପୃ୍ଷ୍ଠଭୂମିକୁ ଯାଇ ଷଡଯନ୍ତ୍ରକାରୀକୁ ଠାବ କରିବା ଭଳି ମୂଳ ପ୍ରସଙ୍ଗ ଦୂରେଇ ଯାଉଛି ।