କନକ ବ୍ୟୁରୋ: ନୂଆଦିଲ୍ଲୀରେ ମୋଦୀଙ୍କୁ ଭେଟିଛନ୍ତି ମମତା । ପଶ୍ଚିମବଙ୍ଗରେ ମମତାଙ୍କ ଏକଦା ଘନିଷ୍ଠ ସହଯୋଗୀ ଥିବା ପାର୍ଥ ଚାଟାର୍ଜୀଙ୍କୁ ଗିରଫ କରିଛି ଏବଂ ଶିକ୍ଷକ ନିଯୁକ୍ତି ସ୍କାମର ତଦନ୍ତ କରୁଛି । ଏହାକୁ ନେଇ ପଶ୍ଚିମବଙ୍ଗ ରାଜନୀତି ଉଠୁଥିବା ପଡ଼ୁଥିବା ବେଳେ ଦିଲ୍ଲୀରେ ପ୍ରଧାନମନ୍ତ୍ରୀଙ୍କୁ ଭେଟିଛନ୍ତି ମୁଖ୍ୟମନ୍ତ୍ରୀ ମମତା ବାନାର୍ଜୀ । ଏପରି ରାଜନୈତିକ ହଲଚଲ ସମୟରେ ମୋଦୀ-ମମତାଙ୍କ ଏହି ଭେଟଘାଟକୁ ନେଇ ରାଜନୈତିକ ମହଲରେ ଜୋରଦାର ଚର୍ଚ୍ଚା ଆରମ୍ଭ ହୋଇଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଆଜି ଦିଲ୍ଲୀ ସ୍ଥିତ ପ୍ରଧାନମନ୍ତ୍ରୀଙ୍କ ବାସଭବନରେ ନରେନ୍ଦ୍ର ମୋଦୀଙ୍କୁ ସାକ୍ଷାତ କରି ଜିଏସଟି, ଦରଦାମ ବୃଦ୍ଧି ସହ ବିଭିନ୍ନ ପ୍ରସଙ୍ଗରେ ଦିିଦି ଆଲୋଚନା କରିଥିବା ସୂଚନା ମିଳିଛି । ଏହି ଅବସରରେ କେନ୍ଦ୍ରଠାରୁ ଜିଏସଟି ବାବଦକୁ ପଶ୍ଚିମବଙ୍ଗ ପାଇବାକୁ ଥିବା ବକେୟା ଏକ ଲକ୍ଷ କୋଟି ଟଙ୍କା ତୁରନ୍ତ ଦେବା ପାଇଁ ମମତା ଦାବି କରିଥିବା ସୂଚନା ମିଳିଛି । ଏହାଛଡା ମନରେଗା, ପିଏମ୍ ଆବାସ ଯୋଜନା ଓ ପିଏମ୍ ସଡ଼କ ଯୋଜନାରେ ଅର୍ଥ ଯୋଗାଇବାକୁ ସେ ଦାବି କରିଥିବା ଚର୍ଚା ହେଉଛି । କାରଣ ଆଜି ଏ ନେଇ ପ୍ରଧାନମନ୍ତ୍ରୀଙ୍କୁ ଚିଠି ଲେଖିଥିଲେ ମମତା ।
ଗତ ବର୍ଷ ନୀତି ଆୟୋଗର ବୈଠକରେ ଯୋଗଦେଇନଥିବା ମମତା ବାନାର୍ଜୀ ଆସନ୍ତା ରବିବାର ପ୍ରଧାନମନ୍ତ୍ରୀଙ୍କ ଅଧ୍ୟକ୍ଷତାରେ ହେବାକୁ ଥିବା ନୀତି ଆୟୋଗର ବୈଠକରେ ସାମିଲ ହେବେ ବୋଲି ସୂଚନା ମିଳିଛି । ସେପଟେ ମୋଦୀ-ମମତାଙ୍କ ସାକ୍ଷାତ ପୂର୍ବରୁ ପଶ୍ଚିମବଙ୍ଗ ବିଜେପି ନେତା ଦିଲୀପ ଘୋଷଙ୍କ ବୟାନ ଚର୍ଚ୍ଚା ସୃଷ୍ଟି କରିିଥିଲା । ଦିଲ୍ଲୀପ ଘୋଷ କହିିଥିଲେ ମୋଦୀଙ୍କୁ ଭେଟି ସବୁ କିଛି ଠିକ୍ ହୋଇଗଲା ବୋଲି ଲୋକଙ୍କୁ ଦେଖାଇବାକୁ ଚେଷ୍ଟା କରନ୍ତି ମମତା । ତେଣୁ ଏ ଦିଗରେ କେନ୍ଦ୍ର ସରକାର ଧ୍ୟାନ ଦେବା ଉଚିତ ।
ଅନ୍ୟପଟେ ଏହା ମଧ୍ୟ ଚର୍ଚ୍ଚା ହେଉଛି ଦିଲ୍ଲୀରେ ତୃଣମୂଳ କଂଗ୍ରେସର ସଂସଦୀୟ ଦଳର ବୈଠକରେ ଯୋଗ ଦେଇଥିଲେ ମମତା । ବିଭିନ୍ନ ପ୍ରସଙ୍ଗରେ ସଂସଦରେ କେନ୍ଦ୍ର ସରକାରଙ୍କୁ ଦୃଢ଼ ବିରୋଧ କରିବା ପାଇଁ ଦଳୀୟ ସାଂସଦଙ୍କୁ ସେ ପରାମର୍ଶ ଦେଇଛନ୍ତି । କେନ୍ଦ୍ର ସରକାର ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ବିରୋଧ କରି ଆସୁଛନ୍ତି ମମତା । ତେଣୁ ଦୁଇ ନେତାଙ୍କ ସାକ୍ଷାତ ଆଲୋଚନା ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି । ପିଏମଓ ପକ୍ଷରୁ ଟ୍ୱିଟ୍ କରି ଦୁଇ ନେତାଙ୍କ ଭେଟଘାଟ ସଂପର୍କରେ ସୂଚନା ଦିଆଯାଇଛି । ତେବେ କଣ ଆଲୋଚନା ହେଲା, ଏ ନେଇ କିଛି ସୂଚନା ଦିଆଯାଇନାହିଁ ।