ମୋଦୀଙ୍କ ବିରୋଧରେ ମମତା ବାନ୍ଧୁଛନ୍ତି ମେଳି । ସୋନିଆଙ୍କୁ ଭେଟିଲେ ଦିଦି । କହିଲେ, ବିଜେପିକୁ ପରାସ୍ତ କରିବାକୁ ସମସ୍ତଙ୍କୁ ଏକାଠି ହେବାକୁ ପଡ଼ିବ ।
କନକ ବ୍ୟୁରୋ: ମୋଦୀ ସରକାର ଓ ବିଜେପି ବିରୋଧରେ ମେଳି ବନ୍ଧିବାକୁ ପ୍ରୟାସ ଆରମ୍ଭ କରିଛନ୍ତି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ । ୪ ଦିନିଆ ଦିଲ୍ଲୀ ଗସ୍ତରେ ଥିବା ମମତା ମାରାଥନ ମିଟିଂ କରିଛନ୍ତି ଆଉ ବିଜେପି ବିରୋଧି ସାମୁଖ୍ୟକୁ ଜୋରଦାର କରିବା ପାଇଁ ଗୋଟିଏ ପରେ ଗୋଟିଏ ହେବିୱେଟ ନେତାଙ୍କୁ ଭେଟୁଛନ୍ତି ମମତା ।
Kanak News is now on WhatsApp
Join and get latest news updates delivered to you via WhatsApp
ଆଜି କଂଗ୍ରେସ ସୁପ୍ରିମୋ ସୋନିଆ ଗାନ୍ଧୀଙ୍କୁ ମମତା ବାନାର୍ଜୀ ଭେଟିଥିବାବେଳେ ବୈଠକରେ ସୋନିଆଙ୍କ ସହ ରାହୁଲ ଗାନ୍ଧୀ ମଧ୍ୟ ଉପସ୍ଥିତ ଥିଲେ । ୨୦୨୪ ସାଧାରଣ ନିର୍ବାଚନ ପୂର୍ବରୁ ବିରୋଧୀଙ୍କୁ ଏକଜୁଟ କରି ବିଜେପି ବିରୋଧୀ ରଣନୀତି ପ୍ରସ୍ତୁତ କରିବାରେ ଲାଗି ପଡିଛନ୍ତି ମମତା । ତେବେ ଏହି ଭିତରେ ସୋନିଆ ଓ ମମତାଙ୍କ ବୈଠକକୁ ବେଶ ଗୁରୁତ୍ୱପୂର୍ଣ୍ଣ ବୋଲି ମନେ କରାଯାଉଛି ।
ତେବେ ଏହି ବିରୋଧୀ ମେଣ୍ଟର ନେତୃତ୍ୱ କିଏ ନେବ? ସେ ନେଇ କଳ୍ପନା ଜଳ୍ପନା ଚାଲିଥିବାବେଳେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ କହିଛନ୍ତି ଯିଏ ବି ଏହି ମେଣ୍ଟର ନେତୃତ୍ୱ ନିଅନ୍ତୁ, ସେ ଜଣେ ସୈନିକ ଭଳି କାମ କରିବେ । ଏହି ବୈଠକରେ ପେଗାସସ୍ ଏବଂ କୋଭିଡ୍-୧୯ ପ୍ରସଙ୍ଗକୁ ନେଇ ମଧ୍ୟ ଆଲୋଚନା କରାଯାଇଥିବା ମମତା କହିଛନ୍ତି । ସୂଚନାଯୋଗ୍ୟ ଯେ, ଆସନ୍ତା ୨୯ ତାରିଖରେ ମମତା ବାନାର୍ଜୀ ପଶ୍ଚିମବଙ୍ଗକୁ ଫେରିବେ । ଏହା ପୂର୍ବରୁ ସେ ଶରଦ ପାୱାର, ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଏବଂ ଅନ୍ୟ ପ୍ରମୁଖ ନେତାଙ୍କୁ ଭେଟିବାର କାର୍ଯ୍ୟକ୍ରମ ମଧ୍ୟ ରହିଛି ।