‘ସ୍ୱାସ୍ଥ୍ୟ ସାଥୀ’ କାର୍ଡ ନେବାକୁ ଧାଡିରେ ଛିଡା ହେଲେ ମମତା ବାନାର୍ଜୀ । ବିଜେପି କହିଲା ଲୋକପ୍ରିୟତା ବଜାୟ ରଖିବାକୁ ମମତା କରୁଛନ୍ତି ଡ୍ରାମା
କନକ ବ୍ୟୁରୋ : ସମୟ ଥିଲା ସେ ଯେଉଁଠି ଠିଆ ହେଉଥିଲେ ସେଇଠୁ ଧାଡି ଆରମ୍ଭ ହେଉଥିଲା । ହେଲେ ଆଜି ସମୟ ବଦଳି ଯାଇଛି । ମୁଖ୍ୟମନ୍ତ୍ରୀ ଥାଇବି ତାଙ୍କୁ ଲୋକଙ୍କ ମନରେ ବିଶ୍ୱାସ ଓ ଲୋକପ୍ରିୟତାକୁ ବୃଦ୍ଧି କରିବାକୁ ସେ ଧାଡିରେ ଠିଆ ହୋଇଛନ୍ତି । ଆମେ କହୁଛୁ ପଶ୍ଚିମବଙ୍ଗର ବିବାଦୀୟ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ କଥା । ‘ସ୍ୱାସ୍ଥ୍ୟ ସାଥୀ’ ସ୍ମାର୍ଟ କାର୍ଡ ପାଇଁ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ମଙ୍ଗଳବାର କୋଲକତା ମ୍ୟୁନିସପାଲଟିର କାର୍ଡ ବଣ୍ଟନ କେନ୍ଦ୍ରରେ ଧାଡିରେ ଛିଡା ହୋଇଥିବା ଦେଖିବାକୁ ମଳିଛି । ମଙ୍ଗଳବାର ପୂର୍ବାହ୍ନ ୧୧.୪୫ ମିନିଟ୍ କାର୍ଡ ନେବାକୁ ସାଧାରଣ ଲୋକଙ୍କ ସହ ଧାଡିରେ ଛିଡା ହୋଇଛନ୍ତି ମମତା ବାନାର୍ଜୀ । ତାଙ୍କ ସହିତ ଅଛନ୍ତି ନଗର ଉନ୍ନୟନ ମନ୍ତ୍ରୀ ଫିରହାଦ୍ ହାକିମ୍ ଓ ଅନ୍ୟ କିଛି ସରକାରୀ ଅଧିକାରୀ । କେନ୍ଦ୍ରସରକାରଙ୍କ ଆୟୁଷ୍ମାନ ଯୋଜନାକୁ ଟକ୍କର ଦେଇ ମମତା ନିଜେ ନିଜ ରାଜ୍ୟର ଲୋକଙ୍କ ପାଇଁ ସ୍ୱାସ୍ଥ୍ୟ ସାଥୀ ନାମରେ ଏକ ଯୋଜନା ପ୍ରଣୟନ କରିଛନ୍ତି । ଏହି ଯୋଜନାରେ ଅନ୍ତର୍ଭୂକ୍ତ ହୋଇଥିବା ହିତାଧିକାରୀଙ୍କୁ ବର୍ଷକୁ ୫ ଲକ୍ଷ ଟଙ୍କାର ମାଗଣା ସ୍ୱାସ୍ଥ୍ୟ ସେବା ଯୋଗାଇ ଦେବାର ପ୍ରାବଧାନ ରଖାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ମମତାଙ୍କୁ ଏଭଳି କାର୍ଯ୍ୟକୁ ଡ୍ରାମା ବୋଲି କହି ସମାଲୋଚନା କରିଛନ୍ତି ବିଜେପି ରାଜ୍ୟ ସଭାପତି ଦିଲ୍ଲୀପ ଘୋଷ । ଦିଲ୍ଲୀପ କହିଛନ୍ତି କି ଦିନକୁ ଦିନ ମମତାଙ୍କ ଲୋକପ୍ରିୟତା ହ୍ରାସ ପାଇବାରେ ଲାଗିଛି । ତୃଣମୂଳ କଂଗ୍ରେସର ବଡ ବଡ ନେତା ଏବେ ମମତାଙ୍କ ଉପରୁ ଭରଶା ତୁଟାଇ ବିଜେପିରେ ସାମିଲ ହେଉଛନ୍ତି । ଏହାକୁ ନଜରରେ ରଖି ମମତା ଏଭଳି ଡ୍ରାମା କରୁଛନ୍ତି ।
କହିରଖୁ କି ୨୦୧୯ ସାଧାରଣ ନିର୍ବାଚନରେ ବିଜେପି ପଶ୍ଚିମବଙ୍ଗରେ ୧୮ ଟି ସଂସଦୀୟ କ୍ଷେତ୍ର ଦଖଲ କରିବାରେ ସଫଳ ହେବା ପରେ ମମତା ହତୋତ୍ସାହିତ ହୋଇପଡିଛନ୍ତି । ପୁଣି ଚଳିତ ବର୍ଷ ପଶ୍ଚିମବଙ୍ଗରେ ଅନୁଷ୍ଠିତ ହେବାକୁ ଯାଉଛି ବିଧାନସଭା ନିର୍ବାଚନ । ନିର୍ବାଚନ ତାରିଖ ଘୋଷଣା ହୋଇନଥିଲେ ବି ବିଜେପି ଯେଭଳି ଭାବେ ପଶ୍ଚିମବଙ୍ଗ ଦଖଲ କରିବାକୁ ରଣନୀତି ପ୍ରସ୍ତୁତ କରୁଛି ତାହାକୁ ଦେଖି ମମତା ଛାନିଆ । ବିଜେପିର ବରିଷ୍ଠ ନେତା ମାନେ ଏବେଠାରୁ ପଶ୍ଚିମବଙ୍ଗରେ ଡେରା ପକାଇବା ଆରମ୍ଭ କଲେଣି । ଏହା ସହ କେନ୍ଦ୍ର ଗୃହମନ୍ତ୍ରୀ ତଥା ବିଜେପିର ଚାଣକ୍ୟ କୁହାଯାଉଥିବା ଅମିତ୍ ଶାହା ପ୍ରତି ମାସରେ ପଶ୍ଚିମବଙ୍ଗ ଗସ୍ତ କରି ଦଳୀୟ କର୍ମୀଙ୍କ ସାହସ ବୃଦ୍ଧି କରିବା ସହ ମମତାଙ୍କ ଗଡ ଭାଙ୍ଗିବାକୁ ଯୋଜନା କରିଥିବା ସୂଚନା ମିଳିଛି । ଏହାକୁ ନଜରରେ ରଖି ମମତା ପୁଣିଥରେ ଲୋକଙ୍କ ଗହଣକୁ ଫେରି ତାଙ୍କ ଉପସ୍ଥିତ ଜାହିର କରିବାକୁ ଚେଷ୍ଟା ଚଳାଇଛନ୍ତି ।