୧୯୭୦ ମସିହାରୁ ପଲିଟିକାଲ୍ କ୍ୟାରିଅର ଆରମ୍ଭ କରିଥିଲେ ମମତା । ଏବେ ତୃତୀୟ ଥର ପାଇଁ ବସିବେ ମୁଖ୍ୟମନ୍ତ୍ରୀ ଆସନରେ!
କନକ ବ୍ୟୁରୋ: ପଶ୍ଚିମବଙ୍ଗରେ ରାଜନୈତିକ ଗୋଟି ଚାଳନା କରି ପୁଣି ଶାସନ କ୍ଷମତା ଅକ୍ତିଆର କରିବାକୁ ଯାଉଛନ୍ତି ତୃଣମୂଳ ନେତ୍ରୀ ମମତା ବାନାର୍ଜୀ । ଆଉ ତୃତୀୟ ଥର ପାଇଁ ବସିବାକୁ ଯାଉଛନ୍ତି ମୁଖ୍ୟମନ୍ତ୍ରୀ ଆସନରେ । ଚଳିତଥରର ପଶ୍ଚିମବଙ୍ଗ ବିଧାନସଭା ନିର୍ବାଚନରେ ଟିଏମସିର ବିଜୟ ଏକପ୍ରକାର ପକ୍କା ହେବା ଦେଖାଯାଉଥିବାବେଳେ ତୃତୀୟ ଥର ପାଇଁ ମୁଖ୍ୟମନ୍ତ୍ରୀ ଆସନରେ ବସିବେ ଦିଦି ।
Kanak News is now on WhatsApp
Join and get latest news updates delivered to you via WhatsApp
ଏଥର ପଶ୍ଚିମବଙ୍ଗ ନିର୍ବାଚନରେ ମମତାଙ୍କ ସାମ୍ନାରେ ଅନେକ ରଥୀ ମହାରଥୀ ଥିଲେ ମଧ୍ୟ ଦିଦିଙ୍କ ଲହର ଆଗରେ ସବୁକିଛି ଫିକା ପଡିଛି, ତୃଣମୂଳ କଂଗ୍ରେସ ପଶ୍ଚିମବଙ୍ଗରେ ପୁଣି କ୍ଷମତା ଅକ୍ତିଆର କରିବ ବୋଲି ପକ୍କା ହୋଇଛି । ତେବେ ଦିଦିଙ୍କ ଏହି ମହାବିଜୟ ପରେ ନଜର ପକାନ୍ତୁ ତାଙ୍କ ଦୀର୍ଘ ବର୍ଷର ରାଜନୈତିକ କ୍ୟାରିୟର ଉପରେ…
୧୯୭୦ ମସିହାରୁ ପଲିଟିକାଲ୍ କ୍ୟାରିୟର…
ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ଆସନରେ ପୁଣିଥରେ ବସିବାକୁ ଯାଉଥିବା ମମତାଙ୍କ ରାଜନୈତିକ କ୍ୟାରିୟର ଆରମ୍ଭ ହୋଇଥିଲା ୧୯୭୦ ମସିହାରେ । ସେତେବେଳେ ସେ କଂଗ୍ରେସ ଦଳର କାର୍ଯ୍ୟକର୍ତ୍ତା ହୋଇଥିଲେ । ଏହାପରେ ୧୯୭୬ରୁ ୧୯୮୦ ଯାଏଁ ସେ ମହିଳା କଂଗ୍ରେସର ମହାସଚିବ ମଧ୍ୟ ରହିଥିଲେ । ୧୯୮୪ ମସିହାରେ ମମତା ସିପିଏମର ବରିଷ୍ଠ ନେତା ସୋମନାଥ ଚାଟାର୍ଜୀଙ୍କୁ ଜାଦବପୁର ଆସନରୁ ହରାଇବା ସହିତ ଦେଶର ସବୁଠୁ ଯୁବ ସାଂସଦ ହେବାର ଗୌରବ ଅର୍ଜନ କରିଥିଲେ । ଏହାପରେ ପରେ ମମତା ନିଜ କ୍ୟାରିୟରରେ ଅନେକ ନିର୍ବାଚନ ଲଢିଥିଲେ । ଯେଉଁଥିରୁ କିଛିଥିରେ ସେ ପରାଜୟ ଭୋଗିଥିଲେ ମଧ୍ୟ ୧୯୯୬,୧୯୯୮, ୧୯୯୯,୨୦୦୪ ଏବଂ ୨୦୦୯ ମସିହାରେ ଲୋକସଭା ସଦସ୍ୟ ଭାବେ ନିର୍ବାଚିତ ହୋଇଥିଲେ । ପରେ ପରେ ସେ ୨୦୧୧ରେ ପଶ୍ଚିମବଙ୍ଗ ସରକାରରେ କ୍ଷମତାକୁ ଆସିବା ସହିତ ମୁଖ୍ୟମନ୍ତ୍ରୀ ଭାବେ ପ୍ରଥମ ଥର ପାଇଁ ଶପଥ ନେଇଥିଲେ । ସେବେଠାରୁ ସେ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ରହିଛନ୍ତି ।
ଟିଏମସି ଗଢିଥିଲେ ମମତା
କଂଗ୍ରେସରେ ଥିବା ସମୟରେ କ୍ଷମତାରେ ରହିବା ସହିତ ମମତା ଅନେକ ବିରୋଧୀ ଶକ୍ତିକୁ ମଧ୍ୟ ସାମ୍ନା କରିଥିଲେ । ୧୯୯୬-୯୭ରେ ସେ କଂଗ୍ରେସ ଉପରେ ଆରୋପ୍ ଲଗାଇବା ସହ ୧୧୯୭ରେ ହାତ ଛାଡିଦେଇଥିଲେ । ପରେ ପରେ ସେ ୧୯୯୮ ମସିହା ଜାନୁଆରୀ ପହିଲାରେ ଅଖିଳ ଭାରତୀୟ ତୃଣମୂଳ କଂଗ୍ରେସର ଗଠନ କରିବା ସହିତ ଏହାର ଅଧ୍ୟକ୍ଷ ହୋଇଥିଲେ । ୧୯୯୮ ମସିହାର ଲୋକସଭା ନିର୍ବାଚନରେ ମମତାଙ୍କ ଟିଏମସି ୮ଟି ସିଟ୍ ଉପରେ କବଜା ମଧ୍ୟ କରିଥିଲା । ଏହାପରେ ପ୍ରଥମ ଥର ପାଇଁ ୨୦୧୧ ମସିହା ପଶ୍ଚିମବଙ୍ଗ ନିର୍ବାଚନରେ ଟିଏମସି ସଂଖ୍ୟାଗରିଷ୍ଠତା ହାସଲ କରିବା ସହିତ ସରକାର ଗଠନ କରିଥିଲା, ଯାହାର ମୁଖ୍ୟମନ୍ତ୍ରୀ ହୋଇଥିଲେ ମମତା । ଏହାପରେ ମଧ୍ୟ ୨୦୧୬ରେ ଟିଏମସି ପଶ୍ଚିମବଙ୍ଗରେ ପୂର୍ଣ୍ଣ ସଂଖ୍ୟା ଗରିଷ୍ଠତା ହାସଲ କରିବା ସହିତ ଦ୍ୱିତୀୟ ଥର ପାଇଁ ମୁଖ୍ୟମନ୍ତ୍ରୀ ହୋଇଥିଲେ ଦିଦି ।
ତୃତୀୟ ଥର ପାଇଁ ମୁଖ୍ୟମନ୍ତ୍ରୀ ଆସନରେ ଦିଦି!
ଚଳିତ ୨୦୨୧ ପଶ୍ଚିମବଙ୍ଗ ନିର୍ବାଚନରେ ଟିଏମସିର ବିଜୟ ଏକପ୍ରକାର ପକ୍କା ହୋଇସାରିଲାଣି । ଏବେ କେବଳ ବିଧିବଦ୍ଧ ଘୋଷଣାକୁ ବାକି ରହିଛି । ନିର୍ବାଚନ କମିସନଙ୍କ ଘୋଷଣା ପରେ ଲଗାତାର ତୃତୀୟ ଥର ପାଇଁ ପଶ୍ଚିମବଙ୍ଗରେ ସଂଖ୍ୟାଗରିଷ୍ଠତା ହାସଲ କରିବ ଟିଏମସି । ଆଉ ପୁଣି ଥରେ ମୁଖ୍ୟମନ୍ତ୍ରୀ ଗାଦିରେ ବସିବେ ଦିଦି ମମତା ।
ତେବେ ଚଳିତ ଥରର ନିର୍ବାଚନ ମମତାଙ୍କ ପାଇଁ ବେଶ ସଂଘର୍ଷପୂର୍ଣ୍ଣ ଥିଲା । ବିଜେପି ସୋନାର ବାଙ୍ଗଲା ଡାକରା ଦେଇ ଦିଦିଙ୍କ କଡା ଟକ୍କର ଦେଇଥିଲା । ଶୁଭେନ୍ଦୁ ଅଧିକାରୀଙ୍କଠାରୁ ଆରମ୍ଭ କରି ଅନେକ ନେତା ଟିଏମସି ଛାଡି ବିଜେପି ଶିବିରରେ ଯୋଗ ଦେଇଥିଲେ । ଦିଦି ମଧ୍ୟ ନିଜ ପାରମ୍ପରିକ ଆସନକୁ ଛାଡି ନନ୍ଦିଗ୍ରାମରୁ ପ୍ରାର୍ଥୀ ହେବା ସହିତ ଶୁଭେନ୍ଦୁଙ୍କ ବିରୋଧରେ ମୋର୍ଚ୍ଚା ଖୋଲିଥିଲେ । ଆଉ ବାଜିମାତ୍ ମଧ୍ୟ କରିଛନ୍ତି । ନନ୍ଦିଗ୍ରାମରୁ ୧୨ ହଜାର ଭୋଟରେ ବିଜୟୀ ହୋଇଛନ୍ତି ମମତା ଦିଦି ।