ତୃତୀୟ ରାଉଣ୍ଡ ସୁଦ୍ଧା ୪୬୦୦ ଭୋଟରେ ମମତା ଆଗୁଆ । ଭବାନୀପୁରବାସୀଙ୍କ ଭରସା ଜିତିବେ କି ଦିଦି?
କନକ ବ୍ୟୁରୋ : ହାଇପ୍ରୋଫାଇଲ ଭବାନୀପୁର ଆସନ ପାଇଁ ଆରମ୍ଭ ହୋଇଛି ଭୋଟଗଣତି । ତୃତୀୟ ରାଉଣ୍ଡ ଗଣତି ଶେଷ ସୁଦ୍ଧା ମମତା ବାନାର୍ଜୀ ଆଗରେ ରହିଛନ୍ତି । ତୃତୀୟ ରାଉଣ୍ଡ ସୁଦ୍ଧା ଟିଏମସି ୪୬୦୦ ଭୋଟରେ ଆଗରେ ରହିଛି । ଲଗାତାର ୩ଟି ରାଉଣ୍ଡରେ ଆଗୁଆ ହେବା ପରେ ମମତାଙ୍କ ବାସଭବନରେ ବାଣ ଫୁଟାଇ ଉତ୍ସବ ମନାଇଛନ୍ତି କାର୍ଯ୍ୟକର୍ତ୍ତା ।
Kanak News is now on WhatsApp
Join and get latest news updates delivered to you via WhatsApp
ପ୍ରଥମ ରାଉଣ୍ଡରେ ଟିଏମସି ପ୍ରାର୍ଥୀ ତଥା ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ଆଗୁଆ ରହିଥିଲେ ।ପ୍ରଥମ ରାଉଣ୍ଡ ଶେଷ ସୁଦ୍ଧା ମମତା ପାଖାପାଖି ୨୮୦୦ ଭୋଟରେ ଆଗୁଆ ରହିଥିଲେ । ସେହିଭଳି ପୋଷ୍ଟାଲ ବାଲାଟରେ ମଧ୍ୟ ମମତା ୭୭୫ ଭୋଟରେ ଆଗୁଆ ରହିଛନ୍ତି ।
ବିଧାନସଭା ନିର୍ବାଚନରେ ନନ୍ଦୀଗ୍ରାମରୁ ହାରିବା ପରେ ଉପନିର୍ବାଚନରେ ମମତା ଭାଗ୍ୟ ପରଖୁଛନ୍ତି । କଡା ସୁରକ୍ଷା ମଧ୍ୟରେ ଭବାନୀପୁରରେ ଭୋଟ ଗଣତି ଚାଲିଛି । ଭୋଟ ଗଣତି କେନ୍ଦ୍ରରେ ସ୍ଥାନୀୟ ପୋଲିସ ସହ କେନ୍ଦ୍ରୀୟ ସୁରକ୍ଷାବଳ ନିୟୋଜିତ କରାଯାଇଛି । ଭୋଟଗଣତି କେନ୍ଦ୍ରକୁ ପୂରା ସିସିଟିଭି ନଜରରେ ରଖାଯାଇଛି । ମୋଟ ୨୧ ରାଉଣ୍ଡ ଭୋଟଗଣନା ହେବ । ରିଟର୍ଣ୍ଣିଂ ଅଫିସର ଓ ପର୍ଯ୍ୟବେକ୍ଷକଙ୍କୁ ଛାଡିଦେଲେ ଭୋଟ ଗଣତିରେ ନିୟୋଜିତ ଥିବା ଅନ୍ୟ କୌଣସି କର୍ମଚାରୀ ମୋବାଇଲ ବ୍ୟବହାର କରିପାରିବେ ନାହିଁ ।
ଗତ ୩୦ ତାରିଖରେ ଭବାନୀପୁର ଉପ-ନିର୍ବାଚନ ପାଇଁ ମତଦାନ ହୋଇଥିଲା । ଆଉ ଏହି ଉପ-ନିର୍ବାଚନରେ ମମତା ନିଜର ରାଜନୈତିକ ଭାଗ୍ୟ ପରୀକ୍ଷା କରିଛନ୍ତି । ଭବାନୀପୁର ଉପ-ନିର୍ବାଚନରେ ମୋଟ ୫୩.୩୨ ପ୍ରତିଶତ ମତଦାନ ହୋଇଥିବା ଫଳାଫଳ କାହା ସପକ୍ଷରେ ଯିବ ତାହାର ଆକଳନ କରିବା ବେଶ କଷ୍ଟକର ହୋଇପଡିଛି । କାରଣ ମମତାଙ୍କୁ ମାତ୍ ଦେବାକୁ ବିଜେପି ଜୋର ଲଗାଇଥିଲା । ଦଳ ପ୍ରିୟଙ୍କା ଟିବ୍ରେୱାଲଙ୍କୁ ପ୍ରାର୍ଥୀ କରି ମମତାଙ୍କୁ କଡା ଟକ୍କର ଦେଇଛି ବୋଲି ଦାବି କରିଛି ।
ଅନ୍ୟପଟେ ଏହି ନିର୍ବାଚନ ମମତାଙ୍କ ପାଇଁ ବେଶ ଗୁରୁତ୍ୱପୂର୍ଣ୍ଣ କରାଯାଉଛି । କାରଣ ନିର୍ବାଚନର ଫଳାଫଳ ମମତାଙ୍କ ସପକ୍ଷରେ ନଗଲେ ମୁଖ୍ୟମନ୍ତ୍ରୀ ପଦ ଛାଡିବାକୁ ପଡିପାରେ । କାରଣ ନିୟମ ଅନୁଯାୟୀ, କୌଣସି ବ୍ୟକ୍ତି ବିଧାନସଭାର ସଦସ୍ୟ ନଥାଇ ଯଦି ମୁଖ୍ୟମନ୍ତ୍ରୀ ହୋଇଥାନ୍ତି ତେବେ ତାଙ୍କୁ ୬ ମାସ ମଧ୍ୟରେ ବିଧାନସଭାକୁ ନିର୍ବାଚିତ ହେବାକୁ ପଡିଥାଏ । ନଚେତ ମୁଖ୍ୟମନ୍ତ୍ରୀ ପଦ ଛାଡିବାକୁ ପଡିଥାଏ । ଯେହେତୁ ମମତା ନନ୍ଦୀଗ୍ରାମ ଆସନରୁ ପରାଜିତ ହେବା ପରେ ମଧ୍ୟ ମୁଖ୍ୟମନ୍ତ୍ରୀ ରହିଛନ୍ତି ତେଣୁ ଭବାନୀପୁର ଆସନ ତାଙ୍କ ଭାଗ୍ୟ ନିର୍ଦ୍ଧାରଣ କରିବ ।