ନୂଆ କୃଷି ଆଇନକୁ ବିରୋଧ କରି ପଶ୍ଚିମବଙ୍ଗ ବିଧାନସଭାରେ ସଙ୍କଳ୍ପ ପାରିତ । ହଟ୍ଟଗୋଳ ମଧ୍ୟରେ ‘ଜୟ ଶ୍ରୀ ରାମ’ ନାରା ଦେଇ କକ୍ଷତ୍ୟାଗ କଲେ ବିଜେପି ବିଧାୟକ ।

97

କନକ ବ୍ୟୁରୋ : କେନ୍ଦ୍ର ସରକାରଙ୍କର ନୂତନ କୃଷି ଆଇନକୁ ବିରୋଧ କରି ପଶ୍ଚିମବଙ୍ଗର ତୃଣମୂଳ କଂଗ୍ରେସ (ଟିଏମ୍‌ସି) ସରକାର ଆଜି (ଗୁରୁବାର) ବିଧାନସଭାରେ ପ୍ରବଳ ହଟ୍ଟଗୋଳ ମଧ୍ୟରେ ଏକ ସଂକଳ୍ପ ପାରିତ କରାଇ ନେଇଛନ୍ତି । ବିଧାନସଭାରେ ପାରିତ ହୋଇଥିବା ସଙ୍କଳ୍ପରେ ତୃଣମୂଳ କଂଗ୍ରେସ ସରକାର ବିବାଦୀୟ କୃଷି ଆଇନକୁ ପ୍ରତ୍ୟାହାର କରିନେବାକୁ ଦାବି କରିଛନ୍ତି ।

ପଶ୍ଚିମବଙ୍ଗର ସଂସଦୀୟ ବ୍ୟାପାର ମନ୍ତ୍ରୀ ପାର୍ଥ ଚାଟାର୍ଜୀଙ୍କ ଦ୍ୱାରା ବିଧାନସଭାରେ ଆଗତ ଏହି ସଂକଳ୍ପରେ କେନ୍ଦ୍ର ସରକାରଙ୍କର ତିନିଟି ଯାକ କୃଷି ସଂସ୍କାର ଆଇନକୁ କୃଷକ ବିରୋଧୀ ଏବଂ କର୍ପୋରେଟରମାନଙ୍କ ପାଇଁ ଅନୁକୂଳ ବୋଲି କୁହାଯାଇଛି ।

ଏ ସଂକ୍ରାନ୍ତରେ ବିଧାନସଭାରେ ପାରିତ ହୋଇଥିବା ସଙ୍କଳ୍ପର ପ୍ରସ୍ତାବରେ କୁହାଯାଇଛି ଯେ ଏହି ନୂତନ ଆଇନ୍‌ ଏପରି ପରିସ୍ଥିତି ସୃଷ୍ଟି କରିବ ଯେଉଁଠାରେ ସରକାର କୃଷିଜାତ ଦ୍ରବ୍ୟ କ୍ରୟ ବନ୍ଦ କରିବାକୁ ବାଧ୍ୟ ହେବେ । ଯାହା ଦ୍ୱାରା ସାଧାରଣ ବଣ୍ଟନ ବ୍ୟବସ୍ଥା ନଷ୍ଟ ହୋଇଯିବ ଏବଂ ଖାଦ୍ୟଶସ୍ୟ ମହଜୁଦ୍‌ ଓ କଳାବଜାରୀ ବୃଦ୍ଧି ପାଇବ । ଏହି ସଂକଳ୍ପ ପାରିତ ହେବା ମାତ୍ରେ ବିଜେପି ବିଧାୟକମାନେ ଗୃହର ମଧ୍ୟ ଭାଗକୁ ଯାଇ ବିରୋଧ ପ୍ରଦର୍ଶନ କରିବା ସହ ‘ଜୟ ଶ୍ରୀ ରାମ’ ନାରା ଦେଇ କକ୍ଷତ୍ୟାଗ କରିଥିଲେ ।

ବିଧାନସଭାରେ ନିଜର ବକ୍ତବ୍ୟ ରଖି ମୁଖ୍ୟମନ୍ତ୍ରୀ ମମତା ବାନାର୍ଜୀ କହଥିଲେ ଯେ ବିଜେପି ସଂସଦରେ ନିଜର ସଂଖ୍ୟାବଳରେ ଏହି ନୂତନ କୃଷି ଆଇନ୍‌କୁ ପାସ୍‌ କରାଇ ନେଇଛି । ତେଣୁ, ନୂତନ କୃଷି ଆଇନକୁ ରଦ୍ଦ କରିବାକୁ ସେ କେନ୍ଦ୍ରକୁ ଅନୁରୋଧ କରିଛନ୍ତି । ଅନ୍ୟପକ୍ଷରେ ବିଜେପି ସବୁବେଳେ ଆନ୍ଦୋଳନକୁ ଆତଙ୍କବାଦୀ କାର୍ଯ୍ୟକଳାପ ବୋଲି କହିଥାଏ । ତେବେ, କୃଷି ଆଇନ୍‌ ପ୍ରତ୍ୟାହାର ଦାବିରେ ଆନ୍ଦୋଳନ ଚଳାଇଥିବା କୃଷକଙ୍କୁ ଦେଶଦ୍ରୋହୀ ଭାବରେ ଚିତ୍ରଣ କରାଯିବା ଘଟଣାକୁ ତାଙ୍କ ସରକାର ବରଦାସ୍ତ କରିପାରିବ ନାହିଁ ବୋଲି ମୁଖ୍ୟମନ୍ତ୍ରୀ ମମତା ବାନାର୍ଜୀ ସ୍ପଷ୍ଟ କରିଦେଇଛନ୍ତି ।

କୃଷି ଆଇନ ପ୍ରତ୍ୟାହାର ଉପରେ ଆଲୋଚନା ପାଇଁ ପ୍ରଧାନମନ୍ତ୍ରୀ ସର୍ବଦଳୀୟ ବୈଠକ ଡକାଇବା ଉଚିତ ବୋଲି ଟିଏମସି ସୁପ୍ରିମୋ କହିଛନ୍ତି । ପ୍ରସଙ୍ଗକ୍ରମେ ଉଲ୍ଲେଖଯୋଗ୍ୟ, ଏପର୍ଯ୍ୟନ୍ତ ପାଞ୍ଚଟି ଅଣ-ବିଜେପି ଶାସିତ ରାଜ୍ୟ- ପଞ୍ଜାବ, ଛତିଶଗଡ଼, ରାଜସ୍ଥାନ, କେରଳ ଏବଂ ଦିଲ୍ଲୀ ନିଜ ନିଜ ବିଧାନସଭାରେ ବିବାଦୀୟ କୃଷି ଆଇନ ବିରୁଦ୍ଧରେ ସଂକଳ୍ପ ପାରିତ କରିଛନ୍ତି ।

Comments are closed.